ന്യൂദല്ഹി: യൂണിവേഴ്സിറ്റി ഗ്രാന്റ്സ് കമ്മീഷന്(യുജിസി) പിരിച്ചുവിട്ട് ഉന്നത വിദ്യാഭ്യാസ കമ്മീഷന് രൂപീകരിക്കാന് തീരുമാനം. കേന്ദ്രമാനവ വിഭവശേഷി മന്ത്രാലയം ഇതുസംബന്ധിച്ച കരട് നിയമം പ്രസിദ്ധീകരിച്ചു. പാര്ലമെന്റിന്റെ മണ്സൂണ് സമ്മേളനത്തിന്റെ അവസാന ആഴ്ചയില് ബില് സഭയില് അവതരിപ്പിക്കും.
ഉന്നത വിദ്യാഭ്യാസ കമ്മീഷന് ഓഫ് ഇന്ത്യ(യുജിസി ആക്ടിന് പകരം) നിയമം, 2018 എന്നാണ് കരട് ബില്ലിന് നല്കിയ പേര്. 1956ല് നിലവില് വന്ന യുജിസി നിയമത്തിന് പകരമാണിത്. പുതിയ ബില്ലില് ഭേദഗതികള് നിര്ദേശിക്കാന് കേന്ദ്രസര്ക്കാര് പൊതുജനങ്ങളോട് അഭ്യര്ഥിച്ചിട്ടുണ്ട്.
ജൂലായ് 7ന് മുമ്പായി വിദ്യാഭ്യാസ വിചക്ഷണരും മറ്റുള്ളവരും അവരുടെ നിര്ദ്ദേശങ്ങള് നല്കണം. പന്ത്രണ്ടംഗങ്ങളടങ്ങിയ ഉന്നത വിദ്യാഭ്യാസ കമ്മീഷനില് ചെയര്മാന്, വൈസ് ചെയര്മാന് എന്നിവരടക്കം കേന്ദ്രസര്ക്കാരാണ് നിയമിക്കുന്നത്.
ഉന്നത വിദ്യാഭ്യാസ, നൈപുണ്യ വികസന, ശാസ്ത്ര സാങ്കേതിക മന്ത്രാലയങ്ങളുടെ സെക്രട്ടറിമാര് സമിതി അംഗങ്ങളാകും. സാങ്കേതിക വിദ്യാഭ്യാസ, അധ്യാപക വിദ്യാഭ്യാസ കൗണ്സില് ചെയര്മാന്മാരും രണ്ട് സര്വകലാശാലകളിലെ വൈസ് ചാന്സലര്മാരും ഉന്നത വിദ്യാഭ്യാസ കമ്മീഷനിലെ അംഗങ്ങളാണ്.
സര്വകലാശാല വിദ്യാഭ്യാസത്തിന്റെ നിലവാരം ഉയര്ത്തുന്നതില് യുജിസി സമ്പൂര്ണ പരാജയമാണെന്നും പൂര്ണമായും പിന്വലിച്ച് പുതിയ സംവിധാനം കൊണ്ടുവരണമെന്നും മുന് യുജിസി ചെയര്മാന് ഹരി ഗൗതമിന്റെ നേതൃത്വത്തിലുള്ള പരിശോധനാ സമിതി 2015 മാര്ച്ചില് മാനവ വിഭവശേഷി മന്ത്രാലയത്തിന് റിപ്പോര്ട്ട് നല്കിയിരുന്നു.
എസ്. സന്ദീപ്
