തലശ്ശേരി: കൊലപാതക രാഷ്ട്രീയത്തിനെതിരെ ജനവികാരം ഉയര്ന്നപ്പോള് കൊല്ലാക്കൊല രാഷ്ടീയമാണ് സിപിഎം ഇപ്പോള് നടത്തി വരുന്നതെന്ന് ബിജെപി സംസ്ഥാന പ്രസിഡന്റ് കുമ്മനം രാജശേഖരന് പറഞ്ഞു. മാലൂര് ശിവപുരത്ത് വച്ച് സിപിഎം അക്രമത്തില് പരിക്കേറ്റ ബിജെപി നേതാക്കളെ തലശ്ശേരി ഇന്ദിരാഗാന്ധി സഹകരണ ആശുപത്രിയില് സന്ദര്ശിച്ചശേഷം മാധ്യമപ്രവര്ത്തകരോട് സംസാരിക്കുകയായിരുന്നു അദ്ദേഹം
ബിജെപി മട്ടന്നൂര് മണ്ഡലം പ്രസിഡണ്ട് രാജന് പുതുക്കുടി, മോഹനന്, അനീഷ് നീര്വ്വേലി, പി.ഗംഗാധരന്, പി.സുനില്കുമാര്, എന്നിവരാണ് ചികില്സയിലുള്ളത്. സംഭവത്തെക്കുറിച്ച് ഇവരില് നിന്നും ചോദിച്ചറിഞ്ഞ കുമ്മനം രാജശേഖരന് രൂക്ഷമായ ഭാഷയിലാണ് സിപിഎമ്മിനെയും മുഖ്യമന്ത്രിയേയും വിമര്ശിച്ചത്.
പ്രതികരിക്കുന്നവരെ നിശബ്ദരാക്കുന്ന നടപടിയാണ് ജേക്കബ് തോമസിന്റെ കാര്യത്തില് മുഖ്യമന്ത്രി കൈക്കൊണ്ടത്. സത്യംപറയുന്നവരെ ശിക്ഷിക്കുകയും കുറ്റവാളികളെ രക്ഷിക്കുകയും ചെയ്യുന്ന നയമാണ് മുഖ്യമന്ത്രിയുടേതെന്നും കുമ്മനം ചൂണ്ടിക്കാട്ടി.
മാലൂരില് നേതാക്കളെ മൃഗീയമായി അക്രമിച്ച സംഭവത്തില് മുഖ്യമന്ത്രി മറുപടി പറയണമെന്നും മാര്ക്സിസ്റ്റ് ധാര്ഷ്ട്യത്തിന് മുന്നില് മുട്ടുമടക്കുന്ന പ്രശ്നമില്ലെന്നും കുമ്മനം പറഞ്ഞു. രാഷ്ടീയ പ്രതിയോഗികളുടെ കയ്യും കാലും തല്ലിയും വെട്ടിയും തകര്ത്ത് കൊല്ലാതെ കൊന്ന് ജീവിതകാലം മുഴുവന് ജീവഛവങ്ങളാക്കുന്ന രീതിയാണ് ഇപ്പോള് സിപിഎം നടത്തിക്കൊണ്ടിരിക്കുന്നത്. അക്രമത്തോടൊപ്പം കൊള്ളയും തുടങ്ങിയിരിക്കുന്നു. മാലൂരില് അക്രമിക്കപ്പെട്ടവരുടെ സ്വര്ണ്ണമാലയും പണവും മൊബൈല് ഫോണും കൊള്ളയടിച്ചിരിക്കുന്നു.
സിപിഎം ഇതേ രീതിയില് അക്രമം തുടര്ന്നാല് ബിജെപി ശക്തമായി പ്രതികരിക്കുമെന്നും കുമ്മനം മുന്നറിയിപ്പ് നല്കി. ബിജെപി നേതാക്കളായ പി.സത്യപ്രകാശ്, അഡ്വ.ബി.ഗോപാലകൃഷ്ണന്, അഡ്വ.വി.രത്നാകരന്, വിജയന് വട്ടിപ്രം എന്.ഹരിദാസ് തുടങ്ങിയവരും കൂടെയുണ്ടായിരുന്നു.
