മാനന്തവാടി: ഇതര വിഭാഗത്തില്പ്പെട്ടയാള്ക്ക് മകളെ വിവാഹം ചെയ്തു നല്കിയതിന്റെ പേരില് കുടംബത്തിന് മഹല്ല് കമ്മിറ്റിയുടെ ഊരുവിലക്ക്. വയനാട് കാട്ടിക്കുളം ഇടയൂര്കുന്ന് കരിക്കുഴില് വീട്ടില് ബഷീറിനും കുടുംബത്തിനുമാണ് 2016 നവംബര് മുതല് ഇടയൂര്ക്കുന്ന് സുന്നി ജുമാമസ്ജിദ് മഹല്ല് കമ്മറ്റിയുടെ ഊരുവിലക്ക്.
മുപ്പത്തഞ്ച് വര്ഷത്തോളമായി ഇടയൂര്കുന്ന് സുന്നി ജുമാമസ്ജിദ് പരിധിയിലെ താമസക്കാരനാണ് ബഷീറും കുടുംബവും. ബഷീറിന്റെ മകളെ ജമാഅത്തെ ഇസ്ലാമി അനുഭാവിയായ യുവാവിന് വിവാഹം ചെയ്തു നല്കിയതാണ് ഊരുവിലക്കിന് കാരണമായതായി പറയുന്നത്. കല്യാണത്തിന് മഹല്ല് കമ്മറ്റി ഭാരവാഹികളെയും നാട്ടുകാരെയും ക്ഷണിച്ചിരുന്നു. എന്നാല് മഹല്ല് മുന്കൈയെടുത്ത് കല്യാണത്തില് പങ്കെടുക്കുന്നതിന് വിലക്കേര്പ്പെടുത്തുകയായിരുന്നുവത്രെ.
തുടര്ന്ന് മഹല്ല് സംബന്ധിച്ച കാര്യങ്ങളൊന്നും അറിയിക്കുകയോ വരിസംഖ്യ സ്വീകരിക്കുകയോ ചെയ്തില്ല. ഊരുവിലക്കിന്റെ കാരണമറിയാന് കഴിഞ്ഞ കമ്മറ്റിക്ക് തപാല് മുഖേന ബഷീര് കത്തയച്ചെങ്കിലും മറുപടി ലഭിച്ചില്ല. കഴിഞ്ഞദിവസം ചേര്ന്ന ജനറല് ബോഡി യോഗത്തില് പങ്കെടുക്കാനെത്തിയെങ്കിലും പുറത്താക്കിയാതായി ബഷീര് ആരോപിച്ചു. നിലവിലുള്ള മഹല്ലില് നിന്ന് മറ്റൊരു മഹല്ലിലേക്ക് മാറിപ്പോകുന്നതിന് ക്ലിയറന്സ് ആവശ്യമാണെന്നിരിക്കെ ഇത് നല്കാനും തയ്യാറാകുന്നില്ല. ഇത് സംബന്ധിച്ച് വഖഫ്ബോര്ഡ് ചെയര്മാന് മുമ്പാകെ പരാതി സമര്പ്പിച്ചതായും ബഷീറും ബന്ധുക്കളും പറഞ്ഞു.
