കൊച്ചി: പോലീസ് സേനയിലേക്ക് ഓരോ വര്ഷവും നിയമനങ്ങള് നടക്കുന്നുണ്ടെങ്കിലും സ്റ്റേഷനുകളില് ആവശ്യത്തിന് ഉദ്യോഗസ്ഥരില്ല. ഉദ്യോഗസ്ഥ ക്ഷാമം മൂലം ക്രമസമാധാനപാലനവും കേസുകളുടെ അന്വേഷണവും താളം തെറ്റുന്നു.
സ്ത്രീകള്ക്കും കുട്ടികള്ക്കും എതിരെയുള്ള അതിക്രമങ്ങളും മറ്റു കുറ്റകൃത്യങ്ങളും വര്ദ്ധിച്ചിട്ടും പോലീസിന്റെ അംഗബലം ആനുപാതികമായി ഉയര്ത്തുന്നില്ല. പോലീസ് സ്റ്റേഷനുകളില് ഇന്നും നിലവിലുള്ളത് 25 വര്ഷം പഴക്കമുള്ള സ്റ്റാഫ് പാറ്റേണ് ആണ്. പുതിയ വകുപ്പുകള് അടിക്കടി സൃഷ്ടിക്കുമ്പോള് സേനയുടെ അംഗബലം കൂട്ടാന് മാറിമാറിവരുന്ന സര്ക്കാരുകള് വേണ്ടത്ര ഗൗരവം കാട്ടുന്നില്ല.
25 സിവില് പോലീസുകാര്, ഏഴ് സീനിയര് സിവില് പോലീസുകാര്, രണ്ട് എഎസ്ഐമാര്, ഒരു എസ്ഐ എന്നതാണ് സ്റ്റാഫ് പാറ്റേണ്. 1993ല് ആണ് ഇത് നിലവില് വന്നത്. എന്നാല് ഇപ്പോഴും ഈ അംഗബലം പല സ്റ്റേഷനുകളിലും ഇല്ല. 45-50 പൊലീസുകാരെങ്കിലും ഒരു സ്റ്റേഷനില് ഉണ്ടെങ്കിലേ കാര്യങ്ങള് ഭംഗിയായി നടക്കൂ.
സ്റ്റാഫ് പാറ്റേണ് നിലവില്വന്ന കാലത്ത് കേരളത്തിലെ ഒരു പോലീസ് സ്റ്റേഷനില് വര്ഷം ശരാശരി ഇരുന്നൂറു കേസുകളാണ് രജിസ്റ്റര് ചെയ്തിരുന്നത്. ഇപ്പോള് ആയിരത്തിലേറെ കേസുകള് ചെറിയ സ്റ്റേഷനുകളില്പ്പോലും പ്രതിവര്ഷം രേഖപ്പെടുത്തുന്നു. എറണാകുളം, കോഴിക്കോട്, തിരുവനന്തപുരം, കണ്ണൂര് ജില്ലകളിലെ പല സ്റ്റേഷനുകളിലും രണ്ടായിരത്തിന് മുകളിലാണിത്.
പോക്സോ നിയമം, ജനമൈത്രി പോലീസ്, സ്റ്റുഡന്റ് പോലീസ് കേഡറ്റ്സ്, സീനിയര് സിറ്റിസണ് ഹെല്പ്പ് ഡസ്ക്, വനിതാ ഹെല്പ്പ് ഡസ്ക് എന്നിവ നിലവില് വന്നതോടെ പോലീസിന്റെ ജോലിഭാരം ഇരട്ടിയായി.
സംസ്ഥാനത്തെ മുഴുവന് സ്റ്റേഷനുകളിലും ജനമൈത്രി നിലവില് വന്നിരുന്നെങ്കിലും പോലീസിലെ ആള്ക്ഷാമം നിമിത്തം പലയിടത്തും ഈ ജനകീയ സംവിധാനം നിര്ജ്ജീവമായ അവസ്ഥയിലാണ്.
എസ്പിസിക്കും വിനയായി ഉദ്യോഗസ്ഥ ക്ഷാമം
കൊച്ചി: സ്റ്റുഡന്റ് പോലീസ് കേഡറ്റ് (എസ്പിസി) സംവിധാനം ഭൂരിഭാഗം സ്കൂളുകളിലും നിലവിലുണ്ട്. വിദ്യാലയത്തില് നേരിട്ടെത്തി ആഴ്ചയില് രണ്ടുദിവസം കേഡറ്റുകള്ക്ക് ക്ലാസുകള് എടുക്കണം.
ഇതിന് നിയോഗിക്കപ്പെടുന്നതും പോലീസുകാരെയാണ്. ആള്ക്ഷാമം എസ്പിസിയുടെ പ്രവര്ത്തനങ്ങളെയും ബാധിക്കുന്നുണ്ട്.
സ്റ്റേഷനുകളില് നിന്നുള്ള പോലീസുകാരാണ് ഫ്ളൈയിങ് സ്ക്വാഡിലും ജോലി ചെയ്യുന്നത്. ഹൈവേ പോലീസിലും സ്ഥിതി വ്യത്യസ്തമല്ല. ചിലപ്പോള് എആര് ക്യാമ്പില് നിന്നുള്ള പോലീസുകാരെ ഹൈവേയില് നിയോഗിക്കാറുണ്ട്. 25 വര്ഷമെങ്കിലും ജോലി ചെയ്താലേ ഒരു സീനിയര് സിവില് പോലീസുകാരന് എഎസ്ഐ ആകുകയുള്ളൂ.
