തുറവൂര്: വേലിയേറ്റം ശക്തമായതോടെ ഉള്നാടന് പ്രദേശങ്ങള് വെള്ളപ്പൊക്ക ഭീഷണിയില്. അന്ധകാരനഴി സ്പില്വേ ഷട്ടറുകള് തുറന്നു കിടക്കുന്നതിനാലാണ് ഉള്നാടന് പ്രദേശങ്ങള്ളില് വെള്ളക്കെട്ടിനു കാരണം.
കടക്കരപ്പള്ളി, പട്ടണക്കാട്, തുറവൂര് പഞ്ചായത്തുകളുടെ പരിധിയില് വരുന്ന പൊഴിച്ചാലിലൂടെയാണു വേലിയേറ്റ സമയത്ത് അമിതമായി കടല് വെള്ളം കയറുന്നത്. തെക്കേ സ്പില്വേയില് അഞ്ചു ഷട്ടറുകളും വടക്കേ സ്പില്വേയില് മൂന്നു ഷട്ടറുകളുമാണു തുറന്നു വച്ചിരിക്കുന്നത്.
വേലിയേറ്റ സമയത്തു തെക്കു ഭാഗത്തേക്കു കൂടുതല് വെള്ളം കുത്തിയൊഴുകിക്കയറുന്നുണ്ടെന്നും ഇതു ജനങ്ങള്ക്ക് ഏറെ ബുദ്ധിമുട്ടുണ്ടാക്കുന്നുണ്ട്. ഇനിവരുന്ന ദിവസങ്ങളില് വേലിയേറ്റം ശക്തമാകാനുള്ള സാധ്യതയുണ്ടെന്നാണു തീരവാസികള് പറയുന്നത്.
അതു മൂലം രണ്ടു ഷട്ടറുകള് വീതം അടയ്ക്കണം. വര്ഷാവസാനം പൂര്ണമായും അടയ്ക്കുന്ന ഷട്ടറുകള് ജൂണിലെ വീണ്ടും തുറക്കുകയുള്ളു.
പൊക്കാളി പാടശേഖരങ്ങളിലെ കൃഷി ആവശ്യങ്ങള്ക്കു വേണ്ടി സ്ഥാപിച്ച ഷട്ടറുകള് നിലവില് അശാസ്ത്രീയമായാണു തുറയ്ക്കുകയും അടയ്ക്കുകയും ചെയ്യുന്നതെന്നാണ് ഉള്നാടന് പ്രദേശങ്ങളിലുള്ളവരുടെ പരാതി.
