മെക്സിക്കോ: 9000 വര്ഷം പഴക്കമുള്ള മനുഷ്യാവശിഷ്ടങ്ങള് കണ്ടെത്തി. മെക്സിക്കോവിലെ പ്രാചീന ഗുഹയില്നിന്നാണ് പുരാവസ്തു ഗവേഷകര്ക്ക് ഇത് ലഭിച്ചതെന്ന് വാര്ത്താ ഏജന്സി റൂയിട്ടര് റിപ്പോര്ട്ട് ചെയ്യുന്നു. ജന്തുക്കളുടെ അസ്ഥിയും മറ്റും കണ്ടെത്തിയവയില് പെടുന്നു. ഹിമയുഗത്തിലും മനുഷ്യ സാന്നിദ്ധ്യം തെളിയിക്കുന്ന നിര്ണ്ണായക ശാസ്ത്രീയ കണ്ടെത്തല് പല പൂര്വ്വ വിശ്വാസങ്ങള്ക്കും അടിത്തറയായി മാറും.
വന് വെള്ളപ്പൊക്കത്തില് മുങ്ങിപ്പോയ ഗുഹയില് ഒരു കൂട്ടം ഗവേഷകര് നടത്തിയ മുങ്ങിത്തപ്പല് ഗവേഷണത്തിലാണ് കിഴിക്കന് മെക്സിക്കോയിലെ സാക് ആക്ടണില് ഈ കണ്ടെത്തല്. മനുഷ്യ ശരീരത്തിന്റെ അവശിഷ്ടം, ആനയുടെ അസ്ഥി, പ്രത്യേക ഇനം കരടി, തേവാങ്ക് തുടങ്ങിയവയുടെ ശരീരാവശിഷ്ടങ്ങള് തുടങ്ങിയവ കണ്ടെത്തിയവയില് പെടുന്നുവെന്ന് മെക്സിക്കയുടെ സാംസ്കാരിക മന്ത്രാലയം അറയിച്ചു.
പ്ലീസ്റ്റോസീന് കാലം എന്ന് വിളിക്കപ്പെടുന്ന, 26 ലക്ഷം വര്ഷങ്ങള് മുതല് 11,700 വര്ഷം മുമ്പുവരെ നിലനിന്നിരുന്ന കാലത്തെ ജീവികളുടെ അവശിഷ്ടങ്ങളാണ് ഇതെന്ന് കരുതുന്നുവെന്ന് ഗവേഷകര് പറയുന്നു. മായന് നാഗരികതയിലേക്ക് കൂടുതല് വെളിച്ചം വീശുന്നതാണ് ഈ കണ്ടെത്തയെന്ന് കരുതപ്പെടുന്നു. ജലാന്തര്ഭാഗത്ത് നടത്തിയ ഗവേഷണങ്ങളില് ഏറ്റവും പഴയതും ഏറെ പ്രധാനപ്പെട്ടതുമായ കണ്ടെത്തലാണിതെന്ന് മെക്സിക്കോ നരവംശശാസ്ത്ര പഠന ഗവേഷണ കേന്ദ്രത്തിലെ ഗവേഷകന് ഗ്വില്ലേര്മോ ദെ ആന്ദാ പറഞ്ഞു.
