തോപ്രാംകുടി: തോപ്രാംകുടി സബ്ബ് രജിസ്ട്രാറാഫീസിന് രണ്ട് വര്ഷം മുമ്പ് സ്വകാര്യ വ്യക്തി സൗജന്യമായി സ്ഥലം നല്കിയിരുന്നുവെങ്കിലും അനധികൃതരുടെ അനാസ്ഥ മൂലം ഇതുവരെ സ്ഥലം കൈമാറായില്ല. രജിസ്ട്രേഷന് വകുപ്പിന് സംസ്ഥാനത്ത് 48 ഓഫീസുകള്ക്ക് പുതിയ കെട്ടിടം പണിയാന് ഈ വര്ഷം തുക അനുവദിച്ചിട്ടുണ്ട്. തോപ്രാംകുടി സബ്ബ് രജിസ്ട്രാറാഫീസിനും തുക അനുവദിച്ചിട്ടുണ്ടെങ്കിലും സ്ഥലം വകുപ്പിന് കൈമാറാത്തതിനാല് കെട്ടിടം പണി നടക്കുമോ എന്ന് പൊതുജനങ്ങള്ക്ക് ആശങ്കയുണ്ട്.
ഇപ്പോള് താല്ക്കാലിക കെട്ടിത്തില് പ്രവര്ത്തിക്കുന്ന ഓഫീസിന്റെ കാലാവധി അടുത്ത വര്ഷം തീരുകയാണ്. അടിസ്ഥാന സൗകര്യങ്ങള് ഇപ്പോഴും ഈ ഓഫീസിലില്ല. ആധാര പകര്പ്പുകള് തയ്യാറാക്കുന്നതിനുള്ള ഡിജിറ്റല് ഇമേജ് പ്രിന്റര് ഇതുവരെ അനുവദിച്ചിട്ടില്ല. അതുകൊണ്ട് പകര്പ്പുകള് കൈകൊണ്ടെഴുതി കൊടുക്കുന്നതിനാല് കാലതാമസമുണ്ടാകുന്നു. കമ്പ്യൂട്ടര് സംവിധാനം നടപ്പിലാക്കാന് താമസിച്ചതുകൊണ്ട് ബാധ്യതാ സര്ട്ടിഫിക്കറ്റുകളുടെ അവസ്ഥയും ഇതുതന്നെ.
മകളിലത്തെ നിലയില് പ്രവര്ത്തിക്കുന്ന ഈ ഓഫീസില് ഇടുങ്ങിയ വഴിയിലൂടെ പ്രായമായവര്ക്കും അസുഖ ബാധിതര്ക്കും കയറിച്ചെല്ലാന് ബുദ്ധിമുട്ടാണെന്ന പരാതി നിലനില്ക്കുകയാണ്. സര്ക്കാര് തീരുമാനം വൈകുന്നതാണ് സ്ഥലമേറ്റെടുപ്പിന് തടസമെന്നാണ് വിവരം.
