ന്യൂദല്ഹി: റഷ്യയില് അടുത്തമാസം ലോകകപ്പ് നടക്കാനിരിക്കെ സൂപ്പര് താരങ്ങളായ ക്രിസ്റ്റ്യാനോ റൊണാള്ഡോയേയും മെസ്സിയേയും വധിക്കുമെന്ന് ഐഎസിന്റെ ഭീഷണി. ഫുട്ബോള് ഗ്രൗണ്ടില് മെസ്സിയുടേയും റൊണാള്ഡോയുടേയും തല വെട്ടുന്ന ചിത്രം പുറത്തുവിട്ടാണ് ഐഎസിന്റെ ഭീഷണി.
നിങ്ങളുടെ രക്തം ഗ്രണ്ട് നിറയ്ക്കും എന്ന തലക്കെട്ടോടെയാണ് ചിത്രം പുറത്തുവന്നിരിക്കുന്നത്. നിറഞ്ഞ ഗ്യാലറിയെ സാക്ഷിനിര്ത്തിയാണ് കൃത്യം ചെയ്യുന്നത്. ഐഎസ് അനുകൂല ഗ്രൂപ്പ് ടെലഗ്രാം വഴിയാണ് ചിത്രം പുറത്തുവിട്ടിരിക്കുന്നത്.
ദിവസങ്ങള്ക്ക് മുന്പ് ലോകകപ്പ് ഫുട്ബോള് ലോഗോ കത്തികൊണ്ട് വെട്ടുന്നതായി കാണിച്ച് മറ്റൊരു ചിത്രവും പുറത്തിറങ്ങിയിരുന്നു. എല്ലാവരേയും കൊല്ലുക എന്നതായിരുന്നു തലക്കെട്ട്. ലോകമെങ്ങുമുള്ള ഐഎസ് ഭീകരരോട് ആയുധമെടുക്കാന് ആവശ്യപ്പെട്ടുകൊണ്ടായിരുന്നു ചിത്രം പുറത്തുവിട്ടത്.
സിറിയയില് ഐഎസിനെതിരെ റഷ്യ നടത്തിയ സൈനിക ഇടപെടലില് അയ്യായിരത്തോളം ഐഎസ് ഭീകരര് കൊല്ലപ്പെട്ടതായാണ് ഔദ്യോഗിക വിശദീകരണം. റഷ്യയില് നടക്കുന്ന ലോകകപ്പിനെതിരെ ഭീഷണി മുഴക്കാനുള്ള കാരണം ഇതാണെന്നാണ് നിരീക്ഷണം.
