ദുബായ്: അടുത്ത വര്ഷത്തെ എഎഫ്സി ഏഷ്യന് കപ്പ് ഫുട്ബോള് ടൂര്ണമെന്റിന്റെ നോക്കൗട്ട് ഘട്ടത്തില് കടക്കാന് ഇന്ത്യക്ക് കഴിയുമെന്ന് കോച്ച് സറ്റീഫന് കോണ്സ്റ്റന്റെയിന് പറഞ്ഞു.
യുണൈറ്റഡ് അറബ് എമിറേറ്റ്്സ്, തായ്ലന്ഡ്, ബഹറിന് എന്നിവരുള്പ്പെടുന്ന ഗ്രൂപ്പ് എയിലാണ് ഇന്ത്യ എഎഫ്സി ഏഷ്യന് കപ്പ് ടൂര്ണമെന്റില് മത്സരിക്കുക. ഈ ഗ്രൂപ്പില് നിന്ന് ഇന്ത്യക്ക് നോക്കൗട്ടില് കടക്കാനാകും. ഗ്രൂപ്പിലെ ടീമുകള് ശക്തമാണെങ്കിലും ചില ടീമുകളെ തോല്പ്പിക്കാന് ഇന്ത്യക്ക് കഴിയുമെന്ന് കോച്ച് വെളിപ്പെടുത്തി.
ഗ്രൂപ്പിലെ ടീമുകള് ഒന്നിനൊന്ന മെച്ചമാണ്. അതിനാല് വെല്ലുവിളി പ്രതീക്ഷിക്കാം. നല്ല തയ്യാറെടുപ്പോടെ കളിച്ചാല് ഈ ടീമുകളെ തോല്പ്പിക്കാനാകുമെന്ന് കോച്ച് പറഞ്ഞു.
2011 ലാണ് ഇന്ത്യ അവസാനമായി ഈ ടൂര്ണമെന്റില് കളിച്ചത്. അന്ന് ദക്ഷിണ കൊറിയ, ഓസ്ട്രേലിയ, ബഹറിന് ടീമുകളോട് ഇന്ത്യ തോറ്റു.
