ന്യൂദല്‍ഹി: നികുതി വെട്ടിച്ച് വിദേശത്ത് കോടികളുടെ കള്ളപ്പണം നിക്ഷേപിച്ച ഇന്ത്യക്കാരുടെ വിവരങ്ങള്‍ പുറത്ത്. പാരഡൈസ് പേപ്പേഴ്‌സ് എന്ന പേരില്‍ ജര്‍മ്മന്‍ പത്രമായ സിഡോയിച്ചെ സെതൂങ്ങും ഇന്റര്‍നാഷണല്‍ കണ്‍സോര്‍ഷ്യം ഓഫ് ഇന്‍വെസ്റ്റിഗേറ്റീവ് ജേണലിസ്റ്റും (ഐസിഐജെ) പുറത്തുവിട്ട രേഖകളില്‍ 714 ഇന്ത്യക്കാരാണുള്ളത്.
96 മാധ്യമ സ്ഥാപനങ്ങള്‍ സംയുക്തമായാണ് അന്വേഷണം നടത്തിയത്. കോര്‍പ്പറേറ്റ് സ്ഥാപനങ്ങള്‍, രാഷ്‌ട്രീയ നേതാക്കള്‍, ബോളിവുഡ് താരങ്ങള്‍ എന്നിവര്‍ പട്ടികയിലുണ്ട്. ഇന്ത്യന്‍ എക്‌സ്പ്രസ് ദിനപത്രമാണ് ഇന്ത്യയില്‍നിന്ന് അന്വേഷണത്തില്‍ പങ്കാളിയായത്.
180 രാജ്യങ്ങളിലെ വിവരങ്ങളില്‍ ഇന്ത്യ പത്തൊമ്പതാം സ്ഥാനത്താണ്. 13.4 ദശലക്ഷം രേഖകളില്‍ ആദ്യ ഭാഗമാണ് പുറത്തുവന്നത്. 40 ദിവസം തുടര്‍ച്ചയായി മുഴുവന്‍ വിവരങ്ങളും വെളിപ്പെടുത്തുമെന്ന് ഐസിഐജെ അറിയിച്ചു.
നികുതി അടയ്‌ക്കുന്നത് ഒഴിവാക്കാന്‍ കോര്‍പ്പറേറ്റ് സ്ഥാപനങ്ങള്‍ക്ക് ഉപദേശം നല്‍കുന്ന ബര്‍മുഡയിലെ നിയമസ്ഥാപനമായ ആപ്പിള്‍ ബൈയില്‍നിന്നുള്ള രേഖകളാണ് പാരഡൈസ് പേപ്പറില്‍. 119 വര്‍ഷമായ കമ്പനിയുടെ ഇടപാടുകാരില്‍ രണ്ടാം സ്ഥാനം ഇന്ത്യക്കാര്‍ക്കാണ്.
കാര്‍ത്തിയും രവികൃഷ്ണയും
പാരഡൈസ് പേപ്പര്‍ പുറത്തുവിട്ട പട്ടികയില്‍ യുപിഎ സര്‍ക്കാരിന്റെ കാലത്ത് അഴിമതിയില്‍ പങ്കാളികളായവരും. ടു ജി സ്‌പെക്ട്രം ഇടനിലക്കാരി നീര റാഡിയ, എയര്‍സെല്‍-മാക്‌സിസ് അഴിമതിയില്‍ പങ്കുള്ള സണ്‍ ടിവി, ടു ജി സ്‌പെക്ട്രം അഴിമതിയിലെ എസ്സാര്‍ ലൂപ്പ്, അഴിമതി അന്വേഷണം നേരിടുന്ന വൈഎസ്ആര്‍ കോണ്‍ഗ്രസ് നേതാവ് ജഗന്‍മോഹന്‍ റെഡ്ഡി, രാജസ്ഥാനിലെ ആംബുലന്‍സ് അഴിമതിയില്‍ ഉള്‍പ്പെട്ട സിക്വിസ്റ്റ ഹെല്‍ത്ത് കെയര്‍ തുടങ്ങിയവര്‍ പട്ടികയിലുണ്ട്.
രാജസ്ഥാന്‍ മുന്‍ മുഖ്യമന്ത്രിയും കോണ്‍ഗ്രസ് നേതാവുമായ അശോക് ഗെഹ്‌ലോട്ട്, പി. ചിദംബരത്തിന്റെ മകന്‍ കാര്‍ത്തി ചിദംബരം, വയലാര്‍ രവിയുടെ മകന്‍ രവികൃഷ്ണ, മുന്‍ കേന്ദ്രമന്ത്രി സച്ചിന്‍ പൈലറ്റ് എന്നിവരാണ് സിക്വിസ്റ്റ ഹെല്‍ത്ത് കെയറിന്റെ സ്ഥാപകര്‍.
