ലക്നൗ:യോഗിയുടെ യുപിയില് നിലച്ചിട്ടില്ല ബിജെപി തരംഗം. യോഗി ആദിത്യനാഥ് അധികാരത്തിലെത്തി ഏഴുമാസത്തിനു ശേഷം നഗര്പാലികാ പരിഷത് തെരഞ്ഞെടുപ്പിലും ഉത്തര്പ്രദേശിലെ ജനങ്ങള് ബിജെപിക്ക് ഉജ്വല വിജയം സമ്മാനിച്ചു.
പതിനാറില് പതിനഞ്ചു കോര്പ്പറേഷനുകളിലും പാര്ട്ടി ഭരണം പിടിച്ചു. ഒരെണ്ണം ബിഎസ്പി നേടിയപ്പോള് കോണ്ഗ്രസും സമാജ്വാദി പാര്ട്ടിയും നിലംപരിശായി. സംസ്ഥാനത്താകെ ഇരുപതു വാര്ഡുകളിലേക്ക് കോണ്ഗ്രസിന്റെ നേട്ടം ചുരുങ്ങി. തലമുറകളായി നെഹ്റു കുടുംബത്തിന്റെ തട്ടകമായ അമേത്തിയില് ബിജെപി വിജയം നേടിയതു കോണ്ഗ്രസിനു കനത്ത തിരിച്ചടിയായി. പാര്ട്ടി പ്രസിഡന്റ് സ്ഥാനം ഏറ്റെടുക്കാനൊരുങ്ങുന്ന രാഹുല് ഗാന്ധിക്കും യുപിയിലെ ദയനീയ തോല്വി നാണക്കേടായി.
ലക്നോവില് ബിജെപിയുടെ സംയുക്ത ഭാട്ടിയ ഒരു ലക്ഷത്തിലേറെ വോട്ടുകള്ക്കാണ് വിജയിച്ചത്. തലസ്ഥാന നഗരത്തിന്റെ നൂറുവര്ഷത്തെ ചരിത്രത്തില് ആദ്യത്തെ വനിതാ മേയറാണ് സംയുക്ത. ഫിറോസാബാദില് ബിജെപിയുടെ നൂതന് ഠാക്കൂര് 42,396 വോട്ടുകള്ക്ക് എഐഎംഐഎമ്മിലെ മസ്രൂര് ഫാത്തിമയെ പരാജയപ്പെടുത്തി. അലഹബാദില് ബിജെപിയുടെ അഭിലാഷാ ഗുപ്ത 51,327 വോട്ടുകള്ക്ക് എസ്പിയിലെ വിനോദ് ചന്ദ്രയെ തോത്പിച്ച് മേയറായി. അയോധ്യയില് പാര്ട്ടിയുടെ ഋഷികേശ് ഉപാധ്യായ വിജയിച്ചു. എസ്പിയിലെ ഗുല്ഷന് ബിന്ദുവിനെ 3,601 വോട്ടുകള്ക്കാണ് ഋഷികേശ് പരാജയപ്പെടുത്തിയത്.
പ്രധാനമന്ത്രി നരേന്ദ്രമോദിയുടെ ലോക്സഭാ മണ്ഡലമായ വാരാണസിയില് ബിജെപിയുടെ മേയര് സ്ഥാനാര്ഥി മൃദുല ജയ്സ്വാള് കോണ്ഗ്രസിന്റെ ശാലിനിയെ 78,843 വോട്ടുകള്ക്കാണ് തോല്പ്പിച്ചത്. ശിശുമരണങ്ങളുടെ പേരില് പ്രതിപക്ഷവും മാധ്യമങ്ങളും വന് വിമര്ശനം അഴിച്ചുവിട്ട ഗോരഖ്പുരില് ബിജെപിയുടെ സീതാറാം ജയ്സ്വാള് നേടിയത് വന് വിജയമാണ്. എസ്പിയിലെ രാഹുല് ഗുപ്തയെ 75, 823 വോട്ടുകള്ക്ക് സീതാറാം തകര്ത്തു. മൊറാദാബാദില് ബിജെപിയുടെ നിവോദ് അഗര്വാള് കോണ്ഗ്രസിന്റെ റിസ്വാന് ഖുറേഷിയെ 22, 635 വോട്ടുകള്ക്ക് പരാജയപ്പെടുത്തിയപ്പോള് ഷഹരന്പുരില് ബിജെപിയുടെ മദന് വാലിയ ബിഎസ്പിയുടെ ഫസറുള് റഹ്മാനില് നിന്ന് കടുത്ത പോരാട്ടം നേരിട്ടു. രണ്ടായിരം വോട്ടുകള്ക്കാണ് മദന് ജയിച്ചത്. ഝാന്സിയില് പാര്ട്ടിയുടെ രാമതീര്ഥ് സിംഘല് 16, 373 വോട്ടുകള്ക്ക് ബിഎസ്പിയിലെ ബിജേന്ദ്ര കുമാര് വ്യാസിനെ തോല്പിച്ചു. ഇവിടെ മുന് കേന്ദ്രമന്ത്രി പ്രദീപ് ജെയിന് ആദിത്യയെ മേയര് സ്ഥാനാര്ഥിയാക്കിയ കോണ്ഗ്രസ് നാണം കെട്ടു. പ്രദീപ് മൂന്നാമതാണെത്തിയത്.
ശക്തികേന്ദ്രമായ അലിഗഢിലെ പരാജയമാണ് ബിജെപിക്കേറ്റ ഏക തിരിച്ചടി. ഇവിടെ ബിഎസ്പിയിലെ മുഹമ്മദ് ഫുര്ഖാന് ബിജെപിയുടെ രാജീവ് അഗര്വാളിനെ 11,990 വോട്ടുകള്ക്ക് പരാജയപ്പെടുത്തി. രാഹുലിന്റെ ലോക്സഭാ മണ്ഡലമായ അമേത്തിയില് കോണ്ഗ്രസ് ദയനീയമായി പരാജയപ്പെട്ടു. അമേത്തിയിലെ രണ്ടു നഗര് പാലികാ പരിഷത്തുകളില് ഒന്നില് ബിജെപിയും മറ്റൊന്നില് സമാജ് വാദി പാര്ട്ടിയും ജയിച്ചു.
