ബീജിംഗ്: കുപ്രസിദ്ധമായ ടിയാനന്മെന് സ്ക്വയര് പ്രക്ഷോഭത്തില് കൊല്ലപ്പെട്ടത് 10,000ലധികം പേരെന്ന് പുതിയ വെളിപ്പെടുത്തല്. ബ്രിട്ടീഷ് അംബാസഡര് അലന് ഡൊണാള്ഡ് ടെലഗ്രാം പത്രത്തിലെഴുതിയ ലേഖനത്തിലാണ് ഇക്കാര്യം വെളിപ്പെടുത്തിയത്.
ബ്രിട്ടനിലെ ദേശീയ പുരാരേഖ വകുപ്പില് ഇതിനു തെളിവുകളുണ്ടെന്നും അലന് ചൂണ്ടിക്കാണിക്കുന്നു. 28 വര്ഷം മുമ്പ് നടന്ന രക്തച്ചൊരിച്ചിലിനെ കുറിച്ചാണ് ഫ്രാന്സ് പ്രസ് ഏജന്സി പുറത്തു വിട്ടിരിക്കുന്നത്. വിപ്ലവത്തില് സൈനിക ഉദ്യോഗസ്ഥരുള്പ്പെടെ 200 പേര് മരിച്ചെന്നായിരുന്നു ഭരണകൂടം പുറത്തുവിട്ട വിവരം. എന്നാല് ആയിരക്കണക്കിനു പേരാണ് മരിച്ചിരുന്നതെന്ന് ചൈനീസ് സപ്പോര്ട്ട് നെറ്റ് വര്ക്ക് അന്നേ വ്യക്തമാക്കിയിരുന്നു.
1989ല് ഡെങ് സിയാവോയുടെ ഭരണപരിഷ്കാരങ്ങള്ക്കെതിരെ ജനാധിപത്യം സ്ഥാപിക്കണമെന്നാവശ്യപ്പെട്ട് ടിയാനന്മെന് സ്ക്വയറില് ഒത്തുകൂടിയ വിദ്യാര്ത്ഥികളെ ഭരണകൂടം രക്തച്ചൊരിച്ചിലിലൂടെ അടിച്ചമര്ത്തുകയാണ് ചെയ്തത്. യു.എസ് അനുബന്ധ രേഖകളും ഇക്കാര്യം ശരിവയ്ക്കുന്നെന്ന് ഹോങ്് കോങ് ബാപിസ്റ്റ് യൂണിവേഴ്സിറ്റി പ്രൊഫസറായ ജീന് പിയറി സാക്ഷ്യപ്പെടുത്തുന്നു.
വിദ്യാര്ത്ഥികള് ഉള്പ്പെടെ ടീയാനന്മെന് സ്ക്വയറില് കൂടിയവര്ക്ക് പുറത്തു കടക്കാന് സമയം നല്കുന്നതിനു മുമ്പേ യുദ്ധടാങ്കറുകള് ഓടിച്ചു കയറ്റി. സ്ക്വയറിലേക്ക് യുദ്ധടാങ്കറുകളുടെ വരവ് കണ്ടതോടെ ഏതുനിമിഷവും ആക്രമിക്കപ്പെടുമെന്ന് ഏവരും കണക്കുകൂട്ടിയിരുന്നു. എന്നാല് അഞ്ചു മിനിറ്റു തികയുന്നതിനു മുമ്പേ അടിച്ചമര്ത്തല് ആരംഭിച്ചുവെന്നും അംബാസഡര് അലന് ടെലഗ്രാമില് എഴുതിയ ലേഖനത്തില് പറയുന്നു. അടുത്തിടെ വരെ അടിച്ചമര്ത്തല് സംബന്ധിച്ച വാര്ത്തകളോ, പടങ്ങളോ നല്കാന് ചൈനീസ് ഭരണകൂടം അനുവാദം നല്കിയിരുന്നില്ല. അടുത്തകാലം വരെ ടെക്സ്റ്റ് ബുക്കുകളിലോ ഇന്റര്നെറ്റിലോ വിവരം നല്കുന്നതിനും വിലക്കുണ്ടായിരുന്നു.
