കണ്ണൂര്: കണ്ണൂരില് കെഎസ്ആര്ടിസി ജീവനക്കാരുടെ വാട്സ്ാപ് ഗ്രൂപ്പില് പ്രധാനമന്ത്രി നരേന്ദ്രമോദിയെയും യോഗി ആദിത്യനാഥ് ഉള്പ്പടെയുള്ള ബിജെപി മുഖ്യമന്ത്രിമാരെയും അമിത് ഷായെയും നായയായി ചിത്രീകരിച്ച് വീഡിയോ.
കേരളാ ട്രാവല്സിലാണ് രാജ്യത്തെ പ്രധാന നേതാക്കളെ നായയായി ചിത്രീകരിക്കുന്ന രീതിയിലുള്ള വീഡിയോ പോസ്റ്റ് ചെയ്തിരിക്കുന്നത്. ഒരു കൂട്ടം നായകളെ നിര്ത്തി നേതാക്കളുടെ പേര് വിളിക്കുമ്പോള് നടന്ന് പോകുന്ന രീതിയിലാണ് വീഡിയോ ചിത്രീകരിച്ചിരിക്കുന്നത്. ആദ്യം നരേന്ദ്രമോദിയെന്ന പേര് വിളിക്കുമ്പോള് ഒരു നായ നടന്ന് പോകുന്നു. തുടര്ന്ന് ഓരോ നേതാക്കളുടെയും പേര് വിളിക്കുകയാണ്.
ഏകദേശം ഒരു മിനുട്ടോളമുള്ളതാണ് വീഡിയോ. കണ്ണൂര് കെഎസ്ആര്ടിസി ഡിപ്പോയിലെ കണ്ട്രോളിങ് ഇന്സ്പെക്റ്റര് സജിത് സദാനന്ദനാണ് ഗ്രൂപ്പില് വീഡിയോ പോസ്റ്റ് ചെയ്തിരിക്കുന്നത്. കെഎസ്ആര്ടിസി ജീവനക്കാരനായ ബിനീഷ് എന്നയാളാണ് ഗ്രൂപ്പ് അഡ്മിന്. പോസ്റ്റിന് ശേഷം ഇതിനെ അനുകൂലിച്ചും പ്രതികൂലിച്ചും കമന്റുകളുണ്ട്. ‘ബഹുമാനപ്പെട്ട മുഖ്യമന്ത്രിയെ സോഷ്യല് മീഡിയയിലൂടെ അപമാനിച്ച പല സംഭവങ്ങളും നമ്മള് വായിച്ചറിഞ്ഞിരിക്കുന്നു. അത്തരക്കാരുടെ അറസ്റ്റും കണ്ടു.
നമ്മള് വായിച്ചറിഞ്ഞ അത്തരം പോസ്റ്റുകളെക്കാള് വളരെ ഗൗരവമേറിയതല്ലേ ഈ വീഡിയോ’ എന്നാണ് ഒരു കമന്റ്. കേരളത്തിലെ നേതാക്കളെ പേരെടുത്ത് വിളിക്കാത്തതിനാല് എവിടെ കുമ്മനവും കണ്ണന്താനവുമെന്നും ഒരാള് ചോദിക്കുന്നുണ്ട്. ഇതില് കേരളത്തിലെ നേതാക്കന്മാരുടെ പേര് പറഞ്ഞിരുന്നുവെങ്കില് ആറുമാസത്തേക്ക് ചോറ് ഉറച്ചേനെ എന്ന് ഒരാള് പറയുമ്പോള് പോസ്റ്റിനെ വിമര്ശിച്ച് വിപിന്ചന്ദ് എന്നയാള് അയച്ച കഷ്ടം എന്ന പോസ്റ്റും കാണാം.
