ചങ്ങനാശേരി: ഭാരതീയ വിചാരകേന്ദ്രം വളര്ന്നുകൊണ്ടിരിക്കുന്ന പ്രസ്ഥാനമാണെന്ന് ഡയറക്ടര് പി. പരമേശ്വരന്. ഭാരതീയ വിചാരകേന്ദ്രത്തിന്റെ 36-ാം സംസ്ഥാന സമ്മേളനത്തിന്റെ ഭാഗമായുള്ള പ്രതിനിധി സഭ ഉദ്ഘാടനം ചെയ്യുകയായിരുന്നു അദ്ദേഹം. 1982ല് വിജയദശമി ദിനത്തിലാണ് വിചാരകേന്ദ്രം പിറവിയെടുത്തത്. അതിന് ശേഷം 36 വര്ഷത്തിനുള്ളില് നാടിന്റെ നാനാഭാഗങ്ങളില് വ്യാപിച്ചു. അത് എല്ലാവര്ക്കും ബോധ്യമുള്ള കാര്യമാണെന്നും പരമേശ്വരന് പറഞ്ഞു.
ശബരിമല വിഷയത്തില് സമവായമാണ് ഉണ്ടാകേണ്ടതെന്ന് വിചാരകേന്ദ്രം ജോയിന്റ് ഡയറക്ടര് ആര്. സഞ്ജയന് ആമുഖ പ്രഭാഷണത്തില് പറഞ്ഞു. അലയടിച്ചുവരുന്ന ജനവികാരവും നിയമവാഴ്ചയില് അധിഷ്ഠിതമായ സാമൂഹ്യക്രമവും സുപ്രീംകോടതി വിധിയും കണക്കിലെടുത്ത് സമവായം ഉണ്ടാകണം. അദ്ദേഹം പറഞ്ഞു.
സമ്മേളനത്തില് സംസ്ഥാന പ്രസിഡന്റ് ഡോ. എം. മോഹന്ദാസ് അദ്ധ്യക്ഷനായി. വൈസ് പ്രസിഡന്റ് ഡോ. സി. ഐ. ഐസക്ക്, ജനറല് സെക്രട്ടറി കെ.സി. സുധീര്ബാബു, സംഘടനാ സെക്രട്ടറി മഹേഷ് എന്നിവര് പങ്കെടുത്തു.
ഇന്ന് രാവിലെ 10ന് കേന്ദ്രമന്ത്രി അല്ഫോണ്സ് കണ്ണന്താനം സമ്മേളനം ഉദ്ഘാടനം ചെയ്യും. സ്വാഗതസംഘം ചെയര്മാന് ജസ്റ്റിസ് കെ.ടി. തോമസ് അദ്ധ്യക്ഷനാകും. പ്രജ്ഞാപ്രവാഹ് ദേശീയ സംയോജകന് ജെ. നന്ദകുമാര് മുഖ്യപ്രഭാഷണം നടത്തും.
