കോട്ടയം: പുതിയ കാലഘട്ടത്തില് സനാതനധര്മ്മത്തിന് നേരെ ചിലര് തോക്ക് ചൂണ്ടുകയാണെന്ന് തിരുവിതാംകൂര് രാജകുടുംബാംഗം അശ്വതിതിരുനാള് ഗൗരിലക്ഷ്മിബായി അഭിപ്രായപ്പെട്ടു. ഭാഗവതഹംസം മള്ളിയൂര് ശങ്കരന് നമ്പൂതിരിയുടെ 97-ാം ജയന്തി സമ്മേളനം ഉദ്ഘാടനം ചെയ്യുകയായിരുന്നു അവര്.
ഈ വര്ഷത്തെ മള്ളിയൂര് ശങ്കരസ്മൃതി പുരസ്കാരം മഹാകവി അക്കിത്തം അച്യുതന് നമ്പൂതിരിക്ക് ഗൗരിലക്ഷ്മീബായി സമ്മാനിച്ചു. പ്രായാധിക്യം മൂലം അദ്ദേഹത്തിന് ചടങ്ങില് എത്താന് കഴിയാതിരുന്നതിനാല് മകന് അക്കിത്തം നാരായണന് നമ്പൂതിരിയാണ് അവാര്ഡ് ഏറ്റുവാങ്ങിയത്. പുരസ്കാരത്തിന് തന്നെ തെരഞ്ഞെടുത്തതിന് നന്ദി പറഞ്ഞുള്ള അക്കിത്തത്തിന്റെ സന്ദേശം ചടങ്ങില് വായിച്ചു.
ബിജെപി സംസ്ഥാന പ്രസിഡന്റ് കുമ്മനം രാജശേഖരന് അദ്ധ്യക്ഷനായി. ചിന്മയമിഷനിലെ സ്വാമി ശാരദാനന്ദ, ബദരീനാഥ് റാവല് ഈശ്വരപ്രസാദ് നമ്പൂതിരി എന്നിവര് അനുഗ്രഹ പ്രഭാഷണം നടത്തി. മളളിയൂരിന്റെ ജീവചരിത്രം വരച്ച് കാട്ടുന്ന ചുവര്ചിത്രങ്ങളായ ‘ശ്രീശങ്കരത്തിന്റെ’ ഉദ്ഘാടനം പതഞ്ജലി യോഗ സെന്റര് യുവഭാരത് കേന്ദ്രീയ പ്രധാനി സച്ചിന് നിര്വഹിച്ചു.
ഭാഗവതകളഹംസം വെണ്മണി കൃഷ്ണന് നമ്പൂതിരിയെ സ്വാമി ശാരാദാനന്ദ ആദരിച്ചു. മള്ളിയൂര് പരമേശ്വരന് നമ്പൂതിരി, മള്ളിയൂര് ദിവാകരന് നമ്പൂതിരി, ബിജെപി ജില്ലാ പ്രസിഡന്റ് എന്.ഹരി, മാഞ്ഞൂര് പഞ്ചായത്ത് പ്രസിഡന്റ് എന്.ബി. ജോണ് തുടങ്ങിയവര് പങ്കെടുത്തു.
