സന്നിധാനം: ചരിത്രത്തിലാദ്യമായി വനിതാ പോലീസുകാര് സന്നിധാനത്ത് സുരക്ഷാ ഡ്യൂട്ടിയില്. 50 വയസ്സിന് മുകളിലുള്ള 15 വനിതാ ഉദ്യോഗസ്ഥരാണ് ചിത്തിര ആട്ടമഹോത്സവത്തിന് നടതുറന്നപ്പോള് സന്നിധാനത്ത് സുരക്ഷ ഒരുക്കാന് എത്തിയത്. എട്ട് സിഐമാരും ഏഴ് എസ്ഐ മാരുമാണ് സുരക്ഷാ ചുമതലയില്.
ഇന്നലെ രാവിലെ യൂണിഫോമിലാണ് ഉദ്യോഗസ്ഥര് ശ്രീകോവിലിന് മുന്നില് എത്തിയത്. നട അടച്ചിരുന്നിട്ടും തൊഴുകൈകളോടെ ശ്രീകോവിലിന് മുന്നില്നിന്ന് അയ്യപ്പനെ വണങ്ങി അനുവാദം വാങ്ങി. അതിനുശേഷമാണ് ഡ്യൂട്ടിയില് പ്രവേശിച്ചത്. മേലുദ്യോഗസ്ഥരെ അനുസരിക്കുക മാത്രമാണ് ചെയ്യുന്നതെന്നും തങ്ങള് ചെയ്യുന്നത് തെറ്റാണെങ്കില് പൊറുക്കണമെന്നുമുള്ള മാപ്പപേക്ഷ പോലെയായിരുന്നു ഓരോരുത്തരുടെയും ശരീരഭാഷ.
ആദ്യമായി സന്നിധാനത്തെത്തിയ അമ്പരപ്പും പ്രകടമായിരുന്നു. മാധ്യമങ്ങളോട് അകലം പാലിക്കണമെന്ന കര്ശന നിര്ദേശമാണ് ഉന്നത ഉദ്യോഗസ്ഥര് നല്കിയിരിക്കുന്നത്. ഐജി അജിത്കുമാറിനാണ് ഇവരുടെ ചുമതല. സന്നിധാനത്ത് സുരക്ഷാച്ചുമതല അടിച്ചേല്പിച്ചതിന്റെ അമര്ഷവും പിരിമുറുക്കവും പ്രകടമായിരുന്നു. തുലാമാസ പൂജയ്ക്ക് യുവതികളെ പ്രവേശിപ്പിക്കാന് ശ്രമിച്ച ഐജി ശ്രീജിത്ത് സന്നിധാനത്തെത്തി നിറകണ്ണുകളോടെ മാപ്പപേക്ഷിച്ചിരുന്നു.
യുവതികള് പ്രവേശിച്ചാല് ധാരാളം അമ്മമാര് പ്രതിഷേധക്കാരായി എത്താന് സാധ്യതയുണ്ടെന്ന രഹസ്യാന്വേഷണ വിഭാഗത്തിന്റെ റിപ്പോര്ട്ടിനെ തുടര്ന്നാണ് ഇവരെ ഡ്യൂട്ടിക്ക് നിയോഗിച്ചതെന്നാണ് പോലീസ് വാദം. ഇവരെ കൂടാതെ പമ്പയില് നൂറിലധികം യുവതികളായ വനിതാ പോലീസുകാരെയും നിയോഗിച്ചിട്ടുണ്ട്.
