തിരുവനന്തപുരം: ശബരിമലയുമായി ബന്ധപ്പെട്ട് മുഖ്യമന്ത്രി വിളിച്ചു ചേര്ത്ത സര്വ്വകക്ഷിയോഗം വെറും നാടകമെന്ന് ബിജെപി സംസ്ഥാന പ്രസിഡന്റ് അഡ്വ.പി.എസ്.ശ്രീധരന്പിള്ള. യോഗം ബഹിഷ്ക്കരിച്ചതിനു ശേഷം മാധ്യമപ്രവര്ത്തകരോട് സംസാരിക്കുകയായിരുന്നു അദ്ദേഹം.എകെജി സെന്ററില് എഴുതി തയ്യാറാക്കിയ തിരക്കഥ അതുപോലെ സര്വ്വകക്ഷിയോഗത്തില് നടപ്പിലാക്കുകയായിരുന്നു.
പരിഹാസ്യമായിരുന്നു യോഗം. യുവതീ പ്രവേശനവുമായി ബന്ധപ്പെട്ട് വിധി ഉടനെ നടപ്പിലാക്കണമെന്ന് സുപ്രീം കോടതി പറഞ്ഞിട്ടില്ല. 2007 മുതല് പോലീസിനെ ആഭ്യന്തരവകുപ്പില് നിന്ന് വേര്പെടുത്തി ഏഴംഗ സെക്യൂരിറ്റി കമ്മീഷനെ ഏല്പ്പിക്കണമെന്ന സൂപ്രീംകോടതിയുടെ വിധി ഇനിയും സംസ്ഥാനത്ത് നടപ്പിലാക്കിയിട്ടില്ലെന്ന് യോഗത്തില് ചൂണ്ടിക്കാട്ടിയിട്ടുണ്ട്.
കള്ളക്കേസില് കുടുക്കി നിരപരാധികളെ വേട്ടയാടുന്ന വിഷയവും യോഗത്തില് ഉന്നയിച്ചു. അടിയന്താരവസ്ഥക്ക് തുല്ല്യമാണ് സംസ്ഥാനത്തെ സാഹചര്യം. മാധ്യമ വിലക്ക് ഏര്പ്പെടുത്തിയിരിക്കുന്നു. വധശിഷക്ക് വിധിച്ച പ്രതിക്കു പോലും പുനപരിശോധനാ ഹര്ജി നല്കിയാല് വിധി നടപ്പിലാക്കുന്നതിന് സാവകാശം ലഭിക്കുന്നതായി ശ്രീധരന് പിള്ള പറഞ്ഞു.
മുഖ്യമന്ത്രിയുടെ നിലപാട് ജനാധിപത്യ സംസ്്കാരത്തിന് യോജിച്ചതല്ല. അഹങ്കാരത്തിന്റെ ഭാഷയിലാണ് സര്ക്കാര് സംസാരിക്കുന്നത്. സ്റ്റാലിനിസ്റ്റ് റഷ്യയില് നടപ്പാക്കിയത് പോലെ എതിരാളികളെ അടിച്ചമര്ത്താനും ഈശ്വര വിശ്വാസികളെ തകര്ക്കാനുമുള്ള ആസൂത്രിത നീക്കമാണ് സിപിഎം നടത്തുന്നത്.
ബിജെപി വിശ്വാസികള്ക്ക് ഒപ്പമാണ്. ഹിന്ദുസംഘടനകളെ വിളിച്ച് വിഷയം ചര്ച്ച ചെയ്യാന് സര്ക്കാര് തയ്യാറായില്ല. മറ്റു സംസ്ഥാനങ്ങളിലേക്കു സമരം വ്യാപിപ്പിക്കുന്നതിനെക്കുറിച്ച് എന്ഡിഎ ആലോചിക്കും. ഇന്ന് കൊച്ചിയില് ചേരുന്ന എന്ഡിഎ യോഗം ഭാവിപരിപാടികള് വിശദമായി ചര്ച്ചചെയ്യുമെന്നും ശ്രീധരന്പിള്ള പറഞ്ഞു. ശ്രീധരന്പിള്ളയോടൊപ്പം പി.സി.ജോര്ജ്ജ് എംഎല്എയും യോഗത്തില് നിന്ന് ഇറങ്ങിപ്പോയി.
