കൊച്ചി: ഉദ്യോഗസ്ഥര് കട്ടുകൊണ്ടു പോയിരുന്ന പണം ജനങ്ങളിലെത്തിക്കാന് പ്രധാനമന്ത്രി നരേന്ദ്ര മോദി സര്ക്കാരിന് കഴിഞ്ഞെന്ന് കേന്ദ്ര മന്ത്രി അല്ഫോണ്സ് കണ്ണന്താനം. ജന്മഭൂമിയും കെപിഎംജിയും ചേര്ന്ന് ലുലു മാരിയറ്റ് ഹോട്ടലില് സംഘടിപ്പിച്ച ഇന്ക്ലൂസീവ് ഇന്ത്യാ ഇക്കണോമിക് ഫോറം 2017(ഐഐഇഎഫ്) ഉദ്ഘാടനം ചെയ്യുകയായിരുന്നു അദ്ദേഹം.
ആധാര് ലിങ്ക് ചെയ്തതോടെ എല്ലാ സര്ക്കാര് സഹായങ്ങളും പാവപ്പെട്ടവരുടെ അക്കൗണ്ടില് കൃത്യമായി എത്തി. 2.39 ലക്ഷം കോടി രൂപയാണ് പാവപ്പെട്ടവര്ക്ക് കിട്ടിയത്. അഴിമതി ഇല്ലാതായതോടെ കേന്ദ്രത്തിന് 57000 കോടി രൂപ ലാഭവുമുണ്ടായി. 15000 ഗ്രാമങ്ങളില് വൈദ്യുതി എത്തിച്ചു. സ്വജന്യമായി വൈദ്യുതി എത്തിക്കാന് 16500 കോടി രൂപ ചെലവാക്കി.
88 ശതമാനം ജനപിന്തുണയുള്ള നേതാവായി നരേന്ദ്ര മോദി ഉയരാന് കാരണം മറ്റൊന്നുമല്ല. 6.4 കോടി ശൗചാലയങ്ങള് നിര്മ്മിച്ചു. ജനങ്ങള്ക്കായി വിപ്ലവകരമായ കാര്യങ്ങളാണ് ചെയ്യുന്നത്. ഇതിനെ കളിയാക്കുന്നത് എപ്പോഴും ഫോണും കുത്തിയിരിക്കുന്ന പണിയില്ലാത്ത മലയാളികളാണ്.
ഡിജിറ്റല് വിപ്ലവവും പണക്കാര്ക്ക് മാത്രമല്ല പാവപ്പെട്ടവര്ക്കും ഗുണമുണ്ടായി. ഇനി എല്ലാവര്ക്കും ജോലി ഉറപ്പാക്കുകയാണ് കേന്ദ്ര സര്ക്കാര് ലക്ഷ്യമെന്നും കണ്ണന്താനം കൂട്ടിച്ചേര്ത്തു.
