ബെംഗളൂരു: പ്രതിപക്ഷ ഐക്യം രൂപീകരിച്ച് ബിജെപിയെ പരാജയപ്പെടുത്തി പ്രധാനമന്ത്രിയാകാമെന്ന കോണ്ഗ്രസ് അധ്യക്ഷന് രാഹുല്ഗാന്ധിയുടെ മോഹങ്ങള്ക്ക് തിരിച്ചടി.
പ്രതിപക്ഷ ഐക്യത്തിന്റെ മാതൃകയെന്ന് ഉയര്ത്തിക്കാട്ടിയ കര്ണാടകയിലെ സഖ്യകക്ഷിയുടെ പരമാധികാരിയില് നിന്നാണ് രാഹുലിന്റെ പ്രതീക്ഷയുടെ മുന്നയൊടിച്ച പ്രഖ്യാപനം.ബിജെപിയെ നേരിടാന് മൂന്നാം മുന്നണി രൂപീകരിക്കുമെന്നായിരുന്നു ദേവഗൗഡയുടെ പ്രഖ്യാപനം. പ്രതിപക്ഷ ഐക്യനിരയുണ്ടാക്കി പ്രധാനമന്ത്രിയാകാമെന്ന രാഹുല്ഗാന്ധിയുടെ മോഹങ്ങള്ക്കേറ്റ കനത്ത തിരിച്ചടിയാണ് ദേവഗൗഡയുടെ വാക്കുകള്.
കഴിഞ്ഞ ദിവസം ന്യൂദല്ഹിയില് നടത്തിയ വാര്ത്താസമ്മേളനത്തിലാണ് ദേവഗൗഡ തന്റെ മനസ്സിലിരിപ്പ് തുറന്നത്. കര്ണാടകയില് കുമാരസ്വാമി മുഖ്യമന്ത്രിയായി സത്യപ്രതിജ്ഞ ചെയ്തപ്പോള് പങ്കെടുത്ത എന്ഡിഎ ഇതര ആറു പാര്ട്ടികളുടെ സഖ്യം 2019ലെ ലോക്സഭ തെരഞ്ഞെടുപ്പില് എല്ലാ സംസ്ഥാനങ്ങളിലും പ്രതീക്ഷിക്കേണ്ടെന്നാണ് ദേവഗൗഡ പറഞ്ഞത്.
തൃണമൂല് കോണ്ഗ്രസ്, ബിഎസ്പി, ആം ആദ്മി പാര്ട്ടി, സിപിഎം, ടിഡിപി പാര്ട്ടികളാണ് കര്ണാടകത്തിലെ ജെഡിഎസ്-കോണ്ഗ്രസ് സഖ്യസര്ക്കാരിന്റെ സത്യപ്രതിജ്ഞാ ചടങ്ങില് പങ്കെടുത്തത്. ഓരോ സംസ്ഥാനത്തും സ്വാധീനമുള്ള പാര്ട്ടികള്ക്ക് അവരുടേതായ നിലപാടുകള് ഉണ്ടാകും. അതിനാല് മൂന്നാം മുന്നണിയാകും ഫലപ്രദം.
കര്ണാടകത്തില് ചെറിയ പ്രശ്നങ്ങള് ഉണ്ടെങ്കിലും കോണ്ഗ്രസ്സുമായി ചേര്ന്ന് മത്സരിക്കും. എന്നാല് സീറ്റുകളില് ധാരണയില് എത്തിയിട്ടില്ല. കോണ്ഗ്രസ് 18, ജെഡിഎസ് 10 എന്ന് ചില കിംവദന്തികള് പ്രചരിക്കുന്നുണ്ട്. ഇക്കാര്യത്തില് ഇതുവരെ ഒരു ചര്ച്ചയും നടന്നിട്ടില്ല. കോണ്ഗ്രസ് അധ്യക്ഷന് രാഹുല്ഗാന്ധിയും കുമാരസ്വാമിയും തമ്മില് ചര്ച്ച ചെയ്ത് സീറ്റ് ധാരണയില് എത്തും.
ജെഡിഎസ്സിന് ലഭിക്കുന്നതില് ഒരു സീറ്റ് ബിഎസ്പിക്ക് നല്കും. പകരം ബിഎസ്പി ഉത്തര്പ്രദേശില് ഒരു സീറ്റ് നല്കണം. കേരളത്തില് എല്ഡിഎഫ് മുന്നണി ജെഡിഎസ്സിന് ഒരു സീറ്റ് നല്കണമെന്നും അദ്ദേഹം ആവശ്യപ്പെട്ടു.
ദേവഗൗഡയുടെ വാക്കുകളില് ഒരിക്കല്കൂടി പ്രധാനമന്ത്രിയാകാമെന്ന മോഹം ഒളിഞ്ഞിരിക്കുന്നു. രാഹുല്ഗാന്ധിയെ പ്രധാനമന്ത്രി സ്ഥാനാര്ഥിയായി അംഗീകരിക്കാന് ബംഗാള്, ആന്ധ്രപ്രദേശ്, തെലങ്കാന മുഖ്യമന്ത്രിമാരായ മമതാ ബാനര്ജി, ചന്ദ്രബാബു നായിഡു, ചന്ദ്രശേഖര റാവു എന്നിവര് തയ്യാറല്ല.
ഇതില് മമതാബാനര്ജിയും ചന്ദ്രശേഖര റാവുവും പ്രധാനമന്ത്രി മോഹം കൊണ്ടു നടക്കുന്നവരാണ്. എന്നാല് അഭിപ്രായ സമന്വയം ഉണ്ടാക്കുക സാധ്യമല്ല. അത്തരം ഒരു സാഹചര്യം വന്നാല് പൊതു സമ്മതന് എന്ന നിലയില് പ്രധാനമന്ത്രിയാകാമെന്നാണ് ദേവഗൗഡയുടെ പ്രതീക്ഷ. ആ ലക്ഷ്യവുമായാണ് ഇപ്പോള് മൂന്നാം മുന്നണി രൂപീകരണ ആശയവുമായി ദേവഗൗഡ രംഗത്തെത്തിയിരിക്കുന്നത്. 1996ലാണ് ഇതിന് മുന്പ് എച്ച്.ഡി. ദേവഗൗഡ പ്രധാനമന്ത്രിയായത്.
