മട്ടന്നൂര്: മാവേലി സ്റ്റോറുകളില് നിന്ന് അനുവദനീയമായ അളവില്കൂടുതല് ഭക്ഷ്യധാന്യങ്ങള് റേഷന് കാര്ഡ് മുഖേന ജനങ്ങള്ക്കു വിതരണം ചെയ്തതിന്റെ പേരില് ജീവനക്കാരില് നിന്നു പിഴയീടാക്കുന്നതിനെതിരെ സപ്ലൈകോ തലശ്ശേരി ഡിപ്പോയിലെ ഔട്ട്ലെറ്റ് ജീവനക്കാര് പ്രതിഷേധിച്ചു. സപ്ലൈകോ ഐക്യവേദിയുടെ നേതൃത്വത്തിലാണ് പ്രതിഷേധ കൂട്ടായ്മ സംഘടിപ്പിച്ചത്.
2014 ഏപ്രില് മുതല് 2016 ഫെബ്രുവരി വരെ വിതരണം സബ്സിഡി സാധനങ്ങളുടെ കണക്കിലാണ് ജീവനക്കാര്ക്കെതിരെ നടപടി വരുന്നത്. ആ കാലയളവില് റേഷന് കാര്ഡ് പരിഷ്കരിക്കാത്തതും മാവേലി സ്റ്റോറുകളിലെ കമ്പ്യൂട്ടര് സോഫ്റ്റ് വെയര് അപാകതയും കാരണമാണ് ചില കാര്ഡ് ഉടമകള്ക്കു അനുവദനീയമായ അളവിലും കൂടുതല് സാധനങ്ങള് വിതരണം ചെയ്തതെന്നും ജീവനക്കാരെ ബലിയാടാക്കുന്നതു ന്യായീകരിക്കാനാവില്ലെന്നും സപ്ലൈകോ ഐക്യവേദി ചൂണ്ടിക്കാട്ടുന്നു. പ്രതിഷേധ കൂട്ടായ്മയില് കെ.ഹരീന്ദ്രന്, സി.കെ.ധര്മരാജന്, എം.പി.സുനില്കുമാര്, വി.കെ.നിസാര്, ടി.എന്.സജീവന് എന്നിവര് പ്രസംഗിച്ചു.
