മൂന്നാം നാള് ഉയിര്ത്തെഴുന്നേല്പ്. കുരിശുമരണം വിധിച്ച് പരിഹസിച്ചവര് ഇനിയും കാത്തിരിക്കേണ്ടി വരും. അത്രവേഗത്തില് കീഴടങ്ങുന്നതായിരുന്നില്ല അര്ജന്റീനയുടെ വീര്യം ….. വിപ്ളവ വെറിയുടെ ഇരമ്പിക്കയറ്റത്തില് ചോരയേറെ ഒഴുകിയ ആ പഴയ ലെനിന് ഗ്രാഡിലായിരുന്നു ഈ രാവ് പിടഞ്ഞുണര്ന്നത്. പകയുടെയും പോര്വിളിയുടെയും അടങ്ങാത്ത നിലവിളികളുടെയും ഇടയില് അനാഥമായിപ്പോയ നഗരജീവിതങ്ങള്ക്ക് മേല് പ്രാര്ത്ഥനയുടെ പെയ്ത്തായിരുന്നു പിന്നെയൊരു കാലം. പുനര്ജനി വിശുദ്ധ പത്രോസിന്റെ നാമധേയത്തില് … സെന്റ് പീറ്റേഴ്സ് ബര്ഗ് . … ലെനിനായാലും വിശുദ്ധ പീറ്ററായാലും വിശ്വാസികള്ക്ക് അവര് മിസിഹ തന്നെ. ഇന്നലെ രാത്രിയില് സെന്റ് പീറ്റേഴ്സ് ബര്ഗ് സ്റ്റേഡിയത്തില് ഉദിച്ച മിസിഹയ്ക്ക് പേര് മാര്ക്കസ് റോജോ എന്നായിരുന്നു. കളിയുടെ എണ്പത്താറാം മിനിട്ടിലായിരുന്നു ആ തിരുപ്പിറവി…. മര്ക്കാഡോയുടെ മൂര്ച്ചയുള്ള പാസിന് റോജോയുടെ ക്ളാസിക്കല് ഫിനിഷിങ് …. പിഴവുകളില്ലാത്ത തീര്പ്പ്. ഭൂമി കുലുങ്ങിയമരും പോലെ സ്റ്റേഡിയം ഇരമ്പിയാര്ത്തു. പ്രതീക്ഷകളുടെ അമിത ഭാരം കൊണ്ട് തളര്ന്നു പോയ പാവം ലയണല് മെസ്സി ആവേശത്തിന്റെ കുതിപ്പില് റോജോയുടെ തോളിലേറി ….കോച്ച് സാം പോളി ഉന്മാദം പൂണ്ടവനെപ്പോലെ ആര്ത്തുവിളിച്ചു. ആരാധക ലക്ഷങ്ങളുടെ നിറകണ്ചിരിയില് ലോകം നിറഞ്ഞു. പ്രാര്ത്ഥനകളും പ്രതീക്ഷകളും അര്ജന്റീനയുടെ മോഹങ്ങളും എല്ലാം എല്ലാം ചുമലേറ്റി മാര്ക്കസ് റോജോ….മരണത്തില് നിന്നാണ് റോ ജോ ഈ നാടിന്റെ വികാരങ്ങളെ മടക്കി വിളിച്ചത്. കാവല്ക്കോട്ടയിലെ കുന്തമുനയായിരുന്നു എന്നും റോജോ .. ഇപ്പോള് അര്ജന്റീനയുടെ സ്വപ്നങ്ങള്ക്ക് കാവല് നില്ക്കുന്നു….
കളി തുടങ്ങുമ്പോള് മെസിയും മൂസയുമായിരുന്നു കളത്തില് … പതിന്നാലാം മിനുട്ടില് ബനേഗയുടെ പാസില് മെസി കുതിച്ചപ്പോള് നയം വ്യക്തമായിരുന്നു. മെസിയുടെ ആ വരവ് ഗോളിന്റെ പെരുമഴക്കാലം തീര്ക്കുമെന്ന് കരുതിയവര്ക്ക് തെറ്റി. ആദ്യ പകുതിയിലെ നിറഞ്ഞാട്ടം അടുത്ത പകുതിയില് കണ്ടില്ല … ഹിഗ്വയിനും ബനേഗയും മുതല് മഷറാനോ വരെ ഒപ്പം കുതിച്ചിട്ടും മെസി ബാഴ്സയുടെ മെസിയായില്ല. അന്പത്തി മൂന്നാം മിനുട്ടില് വിക്ടര് മോസസ് പെനാല്ട്ടിയിലൂടെ അര്ജന്റീനയെ സമനിലക്കുരുക്കിലേക്ക് വലിച്ചിട്ടതോടെ മെസി തല കുമ്പിട്ടു. ചോര പുരണ്ട മഷറാനോയുടെ മുഖം , മഞ്ഞക്കാര്ഡില് വിളറിയ മെസി, ബെനേഗ ..മൂസയുടെയും എന് ടിനിയുടെയും മോസസിന്റെയും അതിവേഗ മുന്നേറ്റങ്ങള് അര്ജന്റീനയുടെ ഗോള് മുഖത്ത് മരണഭീതി വിതച്ചപ്പോഴൊക്കെ ലോകം മുഖം പൊത്തി. കളിയുടെ അവസാന യാമത്തില് പ്രതീക്ഷകള് നഷ്ടമായ ഗാലറിയൊന്നാകെ ഇസ്രയേലില് പിറന്ന രക്ഷകനിലേക്ക് കണ്പാര്ത്തു. കൈകള് മുകളിലേക്കുയര്ത്തി കണ്ണീര് പൊഴിച്ച് ….. നിശ്ശബ്ദതയുടെ ആഴങ്ങളില് നിന്ന് , നിരാശയുടെ ഇരുട്ടില് നിന്ന് വിജയത്തിന്റെ ഉന്മാദത്തിലേക്ക് ലോകം പിടഞ്ഞുണര്ന്ന നിമിഷങ്ങള് …. നൈജീരിയന് അതിമോഹങ്ങള്ക്ക് മാര്ക്കസ് റോജോ ചരമക്കുറിപ്പെഴുതി… മെസിക്കൊപ്പം ലോകവും അവന്റെ ചുമലേറി …. രാത്രിയുടെ കൂരിരുട്ടില് വിണ്ണിന്റെ കല്പലക മേല് ഉഷസിന്റെ കുറിമാനം പോല് റോജോ ദി റിയല് മിസിഹ….
