ഗയ: സഹോദരന്റെ വിധവയെ വീട്ടുകാരുടെ സമ്മര്ദത്തെത്തുടര്ന്ന് വിവാഹം കഴിക്കേണ്ടി വന്ന പതിനഞ്ചു വയസുകാരന് ആത്മഹത്യ ചെയ്തു. ബീഹാറിലെ ഗയ ജില്ലയിലാണ് ദാരുണമായ സംഭവം.
ഗയയില് നിന്ന് 15 കിലോമീറ്റര് അകലെയുള്ള വിനോബാ നഗറിനടുത്തുള്ള പരായിയ സര്ക്കാര് സ്കൂളിലെ ഒന്പതാം ക്ലാസുകാരനായ മഹാദേവ് ദാസാണ് ആത്മഹത്യ ചെയ്തത്. മൂത്ത സഹോദരനായ സന്തോഷ് ദാസ് മരിച്ചപ്പോള് വിധവയും രണ്ടു കുട്ടികളുടെ അമ്മയുമായ ഇരുപത്തഞ്ചുകാരി റൂബി ദേവിയെ വിവാഹം കഴിക്കേണ്ടി വന്നു മഹാദേവിന്. വീട്ടുകാരുടെ സമ്മര്ദത്തെത്തുടര്ന്നായിരുന്നു ഇത്.
ഗ്രാമത്തിലെ ക്ഷേത്രത്തില് ഗ്രാമീണരുടേയും ബന്ധുക്കളുടേയും സാന്നിധ്യത്തിലായിരുന്നു വിവാഹം. ക്ഷേത്രത്തില് നിന്നുള്ള രജിസ്റ്ററില് റൂബിയുടേയും മഹാദേവിന്റേയും ബന്ധുക്കള് ഒപ്പുവെച്ചു. വൈകിട്ട് അഞ്ചുമണിക്ക് ചടങ്ങുകള് അവസാനിച്ചു. രാത്രി ഏഴുമണിയോടെ വീടിനടുത്ത് തൂങ്ങിമരിച്ച നിലയില് മഹാദേവിനെ കണ്ടെത്തി.
സ്വകാര്യ കമ്പനിയില് ജോലി ചെയ്തുന്ന സന്തോഷ് 2013ലാണ് മരിച്ചത്. കമ്പനിയില് നിന്ന് നഷ്ടപരിഹാരമായി കിട്ടിയ എണ്പതിനായിരം രൂപ വേണമെന്ന് റൂബിയുടെ വീട്ടുകാര് നിരന്തരം ആവശ്യപ്പെട്ടിരുന്നു. സന്തോഷിന്റെ അച്ഛന് ചന്ദ്രേശ്വര് 27,000 രൂപ നല്കി.
ബാക്കി പണം നല്കുകയോ സന്തോഷിന്റെ സഹോദരന് മഹാദേവിനെക്കൊണ്ട് റൂബിയെ വിവിഹം കഴിപ്പിക്കുകയോ വേണമെന്ന സമ്മര്ദം ശക്തമായതാണ് പ്രശ്നത്തിനിടയാക്കിതെന്നു പറയുന്നു ചന്ദ്രേശ്വര്. അമ്മയെപ്പോലെയാണ് സഹോദരന്റെ ഭാര്യയെ അവന് കണ്ടിരുന്നത്. ആ സ്ത്രീയെ വിവാഹം കഴിക്കേണ്ടി വന്നതിലുള്ള വേദനയിലാണ് ജീവനൊടുക്കിയത്, ചന്ദ്രേശ്വര് വിലപിക്കുന്നു.
