ഒപ്പത്തിനൊപ്പം

വിശാഖപട്ടണം: അവസാന പന്തവരെ ആവേശം നിറഞ്ഞുനിന്ന ഇന്ത്യ – വെസ്റ്റ് ഇന്‍ഡീസ് രണ്ടാം ഏകദിനം ടൈ. 322 റണ്‍സിന്റെ വിജയലക്ഷ്യത്തിലേക്ക് ബാറ്റ് പിടിച്ച വെസ്റ്റ് ഇന്‍ഡീസ് ഹോപ്പ് പുറത്താകാതെ നേടിയ 123 റണ്‍സിന്റെ പിന്‍ബലത്തില്‍ അമ്പത് ഓവറില്‍ ഏഴു വിക്കറ്റിന് 321 റണ്‍സ് എടുത്തു. ആദ്യം ബാറ്റ്  ചെയ്ത ഇന്ത്യ, നായകന്‍ കോഹിലിയുടെ സെഞ്ചുറിയില്‍ ആറു വിക്കറ്റിന് 321 റണ്‍സാണെടുത്തത്. ആദ്യ മത്സരത്തില്‍ വിജയിച്ച ഇന്ത്യ പരമ്പരയില്‍ 1-0 ന് മുന്നിട്ടു നില്‍ക്കുകയാണ്. 

ആദ്യ ഏകദിനത്തില്‍ സെഞ്ചുറി നേടിയ വിന്‍ഡീസിന്റെ ഹെറ്റ്മയറും ബാറ്റിങ്ങില്‍ തിളങ്ങി. അടിച്ചുതകര്‍ത്ത ഹെറ്റ്മയര്‍ 64 പ്ന്തില്‍ 94 റണ്‍സ് നേടി. ഹോപ്പ് 134 പന്തില്‍ 123 റണ്‍സുമായി പുറത്താകാതെ നിന്നു. പത്ത് ഫോറും മൂന്ന് സിക്‌സറും അടിച്ചു. 

അടിച്ചു തകര്‍ത്ത ഇന്ത്യന്‍ നായകന്‍ വിരാട് കോഹ് ലി 157 റണ്‍സുമായി അജയ്യനായി നിന്നു. 13 ഫോറും നാല് സിക്‌സറും ആ ബാറ്റില്‍ നിന്ന് പിറവിയെടുത്തു. 129 പന്തിലാണ് ഇത്രയും റണ്‍സ് നേടിയത്.

സെഞ്ചുറിയിലേക്കുള്ള പ്രയാണത്തിനിടെ അതിവേഗം പതിനായിരം റണ്‍സ് തികയ്‌ക്കുന്ന ലോകത്തെ ആദ്യ ബാറ്റ്‌സ്മാനായി. ഇന്ത്യയുടെ തന്നെ സച്ചിന്‍ ടെന്‍ഡുല്‍ക്കറെയാണ് കോഹ്‌ലി റെക്കോഡ് പുസ്തകത്തില്‍ നിന്ന് ഒരു പടി താഴെയ്‌ക്ക് ഇറക്കിയത്. കലണ്ടര്‍ വര്‍ഷത്തില്‍ ആയിരം റണ്‍സും ഇന്ത്യന്‍ നായകന്‍ സ്വന്തമാക്കി.

അമ്പാട്ടി റായ്ഡു നായകന് ഉറച്ച പിന്തുണ നല്‍കി. മൂന്നാം വിക്കറ്റില്‍ കോഹ് ലിയും റായ്ഡുവും 139 റണ്‍സ് അടിച്ചെടുത്തു. എണ്‍പത് പന്ത് നേരിട്ട റായ്ഡു എട്ട് ഫോറുകളുടെ അകമ്പടിയില്‍ 73 റണ്‍സ് നേടി. നഴ്‌സിന്റെ പന്തില്‍ ബെയ്ല്‍സ് തെറിച്ചാണ് റായ്ഡു മടങ്ങിയത്. ഓപ്പണര്‍ ധവാന്‍ മുപ്പത് പന്തില്‍ നാല് ഫോറും ഒരു സിക്‌സറും അടക്കം 29 റണ്‍സ് എടുത്തു.

