ആലപ്പുഴ: ഇതുവരെ അപ്രാപ്യമായിരുന്ന കുട്ടനാട് മണ്ഡലം കൈപ്പിടിയിലൊതുക്കാന്‍ പ്രളയാനന്തര ദുരിതാശ്വാസ ഫണ്ട് വിനിയോഗിക്കാന്‍ സിപിഎം. ഇതുവരെ മുന്നണികളിലെ ഘടകകക്ഷികള്‍ മാത്രം ജയിച്ച് വന്നിരുന്ന കുട്ടനാടിനെ എങ്ങനെയും വരുതിയിലാക്കാന്‍ പ്രളയം മുതലെടുത്ത് മുന്നേറാനാണ് പാര്‍ട്ടി നിര്‍ദേശം.
സര്‍ക്കാരിനേയും, പാര്‍ട്ടിയെയും അമ്പരിപ്പിച്ച് ജനങ്ങള്‍ കൈയയച്ച് നല്‍കിയ ദുരിതാശ്വസ ഫണ്ട്, പാര്‍ട്ടിക്ക് മേല്‍ക്കൈ നേടാനായി പാര്‍ട്ടി നിയന്ത്രണത്തില്‍ പൂര്‍ണമായി വിനിയോഗിക്കാനും കഴിഞ്ഞ ദിവസം ചേര്‍ന്ന പാര്‍ട്ടി ജില്ലാകമ്മിറ്റി യോഗം തീരുമാനിച്ചു. ഓരോ പഞ്ചായത്തിന്റെയും ചുമതല ജില്ലാസെക്രട്ടേറിയേറ്റ് അംഗങ്ങള്‍ക്കാണ്. ഇതിന്റെ ഏകോപന ചുമതല മന്ത്രിമാരായ ജി. സുധാകരനും, തോമസ്‌ഐസക്കിനുമാണ്. എന്നാല്‍ സുധാകരന്‍ എല്ലാ മേഖലയിലും പിടിമുറുക്കിയതോടെ ഐസക് അപ്രസക്തനായി.
ദുരിതാശ്വാസ സാധനങ്ങള്‍ പാര്‍ട്ടിക്കാരിലൂടെ മാത്രം ജനങ്ങളിലെത്തിയാല്‍ മതിയെന്ന നിര്‍ദേശം നടപ്പിലാക്കാനായി കുട്ടനാട് കേന്ദ്രീകരിച്ച് പ്രവര്‍ത്തിക്കുന്ന പാര്‍ട്ടി അനുകൂലികളായ സര്‍ക്കാര്‍ ജീവനക്കാരുടെ ഫ്രാക്ഷന്‍ കഴിഞ്ഞ ദിവസം വിളിച്ചു ചേര്‍ത്തു. ഒന്നിച്ച് വിളിച്ച് ചേര്‍ക്കാതെ നാല് ഫ്രാക്ഷനുകളായാണ് വിളിച്ചത്. യോഗങ്ങളില്‍ പങ്കെടുത്ത ജില്ലാ സെക്രട്ടേറിയറ്റ് അംഗങ്ങള്‍ തങ്ങളുമായി അടുപ്പമില്ലാത്ത സര്‍ക്കാര്‍ ജീവനക്കാരെ എങ്ങനെ പ്രയോജനപ്പടുത്തണമെന്നും നിര്‍ദേശം നല്‍കി. വേണ്ടിവന്നാല്‍ അത്യാവശ്യം സമ്മര്‍ദ തന്ത്രം ഉപയോഗിച്ചാണെങ്കിലും മുഴുവന്‍ ജീവനക്കാരെയും വരുതിയിലാക്കണമെന്നാണ് നിര്‍ദേശം.
പ്രളയാനന്തര സഹായവിതരണത്തിനായി കൂടുതല്‍ സിപിഎം പ്രവര്‍ത്തകരെ കുട്ടനാട്ടില്‍ എത്തിച്ചിട്ടുണ്ട്. അരൂര്‍, ചേര്‍ത്തല, ആലപ്പുഴ, അമ്പലപ്പുഴ, ഹരിപ്പാട് പ്രദേശത്തെ പ്രവര്‍ത്തകരാണ് കുട്ടനാട്ടിലുള്ളത്. പാര്‍ട്ടിയും, സര്‍ക്കാരുമാണ് ഇതെല്ലാം ചെയ്യുന്നതെന്ന പ്രതീതി ജനങ്ങളിലുളവാക്കണമെന്നും തീരുമാനിച്ചു. ഘടകകക്ഷികളെയും, പ്രതിപക്ഷ പാര്‍ട്ടികളെയും പരമാവധി ഒഴിവാക്കി വേണം പ്രവര്‍ത്തിക്കാനെന്നും പറയുന്നു.
നിലവില്‍ കുട്ടനാട് എംഎല്‍എ തോമസ്ചാണ്ടി ദുരിതാശ്വാസ പ്രവര്‍ത്തനങ്ങള്‍ക്ക് നേതൃത്വം നല്‍കുന്നതില്‍ പരാജയപ്പെട്ടു. ഇവിടെയാണ് തങ്ങള്‍ മേല്‍ക്കൈ നേടിയതെന്നും ഇനി പിന്നോട്ട് പോകരുതെന്നുമാണ് ജില്ലാകമ്മിറ്റിയുടെ വിലയിരുത്തല്‍. സിപിഎം നീക്കം മനസ്സിലാക്കിയ സിപിഐ നേരത്തെ തന്നെ കുട്ടനാട്ടില്‍ രംഗത്തിറങ്ങിയിരുന്നു. മന്ത്രിമാരായ പി. തിലോത്തമന്‍, വി.എസ്. സുനില്‍കുമാര്‍, ചന്ദ്രശേഖരന്‍ എന്നിവരുടെ നേതൃത്വത്തിലാണ് പ്രവര്‍ത്തിച്ചതെങ്കിലും അവരുടെ പ്രവര്‍ത്തനം ഇപ്പോള്‍ അത്ര സജീവമല്ല.
