ചങ്ങനാശ്ശേരി: രേഖകളില്ലാതെ കൊണ്ടുവന്ന 27,35,330 രൂപയുടെകറന്സിയുമായി യുവാവ് പോലീസ് പിടിയിലായി. ചങ്ങനാശ്ശേരി പുതൂര്പള്ളി മുട്ടംപറമ്പ് കബീര് (30) ആണ് പിടിയിലായത്. തുണിസഞ്ചിയില് അരയില് സൂക്ഷിച്ചിരുന്ന നിലയിലാണ് പണം കണ്ടെത്തിയത്. ഇതിനുമുകളില് ജീന്സും ധരിച്ചിരുന്നു. പുതിയ 2000 ത്തിന്റെ നോട്ടുകെട്ടുകളാണ് പിടിച്ചെടുത്തിരിക്കുന്നത്.
പണത്തിന്റെ ഉറവിടം കാണിക്കണമെന്നാവശ്യപ്പെട്ട് നോട്ടീസ് നല്കി കബീറിനെ വിട്ടയച്ചു. ചങ്ങനാശ്ശേരിയിലും കോട്ടയത്തുമുള്ള കുഴല്പ്പണ ഇടപാടുകള്ക്കായി പ്രവര്ത്തിക്കുന്ന ഏജന്റാണ് കബീര് എന്നാണ് പോലീസിന്റെ പ്രാഥമിക നിഗമനം. വ്യാഴാഴ്ച രാവിലെ ഏറ്റുമാനൂര് സ്വദേശിയായ ഒരാള്ക്ക് കോട്ടയം റെയില്വേ സ്റ്റേഷനില് കുറച്ച് പണം കൈമാറിയതായി സൂചനയുണ്ട്.
അനധികൃതമായി ചങ്ങനാശ്ശേരിയിലേക്ക് ട്രെയിന് മാര്ഗം പണം വരുന്നതായി കോട്ടയം ജില്ലാ പോലീസ് മേധാവിക്ക് ലഭിച്ച രഹസ്യവിവരത്തിന്റെ അടിസ്ഥാനത്തില് ഒരു മാസമായി പോലീസ് നടത്തിയ നിരീക്ഷണത്തിനൊടുവിലാണ് ഇയാളെ പിടികൂടാന് സാധിച്ചതെന്ന് പോലീസ് പറഞ്ഞു.
പണത്തിന്റെ ഉറവിടം അന്വേഷിക്കുന്നുണ്ടെന്ന് ചങ്ങനാശേരി ഡിവൈഎസ്പി ആര്. ശ്രീകുമാര് പറഞ്ഞു. സിഐ കെ.സി. വിനോദിന്റെ നേതൃത്വത്തിലുള്ള സംഘമാണ് ഇയാളെ ചങ്ങനാശ്ശേരി റെയില്വേ സ്റ്റേഷനില്നിന്നും പിടികൂടിയത്.
