തിരുവനന്തപുരം: നെടുമുടി വേണുവിനെപ്പോലെ ആദിമധ്യാന്തം കലാകാരനായ ഒരാള് ഇന്ത്യന് സിനിമയില് ഇല്ലെന്ന് നടന് മധു. സിനിമയില് നാല്പത് വര്ഷം പൂര്ത്തിയാക്കുന്ന നെടുമുടി വേണുവിന്, തിരുവനന്തപുരം ഫിലിം ഫ്രട്ടേര്ണിറ്റിയും സംസ്ഥാന സര്ക്കാരും വയലാര് രാമവര്മ്മ സംസ്കാരവേദിയും ചേര്ന്ന് നല്കിയ ആദരവ് ‘നടനം വേണുലയം’ കലാസന്ധ്യ യില് മുഖ്യപ്രഭാഷണം നടത്തുകയായിരുന്നു അദ്ദഹം.ഇത്രയധികം വ്യത്യസ്ത കഥാപാത്രത്തെ അവതരിപ്പിച്ച ഒരു നടന് സിനിമാലോകത്തില്ല, അദ്ദേഹം പറഞ്ഞു.
ദേവസ്വം മന്ത്രി കടകംപള്ളി സുരേന്ദ്രന് മിഴാവ് കൊട്ടി ചടങ്ങ് ഉദ്ഘാടനം ചെയ്തു. തുടര്ന്ന് നെടുമുടിവേണു മിഴാവില് നാദവിസ്മയം തീര്ത്തു. കേരളാ ഫിലിം പ്രൊഡ്യൂസേഴ്സ് അസ്സോസിയേഷന് പ്രസിഡന്റ് ജി.സുരേഷ്കുമാര് അധ്യക്ഷനായിരുന്നു. നെടുമുടിയുടെ ജീവിത സഞ്ചാരം ഒപ്പിയെടുത്ത ‘തമ്പില് നിന്ന് തമ്പിലേക്ക്’ ഡോക്യുമെന്ററി പ്രദര്ശിപ്പിച്ചു. പിന്നണിഗായകര് അണിനിരന്ന സംഗീത യാത്ര ‘നെടുമുടി ഗീതകം’, ചലച്ചിത്ര താരങ്ങളുടെ നൃത്ത സന്ധ്യ ‘നെടുമുടി ഭാവുകം’ എന്നിവയും അരങ്ങേറി.
മുകേഷ് എംഎല്എ, ചലച്ചിത്ര അക്കാദമി ചെയര്മാന് കമല്, കെപിഎസി ലളിത, ലെനിന് രാജേന്ദ്രന്, തുടങ്ങിയവര് നെടുമുടിയുമായുള്ള സിനിമാ മുഹൂര്ത്തങ്ങള് പങ്കുവെച്ചു. പ്രിയദര്ശന്, മേനക, സത്യന് അന്തിക്കാട്, ശ്രീനിവാസന്, മധുപാല്, മണിയന് പിള്ള രാജു, വിനീത്, മഞ്ജുവാര്യര്, തുടങ്ങി സിനിമാ മേഖലയിലെ പ്രമുഖരും ബിജെപി ജില്ലാ പ്രസിഡന്റ് അഡ്വ.എസ്.സുരേഷ് ഉള്പ്പെടെയുള്ള രാഷ്ട്രീയ സാമൂഹ്യ പ്രവര്ത്തകരും ആദരിവിന് സാക്ഷ്യം വഹിക്കാന് എത്തിയിരുന്നു.