ടോസ് നേടി ബാറ്റ്്  ചെയ്ത ഇന്ത്യയുടെ തുടക്കം ശോഭനമായില്ല. ആദ്യ ഏകദിനത്തില്‍ സെഞ്ചുറിയുമായി പുറത്താകാതെ നിന്ന ഓപ്പണര്‍ രോഹിത് ശര്‍മ നാല് റണ്‍സിന് കീഴടങ്ങി. റോച്ചിന്റെ പന്തില്‍ ഹെറ്റമയര്‍ ക്യാച്ചെടുത്തു. ഇന്ത്യന്‍ സ്‌കോര്‍ 1-15.

രോഹിത് ശര്‍മയ്‌ക്ക് പിന്നാലെ ധവാനും മടങ്ങി. നഴ്‌സിന്റെ പന്തില്‍ വിക്കറ്റിന്  മുന്നില്‍ കുടുങ്ങി. കോഹ് ലിയും റായ്ഡുവും ഒത്തുചേര്‍ന്നതോടെ ഇന്ത്യന്‍ സ്‌കോര്‍ ഉയര്‍ന്നു. സ്‌കോര്‍ 179 ലെത്തിയപ്പോള്‍ റായ്ഡു പുറത്തായി. തുടര്‍ന്നെത്തിയ മുന്‍ നായകന്‍ ധോണിക്ക് ഏറെ സമയം പിടിച്ചു നില്‍്ക്കാനായില്ല. 25 പന്തില്‍ ഒരു സിക്‌സര്‍ അടിച്ച ധോണി ഇരുപത് റണ്‍സിന് വീണു. പുതുമുഖമായ ഋഷഭ് പന്ത് 17 റണ്‍സിന് പുറത്തായതോടെ ഇന്ത്യന്‍ സ്‌കോര്‍ മുന്നൂറ് കടക്കില്ലെന്ന് തോന്നി. പക്ഷെ അവസാന ഓവറുകളില്‍ തകര്‍ത്തടിച്ച കോഹ്‌ലി സ്‌കോര്‍ 321 റണ്‍സിലെത്തിച്ചു.

വെസ്റ്റ് ഇന്‍ഡീസിന്റെ നഴ്‌സ് പത്ത് ഓവറില്‍ 46 റണ്‍സിന് രണ്ട് വിക്കറ്റും മക്‌കോയ് ഒമ്പത് ഓവറില്‍ 71 റണ്‍സിന് രണ്ട് വിക്കറ്റും വീഴ്‌ത്തി. കെമര്‍ റോച്ചിനും സാമുവല്‍സിനും ഓരോ വിക്കറ്റ് ലഭിച്ചു.

സ്കോര്‍

ഇന്ത്യ: രോഹിത് ശര്‍മ സി ഹെറ്റ്മയര്‍ ബി റോച്ച് 4, എസ്.ധവാന്‍ എല്‍ബിഡബ്്‌ളിയു ബി നഴ്‌സ് 29, വിരാട് കോഹ് ലി നോട്ടൗട്ട് 157 , അമ്പാട്ടി റായ്ഡു ബി നഴ്‌സ് 73, എം.എസ്.ധോണി ബി മക്‌കോയ് 20, ഋഷഭ് പന്ത് എല്‍ബിഡബ്‌ളിയു ബി സാമുവല്‍സ് 17, ആര്‍.എ.ജഡേജ സി കെഒഎ പവല്‍ ബി മക്‌കോയ്് 13, മുഹമ്മദ് ഷമി നോട്ടൗട്ട് 0, എക്‌സ്ട്രാസ് 8, ആകെ 50 ഓവറില്‍ ആറു വിക്കറ്റിന് 321.

വിക്കറ്റ് വീഴ്ച: 1-15, 2-40, 3-179, 4-222, 5-248, 6-307

ബൗളിങ്ങ്: ജേസണ്‍ ഹോള്‍ഡര്‍ 6-0-50-0, കെ.എ.ജെ.റോച്ച് 10-0-67-1, എ.ആര്‍. നഴ്‌സ് 10-0-46-2, ഡി.ബിഷു 10-0-48-0, ഒ.സി. മകോയ് 9-0-71-2, എം.എന്‍. സാമുവല്‍സ് 5-0-36-1.