മണ്ണാര്ക്കാട്(പാലക്കാട്): ജനസംഘത്തിന്റെയും ബിജെപിയുടേയും സംസ്ഥാനത്തെ ആദ്യകാല നേതാവും ഗ്രന്ഥകാരനുമായ മുക്കണ്ണം ഒരുവന്നൂര് പാഴൂര് മന വാസുദേവന് നമ്പൂതിരിപ്പാട് (ഒപിവി നമ്പൂതിരിപ്പാട് – 86) അന്തരിച്ചു. വാര്ദ്ധക്യ സഹജമായ അസുഖത്തെത്തുടര്ന്ന് ചികിത്സയിലായിരുന്നു. ഇന്നലെ വൈകിട്ട് മൂന്ന് മണിയോടെ ദേഹാസ്വാസ്ഥ്യം അനുഭവപ്പെട്ട് സ്വകാര്യ ആശുപത്രിയിലേക്ക് കൊണ്ടുപോകുന്ന വഴിക്കായിരുന്നു അന്ത്യം.
ഏഴ് പതിറ്റാണ്ട് കാലം സംഘപരിവാര് പ്രസ്ഥാനത്തിന് വേണ്ടി കര്മ്മനിരതമായിരുന്നു നമ്പൂതിരിപ്പാടിന്റെ ജീവിതം. ബിജെപി മണ്ണാര്ക്കാട് മണ്ഡലം പ്രസിഡന്റ്, ജില്ലാ വൈസ് പ്രസിഡന്റ്, സംസ്ഥാന ഖജാന്ജി, ഭാരതീയ ജനസംഘത്തിന്റെ ജില്ലാ പ്രസിഡന്റ്, സംസ്ഥാന സമിതിയംഗം എന്നീ നിലകളില് അദ്ദേഹം പ്രവര്ത്തിച്ചിട്ടുണ്ട്.
അടിയന്തരാവസ്ഥയ്ക്കെതിരെ നടന്ന പ്രക്ഷോഭത്തില് ഭാര്യയ്ക്കും മൂന്ന് വയസ്സുകാരിയായ മകള്ക്കുമൊപ്പം മാസങ്ങളോളം ജയില്വാസം അനുഷ്ഠിച്ചു.
ആര്എസ്എസിലൂടെയാണ് അദ്ദേഹം പൊതുപ്രവര്ത്തനം തുടങ്ങിയത്. പി. പരമേശ്വരന്, ഒ. രാജഗോപാല്, ടി.എന്. ഭരതന്, കെ.ജി. മാരാര്, കെ. രാമന്പിള്ള, എം. ദേവകി അമ്മ എന്നിവരോടൊപ്പം കേരളത്തില് ഭാരതീയ ജനസംഘത്തേയും ബിജെപിയേയും കെട്ടിപ്പടുക്കാന് പ്രവര്ത്തിച്ചു. അധ്യാത്മരാമായണവും ഭഗവദ്ഗീതയും ഒപിവി മലയാളത്തിലേക്ക് വൃത്താനുവൃത്തം വിവര്ത്തനം ചെയ്തിട്ടുണ്ട്.
ഭാര്യ: കണ്ണന്നൂര് തൃക്കഴിപ്പുറത്തുമന ശ്രീദേവി അന്തര്ജനം. മക്കള്: സാവിത്രി (ചെന്നൈ), നാരായണന് (ശബരി ഹൈസ്കൂള് പള്ളിക്കുറുപ്പ്), പ്രൊഫ. പരമേശ്വരന് (ചണ്ഡീഗഡ് ഗവ. വിമണ്സ് കോളേജ്), ജയശ്രീ (റിയാദ്), വാസുദേവനുണ്ണി (ഹീറോ ഷോറൂം, കോങ്ങാട്). മരുമക്കള്: ശശികുമാര്, രശ്മി (അധ്യാപിക), പാര്വ്വതി (അധ്യാപിക), പ്രമോദ്.
ഒപിവിയുടെ നിര്യാണത്തില് മുന് കേന്ദ്രമന്ത്രി ഒ.രാജഗോപാല് എംഎല്എ അനുശോചിച്ചു.
പൊതുപ്രവര്ത്തനത്തില് തന്റെ സഹപ്രവര്ത്തകനും, ഉപദേശിയും, ഗുരുവുമായിരുന്നു ഒ.പി.വി നമ്പൂതിരിപ്പാടെന്ന് അദ്ദേഹം അനുസ്മരിച്ചു. അദ്ദേഹത്തിന്റെ ലളിതമായ ജീവിതരീതിയും, ഏത് സാഹചര്യത്തെയും നേരിടുവാനുള്ള മനക്കരുത്തും മാതൃകാപരമാണെന്നും ഒ.രാജഗോപാല് പറഞ്ഞു. സംസ്കാരം ഇന്ന് രാവിലെ 10 മണിക്ക് വീട്ടുവളപ്പില്.
