നാഗര്കോവില്: കൊടുങ്കാറ്റ് വന് ദുരിതമുണ്ടാക്കിയ കന്യാകുമാരി-നാഗര്കോവില് പ്രദേശത്ത് ജനജീവിതം സാധാരണമാകാന് ആഴ്ചകളെടുക്കും. മഴയൊന്നു ശാന്തമായപ്പോള് കൊടുങ്കാറ്റ് ഗതിമാറിയപ്പോള് കടലിറങ്ങിത്തുടങ്ങി. റോഡുകളില് വെള്ളം കെട്ടിനിന്ന് പുഴപോലെയാണ്. വൈദ്യുതിയും വാര്ത്താ വിനിമയ ബന്ധങ്ങളും ഇല്ലാതായി.
മരം വീണു തടസപ്പെട്ട വഴികളും വഴികളിലെ വൈദ്യുതിക്കമ്പിയും മറ്റും നീക്കാനും സൗകര്യങ്ങള് സാധാരണമട്ടിലാക്കാനും തമിഴ്നാട് സര്ക്കാരും സംഘടനാ പ്രവര്ത്തകരുമുണ്ട്. ആര്എസ്എസ് പ്രവര്ത്തകര് സകല സന്നാഹങ്ങളുമായി പ്രവര്ത്തിക്കുന്ന കാഴ്ച എവിടെയും കാണാം. കാക്കി നിക്കറുമിട്ട് അരയറ്റം വെള്ളത്തില് താല്ക്കാലിക സുരക്ഷിത സ്ഥാനങ്ങളില് കഴിയുന്നവര്ക്ക് സൗകര്യങ്ങള് ലഭ്യമാക്കാന് അവര് മുന്നിരയിലുണ്ട്. തിരുവനന്തപുരം -കന്യാകുമാരി ദേശീയ പാത യാത്രാ സജ്ജമാക്കാനാണ് അധികൃതര് ശ്രമിക്കുന്നത്.
മുറിഞ്ഞു വീണ മരം മാറ്റുക, യാത്രയ്ക്ക് സൗകര്യങ്ങള് ഉണ്ടാക്കുക, ചികിത്സയും മരുന്നും വേണ്ടവര്ക്ക് ലഭ്യമാക്കുക. വഴിപിരിഞ്ഞവരെ ബന്ധുക്കളുടെ അടുത്തെത്തിക്കുക തുടങ്ങിയ പ്രവര്ത്തനങ്ങളാണ് കൂടുതല്. ഭക്ഷണം പ്രത്യേകം സ്ഥലങ്ങളില് തയ്യാറാക്കി ഒറ്റപ്പെട്ട സ്ഥലങ്ങളില് കഴിയുന്നവര്ക്ക് എത്തിക്കാന് ഒരു പ്രത്യേക വിഭാഗംതന്നെയുണ്ട്.
