പ്രാദേശിക പാര്ട്ടികളുടെ വിലയും നിലയും മറ്റുള്ളവര്ക്ക് മനസിലാക്കി നല്കിയ പ്രമുഖരില് ഒരുവനായിരുന്നു കരുണാനിധി. ചെന്നൈ മുതല് ദല്ഹി വരെ അദ്ദേഹത്തിന്റെ സ്വാധീനം പടര്ന്നു കിടന്നു. കോണ്ഗ്രസുമായും ബിജെപിയുമായും സഖ്യമുണ്ടാക്കിയ അദ്ദേഹം ഈ സഖ്യം മുന്നോട്ടു പോകുന്നതില് വലിയ പങ്കും വഹിച്ചു. എന്ഡിഎയിലും യുപിഎയിലും ഡിഎംകെ അംഗമായിരുന്നു. ഈ സമയത്തും പാട്ടിയുടെ അടിത്തറ ഉറപ്പിച്ചു നിര്ത്താനായി.
16 എംപിമാരുണ്ടായിരുന്നപ്പോള്ആദ്യ യുപിഎ സര്ക്കാരില് ആറു മന്ത്രിമാരെയാണ് ലഭിച്ചത്. മകള് കനിമൊഴിക്ക് രാജ്യസഭാ എംപി സ്ഥാനവും നേടിയെടുത്തു, രണ്ടാം യുപിഎ സര്ക്കാരിലും അഞ്ചു മന്ത്രിമാരെ ലഭിച്ചു. അന്ന് 18 എംപിമാരാണ് പാര്ട്ടിക്ക് ഉണ്ടായിരുന്നത്. പാര്ട്ടി മന്ത്രി ടുജി അഴിമതിയില് കുടുങ്ങിയപ്പോള് തന്ത്ര പൂര്വ്വം പാര്ട്ടി കേന്ദ്രഭരണം വിട്ടു.
69ല് കോണ്ഗ്രസ് തകര്ന്നു നില്ക്കുന്ന സമയത്താണ് 25 എംപിമാരുള്ള കരുണാനിധി പിന്തുണയുമായി എത്തുന്നത്. 71ല് കോണ്ഗ്രസ് ഡിഎംകെ സഖ്യം തമിഴ്നാട്ടില് അധികാരം പിടിച്ചു.75ല് അടിയന്തരാവസ്ഥ പ്രഖ്യാപിച്ചതോടെ കരുണാനിധിയും ഇന്ദിരയും വഴിപിരിഞ്ഞു. അടിയന്തരാവസ്ഥക്കെതിരെ പോരാടിയ പലരും അന്ന് തമിഴ്നാട്ടിലാണ് താവളമടിച്ചത്. വൈരാഗ്യം തീര്ക്കാന് ഇന്ദിര അഴിമതിയുടെ പേരില് കരുണാനിധി സര്ക്കാരിനെ പിരിച്ചുവിട്ടു. പക്ഷെ രണ്ടു വര്ഷത്തിനകം, എംജിആറിന്റെ നേതൃത്വത്തിലുള്ള എഐഎഡിഎകെ സര്ക്കാരിനെ മറിച്ചിടാന് കഴിയുമെന്നു മനസിലാക്കി അതേ ഇന്ദിരക്കൊപ്പം ചേര്ന്നു.
പക്ഷെ നൗ സഖ്യമെല്ലാം കോണ്ഗ്രസിനെ ദുര്ബലപ്പെടുത്താന് ഉദ്ദേശിച്ചായിരുന്നു. അങ്ങനെ തന്നെ സംഭവിക്കുകയും ചെയ്തു. പക്ഷെ എംജിആറിനോടുള്ള രാഷ്ട്രീയ മല്സരം കനത്തതു തന്നെയായിരുന്നു. അദ്ദേഹം മരണമടയുന്നതു വരെ 12 വര്ഷമാണ് കരുണാനിധി പ്രതിപക്ഷത്തിരുന്നത്.96ല് ജികെ മൂപ്പനാരും പി. ചിദംബരവും നയിച്ച കോണ്ഗ്രസ് കഷണത്തിനൊപ്പം( തമിഴ്മാനില കോണ്ഗ്രസ്) ചേര്ന്ന് കരുണാനിധി അധികാരം പിടിച്ചു.99ല് എന്ഡിഎയില് ചേര്ന്നു. കേന്ദ്രത്തില് പങ്കാളിയായി. മുരശൊലി മാരനടക്കം മന്ത്രിമാരുമായി. 2004ല് ബിജെപി സഖ്യം ഉപേക്ഷിച്ച്വീണ്ടും കോണ്ഗ്രസുമായി സഖ്യത്തിലായി.
സിനിമയിലും
ചെന്നൈ: സിനിമയിലും നിറസാന്നിധ്യമായിരുന്നു കരുണാനിധി.തിരക്കഥയിലാണ് തിളങ്ങിയത്. രാഷ്ട്രീയത്തിലായും സിനിമയിലായലും ഉശിരന് സംഭാഷണങ്ങളായിരുന്നു കരുണാനിധിയില് നിനണ്ന് വാര്ന്നു വീണത്.അക്ഷരാര്ഥത്തില് തീ പാറുന്ന ഡയലോഗുകള്. തമിഴ്ഭാഷാ പ്രേമം മനസിലും വാക്കുകളിലും കത്തി നിന്ന നേതാവായിരുന്നു. കവി, ഗാനരചയിതാവ് എന്നീ നിലകളിലും അഗ്രഗണ്യനായിരുന്നു. 77 സിനിമകള്ക്ക് തിരക്കഥയെഴുതി.
