പ്രധാനമന്ത്രി നരേന്ദ്ര മോദി കഡോദരയിലെ മഹാ സമ്മേളനത്തില്
കഡോദര: ബാങ്കുകള് ദേശസാല്ക്കരിച്ച ഇന്ദിരാഗാന്ധിയുടെ നടപടി നാടകമായിരുന്നുവെന്ന് പ്രധാനമന്ത്രി നരേന്ദ്ര മോദി. ഗുജറാത്തിയായ അന്നത്തെ ധനമന്ത്രി മൊറാര്ജി ദേശായിയെ പുറത്താക്കിയ നടപടി മറയ്ക്കാനായിരുന്നു ഇതെന്നും കഡോദരയിലെ കൂറ്റന് സമ്മേളനത്തെ അഭിസംബോധന ചെയ്ത് അദ്ദേഹം പറഞ്ഞു. ജാതി രാഷ്ട്രീയം കളിക്കുന്ന കോണ്ഗ്രസ് സമൂഹത്തില് ഭിന്നതയുണ്ടാക്കുകയാണെന്നും 25 വര്ഷം മുന്പ് അവര് ചെയ്ത് പാപത്തിന്റെ ഫലം ഇന്നും ഗുജറാത്ത് അനുഭവിക്കുകയാണെന്നും അദ്ദേഹം ചൂണ്ടിക്കാട്ടി.
സൂററ്റ്കാരനായ മൊറാര്ജിയെ നാണംകെടുത്തുന്ന രീതിയിലാണ് രായ്ക്കുരാമാനം ഇന്ദിര ധനമന്ത്രി സ്ഥാനത്തു നിന്ന് പുറത്താക്കിയത്. തന്നെ പച്ചക്കറി പോലെ പുറംതള്ളിയെന്നാണ് അന്ന് മൊറാര്ജി പ്രതികരിച്ചത്. ഈ പുറത്താക്കല് മൂടിവയ്ക്കാനാണ് ബാങ്ക് ദേശസാല്ക്കരണം എന്ന നാടകം കളിച്ചത്. മൊറാര്ജിയെ പുറത്താക്കി ആ രാത്രി തന്നെ ബാങ്കുകള് ദേശസാല്ക്കരിച്ചു. പാവപ്പെട്ടവര്ക്കു വേണ്ടിയായിരുന്നു ദേശസാല്ക്കരണമെന്നാണ് അന്ന് പറഞ്ഞത്. മൊറാര്ജിയെ ബലി നല്കിയിട്ടും ബാങ്കുകള് പാവപ്പെട്ടവര്ക്കു മുന്നില് വാതിലുകള് തുറന്നില്ല.
തന്റെ സര്ക്കാരാണ് പാവപ്പെട്ടവര്ക്ക് വേണ്ടി ബാങ്കുകള് തുറന്നു നല്കിയത്. ജന്ധന് യോജന വഴി 30 കോടി പാവപ്പെട്ടവര്ക്കും ബാങ്കുകള് തുറന്നു നല്കി. ഗുജറാത്തില് ബിജെപി ഭരണത്തില് ചിലര് അമ്പലങ്ങള് സന്ദര്ശിക്കാന് നിര്ബന്ധിതമായിരിക്കുകയാണ്. രാഹുലിനെ പരാമര്ശിച്ച് മോദി പറഞ്ഞു. രാഹുല് ഗുജറാത്ത് സന്ദര്ശനത്തില് നിരവധി ക്ഷേത്രങ്ങള് സന്ദര്ശിച്ചിരുന്നു.
ഗുജറാത്തിലെ സാമൂഹിക അടിത്തറ തകര്ത്ത സമ്പ്രദായങ്ങള് മടക്കിക്കൊണ്ടുവരാനാണ് കോണ്ഗ്രസും പ്രതിപക്ഷ പാര്ട്ടികളും ശ്രമിക്കുന്നത്. ഹാര്ദ്ദിക് പട്ടേലും ജിഗ്നേഷ് മേവാനിയും അല്പ്പേശ് താക്കൂറും ഉള്പ്പെട്ട ജാതിക്കാര്ഡ് പരോക്ഷമായി സൂചിപ്പിച്ച് മോദി പറഞ്ഞു.