വ്യോമയാന സഹമന്ത്രി ജയന്ത് സിന്‍ഹ, ബിജെപി എംപി ആര്‍.കെ. സിന്‍ഹ, ബോളിവുഡ് നടന്‍ അമിതാഭ് ബച്ചന്‍, സഞ്ജയ് ദത്തിന്റെ ഭാര്യ മന്യത ദത്ത്, എസ്എന്‍സി ലാവലിന്‍, അപ്പോളോ ടയേഴ്‌സ്, ജിന്‍ഡാല്‍ സ്റ്റീല്‍സ്, ഹാവെല്‍സ്, ഹിന്ദുജ, എമാര്‍ എംജിഎഫ്, വീഡിയോകോണ്‍, ഡിഎസ് കണ്‍സ്ട്രക്ഷന്‍സ്, ഹിരാനന്ദിനി ഗ്രൂപ്പ്, വിജയ് മല്യയുടെ യുണൈറ്റഡ് സിപിരിറ്റ്, ജിഎംആര്‍ ഗ്രൂപ്പ് എന്നിവയും പുറത്തുവിട്ട രേഖകളിലുണ്ട്.
ട്രംപും എലിസബത്ത് രാജ്ഞിയും
യുഎസ് പ്രസിഡന്റ് ഡൊണാള്‍ഡ് ട്രംപ്, ബ്രിട്ടനിലെ എലിസബത്ത് രാജ്ഞി, കൊളംബിയന്‍ പ്രസിഡന്റ് ഷാന്‍ മാനുവല്‍ സാന്റോസ്, ജോര്‍ദ്ദാന്‍ രാജ്ഞി നൂര്‍ അല്‍ ഹുസൈന്, ഗായകരായ ബോണോ, മഡോണ, യുഎസ് സ്റ്റേറ്റ് സെക്രട്ടറി റെക്‌സ് ടില്ലേഴ്‌സണ്‍, കൊമേഴ്‌സ് സെക്രട്ടറി വില്‍ബര്‍ റോസ് തുടങ്ങിയവരാണ് അന്താരാഷ്‌ട്ര തലത്തില്‍ പട്ടികയിലുള്‍പ്പെട്ട പ്രമുഖര്‍. റഷ്യന്‍ പ്രസിഡന്റ് വ്‌ളാഡിമിര്‍ പുടിന്റെ മരുമകന്റെ കമ്പനിയില്‍ വില്‍ബര്‍ റോസിന് നിക്ഷേപമുള്ളതായും വ്യക്തമായി. ബ്രിട്ടനിലെ സ്വകാര്യ എസ്റ്റേറ്റിന്റെ സാമ്പത്തിക കണക്കില്‍ കൃത്രിമത്തിനായി എലിസബത്ത് രാജ്ഞി ആപ്പിള്‍ ബൈയില്‍ നിക്ഷേപം നടത്തി.
കേന്ദ്രം അന്വേഷണം പ്രഖ്യാപിച്ചു
പാരഡൈസ് പേപ്പറുകളിലെ വെളിപ്പെടുത്തലില്‍ കേന്ദ്ര സര്‍ക്കാര്‍ സമഗ്ര അന്വേഷണം പ്രഖ്യാപിച്ചു. പ്രത്യക്ഷ നികുതി ബോര്‍ഡ് ചെയര്‍മാന്റെ മേല്‍നോട്ടത്തില്‍ എന്‍ഫോഴ്‌സ്‌മെന്റ് ഡയറക്ടറേറ്റ്, റിസര്‍വ് ബാങ്ക്, പ്രത്യക്ഷ നികുതി ബോര്‍ഡ്, ഫിനാല്‍ഷ്യല്‍ ഇന്റലിജന്റ്‌സ് യൂണിറ്റ് എന്നിവയുടെ സംയുക്ത അന്വേഷണമാണ് നടക്കുക.
പാരഡൈസ് പേപ്പറുകളില്‍ പരാമര്‍ശിക്കപ്പെട്ട നിരവധി സ്ഥാപനങ്ങള്‍ നിലവില്‍ അന്വേഷണം നേരിടുന്നവയാണ്. അടിയന്തര നടപടിക്ക് ആദായ നികുതി വകുപ്പിന് നിര്‍ദ്ദേശം നല്‍കിയിട്ടുണ്ടെന്നും സര്‍ക്കാര്‍ വ്യക്തമാക്കി.
