കോട്ടയം: സംസ്ഥാന മത്സ്യമായി അംഗീകരിക്കപ്പെട്ട കുമരകം കരിമീനിന്റെ ലഭ്യതക്കുറവ് മുതലാക്കി ആന്ധ്രാ, ഗുജറാത്ത് സംസ്ഥാനങ്ങളില് നിന്നുള്ള കരിമീന് കേരള വിപണി കീഴടക്കുന്നു. വേമ്പനാട് കായലില് നിന്ന് ലഭിക്കുന്ന കരിമീനാണ് കുമരകം കരിമീന് എന്നറിയപ്പെടുന്നത്.
കായല് മാലിന്യശേഖരണ കേന്ദ്രമായി മാറിയതോടെയാണ് കരിമീന് ലഭ്യതയില് ഈ വന്കുറവ് അനുഭവപ്പെട്ടത്. ഈ സന്ദര്ഭം പരമാവധി മുതലാക്കുകയാണ് ആന്ധ്രാ കരിമീന് എത്തിച്ച് വ്യാപാരികള്. കുറഞ്ഞ വിലയ്ക്ക് ലഭിക്കുന്ന ആന്ധ്ര കരിമീന്, ഗ്രേഡ് അനുസരിച്ച് വില ലഭ്യമാകുന്ന ഗുണമേന്മയുള്ള കുമരകം കരിമീനിന്റെ വിലയ്ക്ക് സമാനമായിട്ടാണ് വിറ്റഴിക്കപ്പെടുന്നത്. ക്രിസ്തുമസ്, പുതുവത്സര ദിനങ്ങള് അടുത്തെത്തിയതോടെ ആവശ്യക്കാര് ഏറെയാണ്. കരിമീന് തേടിയെത്തുന്നവര് എവിടെ നിന്നുള്ള കരിമീനാണെന്ന് അന്വേഷിക്കാറുമില്ല. ഇത് വ്യാപാരത്തിന് സഹായകമാവുന്നു.
മലയാളികള്ക്ക് ഏറെ പ്രിയമായ നാടന് കരിമീന് മുന് വര്ഷങ്ങളില് വേമ്പനാട് കായലില് നിന്ന് സുലഭമായി ലഭിച്ചിരുന്നെങ്കിലും ഈ വര്ഷം ലഭ്യത കുറഞ്ഞു. മുന്പു പ്രതിദിനം 2500 മുതല് 3000 കിലോ കരിമീന് വേമ്പനാട്ടുകായലില് നിന്നു മാത്രം കുമരകത്തു ലഭിച്ചിരുന്നിടത്ത് ഇന്നു കിട്ടുന്നത് ആയിരം കിലോയില് താഴെ മാത്രമാണന്ന് മത്സ്യ തൊഴിലാളികള് പറയുന്നു.
വിദേശികളടക്കമുള്ള വിനോദ സഞ്ചാരികള് ധാരാളമായത്തുന്ന ഹൗസ് ബോട്ടുകളിലും, റിസോര്ട്ടുകള് ഉള്പ്പടെയുള്ള സ്ഥാപനങ്ങളിലും പ്രധാന ഭക്ഷണ ഇനം കരിമീന് ആണ്. എന്നാല് ലഭ്യത കുറഞ്ഞതോടെ കുറവു നികത്താന് ആന്ധ്രാ, ഗുജറാത്ത് സംസ്ഥാനങ്ങളില് നിന്ന് ടണ് കണക്കിന് കരിമീനാണ് ഇടനിലക്കാരിലൂടെ എത്തിക്കുന്നത്. പരമാവധി 250 രൂപയ്ക്ക് ഇവിടങ്ങളില് ലഭിക്കുന്ന ഇത്തരം കരിമീന് 500 രുപക്കു മുകളില് വിലയിട്ടാണ് കച്ചവടം പൊടിപൊടിക്കുന്നത്. ക്രിസ്തുമസ് വിപണി ലഷ്യമാക്കിയാണ് കരിമീന് ഇറക്കുമതി ചെയ്യുന്നത്. രൂപത്തില് ഒരുപോലെ ഇരിക്കുന്നതിനാല് നാട്ടിലേയും മറ്റ്സംസ്ഥാനങ്ങളിലേയും കരിമീന് തിരിച്ചറിയാന് കഴിയാത്തതും ഉപഭോക്താക്കളെ ആശയക്കുഴപ്പത്തിലാക്കുന്നുണ്ട്.
കോട്ടയം വെസ്റ്റ് ഉള്നാടന് മത്സ്യതൊഴിലാളി സഹകരണ സംഘത്തിന്റെ കുമരകത്തെ വില്പന കേന്ദ്രങ്ങളില് കഴിഞ്ഞ ദിവസം മുതല് കരിമീനിന് വില വര്ദ്ധിപ്പിച്ചിരുന്നു. മീന്റെ തൂക്കമനുസരിച്ചു കരിമീന് എ പ്ലസിന് 500, എ 480, ബി 400 എന്നിങ്ങനെയാണ് പുതുക്കിയ വില. ഇതിലെ എ പ്ലസ് വിലയാണ് മറ്റ് സംസ്ഥാനങ്ങളില് നിന്ന് എത്തിക്കുന്ന കരിമീനിന് ഈടാക്കുന്നത്.
വിശേഷ ദിവസങ്ങള് പ്രമാണിച്ചു കുമരകത്തെ വിപണന കേന്ദ്രങ്ങളില് മുന്കൂട്ടി കരിമീന് ബുക്കു ചെയ്തവര്ക്ക് മീന് കൊടുക്കാന് കഴിയുമോ എന്ന ആശങ്കയുമുണ്ട് മത്സ്യ വ്യാപാരികള്ക്ക്.
ഓഖി ദുരന്തത്തെ തുടര്ന്ന് തീരദേശ മത്സ്യത്തൊഴിലാളികള് കടലില് കാര്യമായി പോയിത്തുടങ്ങാത്തതിനാല് കടല് മീനുകള്ക്കും വില കുതിച്ചുയരുകയാണ്.
