കൊച്ചി: കേരളത്തില് ഏഴ് ജില്ലകളില് കൂടി സിറ്റി ഗ്യാസ് പദ്ധതി വ്യാപിപ്പിക്കുന്നു. ഇതിനുള്ള അനുമതി ഇന്ത്യന് ഓയില്- അദാനി ഗ്യാസ് ലിമിറ്റഡിന് നല്കി. പാലക്കാട്, തൃശൂര്, കണ്ണൂര്, കാസര്ഗോഡ്, മലപ്പുറം, കോഴിക്കോട്, വയനാട് ജില്ലകളിലാണ് പദ്ധതി നടപ്പാക്കുന്നത്. ഇതിന് പുറമേ കേന്ദ്ര ഭരണ പ്രദേശമായ മാഹിയിലും പദ്ധതി കൊണ്ടുവരുന്നുണ്ട്.
അടുക്കളയിലേക്ക് നേരിട്ട് ഗ്യാസ് എത്തിക്കുന്ന പദ്ധതിയാണ് സിറ്റി ഗ്യാസ്. ഇത് വ്യാപിപ്പിക്കുന്നതോടെ17 ലക്ഷം അടുക്കളയിലേക്കാണ് നേരിട്ട് ഗ്യാസ് എത്തുക. വാഹന ഇന്ധനമായ സിഎന്ജി ലഭ്യമാക്കുന്നതിനായി ഈ ജില്ലകളില് 597 ഗ്യാസ് സ്റ്റേഷനുകളും സ്ഥാപിക്കും. പെട്രോളിയം ആന്ഡ് നാച്ചുറല് ഗ്യാസ് റഗുലേറ്ററി അതോറിറ്റി രാജ്യത്തെ 86 മേഖലകളില് പദ്ധതി നടപ്പാക്കുന്നതിനായി വിളിച്ച ടെന്ഡറിലാണ് ഇന്ത്യന് ഓയില്- അദാനി ഗ്രൂപ്പ് സംയുക്ത സംരംഭമായ ഐഒഎജിപിഎല് കേരളം പിടിച്ചത്.
കേരളത്തിലെ ആദ്യ സിറ്റി ഗ്യാസ് പദ്ധതി എറണാകുളത്ത് നടപ്പാക്കുന്നതും ഇവര് തന്നെയാണ്. 2016 ഫെബ്രുവരിയിലാണ് കൊച്ചിയില് പദ്ധതി ആരംഭിച്ചത്. എന്നാല് അന്നു മുതല് 1500 ല് താഴെ ഗാര്ഹിക കണക്ഷന് മാത്രമാണ് ഇതിലൂടെ നല്കാനായിട്ടുള്ളത്. കൊച്ചി- മാംഗ്ലൂര് വാതക പൈപ്പ് ലൈന് കടന്നുപോകുന്നതോ സാമിപ്യമുള്ളതോ ആയ ജില്ലകളിലാണ് സിറ്റി ഗ്യാസ് പദ്ധതി നടപ്പാക്കുന്നത്.
പൈപ്പ് ലൈന് ഈ വര്ഷം അവസാനത്തോടെ പൂര്ത്തിയാക്കാനുള്ള ശ്രമത്തിലാണ് ഗ്യാസ് അതോറിറ്റി ഓഫ് ഇന്ത്യ. വീടുകളിലേക്ക് പാചക വാതകം എത്തിക്കുന്നതിനൊപ്പം വാഹനങ്ങള്ക്ക് സിഎന്ജി ലഭ്യമാക്കുന്നതും സിറ്റി ഗ്യാസ് പദ്ധതിയുടെ ഭാഗമാണ്.
