കണ്ണൂര്: കേയി റുബാത്ത് നഷ്ടപരിഹാരസംഖ്യ അവകാശികള്ക്ക് തന്നെ ലഭ്യമാക്കണമെന്ന് കേയി റുബാത്ത് ആക്ഷന് കമ്മറ്റി ഭാരവാഹികള് വാര്ത്താസമ്മേളനത്തില് ആവശ്യപ്പെട്ടു. പുതിയ റുബാത്ത് സ്ഥാപിക്കണമെന്നതിന്റെ പേരില് ഫണ്ട് കേരളത്തിലേക്ക് കൊണ്ട് വന്ന് അട്ടിമറിക്കാനുള്ള ശ്രമമാണ് സംസ്ഥാന വഖഫ് ബോര്ഡിന്റെ ഭാഗത്ത് നിന്നുണ്ടാകുന്നുവെങ്കില് കേന്ദ്രസര്ക്കാരില് ശക്തമായ ഇടപെടലുകള് നടത്തുകയും വിഷയത്തെ നിയമപരമായി നേരിടുകയും ചെയ്യും.
അയ്യായിരം കോടിയാണ് റുബാത്ത് നഷ്ടപരിഹാരസംഖ്യ. മായിക്കുട്ടികേയി സൗദിഅറേബ്യയില് സ്ഥാപിച്ച റുബാത്തിന്റെ നഷ്ടപരിഹാരസംഖ്യ വഖഫ് ചെയ്തതാണ് അത് കിട്ടില്ലെന്നതായിരുന്നു മുന്പ് പ്രചരിപ്പിച്ചത്. എന്നാല് കേയിറുബാത്തിന്റെ അവകാശികള്ക്ക് വേണ്ടി ആക്ഷന് കമ്മറ്റി, കേരളസര്ക്കാരിനെയും അതിന് ശേഷം കേന്ദ്രസര്ക്കാരിനെയും സമീപിക്കുകയും അതിന്റെ ഫലമായി കേന്ദ്രസംസ്ഥാന സര്ക്കാര് ആരോഗ്യപരമായ ഇടപെടലുകള് സൗദി സര്ക്കാരില് നടത്തുകയും ചെയ്തു. ഇത്തരം ഇടപെടലുകളില് വിറളിപൂണ്ട സംസ്ഥാന വഖഫ് ബോര്ഡിലെ പ്രമാണിമാര് ഇപ്പോള് നഷ്ടപരിഹാരം വഖഫ് ബോര്ഡിന് ലഭ്യമാക്കണമെന്ന വാദവുമായി രംഗത്ത് വന്നത് പാര്ശ്വവല്ക്കരിക്കപ്പെട്ടവരോട് കാണിക്കുന്ന അനീതിയാണ്.
ഫണ്ട് കേരളത്തില് കൊണ്ട് വന്ന് പുതിയ റുബാത്ത് സ്ഥാപിക്കണമെന്നാണ് വഖഫ് ബോര്ഡംഗങ്ങള് പറയുന്നത്. മായിന്കുട്ടി കേയിയുടെ ആഗ്രഹ സഫലീകരണം എന്ന നിലയില് പുതിയ റുബാത്ത് സ്ഥാപിക്കുന്ന കാര്യം നല്ലത് തന്നെയാണെങ്കിലും കേയി കുടുംബത്തിലെ പാര്ശ്വല്ക്കരിക്കപ്പെട്ട സമൂഹത്തിന് നല്ല താമസം, വിദ്യാഭ്യാസം ചികിത്സ ഇവയും അദ്ദേഹത്തിന്റെ ആഗ്രഹം തന്നെയാണെന്നും ആക്ഷന്കമ്മറ്റി ഭാരവാഹികള് പറഞ്ഞു. വാര്ത്താസമ്മേളനത്തില് സിദ്ദിഖ് വലിയകത്ത്, സി.സി.ഒ.കുഞ്ഞിമായിന്കേയി, ടി.പി.മമ്മു, കെ.പി.നിസാര്, എ.പി.അബ്ദുള്ള, ബി.പി.മുസ്തഫ എന്നിവര് പങ്കെടുത്തു.
