കൊല്ലം: പുറ്റിങ്ങല് വെടിക്കെട്ട് അപകടത്തില് പരിക്കേറ്റവര്ക്ക് നഷ്ടപരിഹാരം അനുവദിച്ചുള്ള സര്ക്കാര് ഉത്തരവ്, ഇരകള്ക്ക് ഗുണകരമല്ലാത്ത രീതിയില് വ്യാഖ്യാനിച്ച കൊല്ലം ജില്ലാഭരണകൂടത്തിനെതിരെ സംസ്ഥാന മനുഷ്യാവകാശകമ്മീഷന്. ഇത്തരം നടപടികള് ശരിയല്ലെന്ന് കമ്മീഷന് അംഗം കെ.മോഹന്കുമാര് ഉത്തരവില് പറഞ്ഞു.
പുനലൂര് ശിവന്കോവില് സ്വദേശി ടി.എം.കൃഷ്ണകുമാര് സമര്പ്പിച്ച പരാതിയിലാണ് നടപടി. പുറ്റിങ്ങല് വെടിക്കെട്ട് അപകടത്തില് വിരലുകള്ക്ക് സാരമായി പരിക്കേറ്റ കൃഷ്ണകുമാറിന് സംസ്ഥാനസര്ക്കാര് പ്രഖ്യാപിച്ച നഷ്ടപരിഹാരം ലഭിച്ചില്ലെന്ന് പരാതിയില് പറയുന്നു.
കമ്മീഷന് പുനലൂര് വില്ലേജ് ഓഫീസില് നിന്നും റിപ്പോര്ട്ട് വാങ്ങിയിരുന്നു. പരാതിക്കാരന് ഹാജരാക്കിയ മെഡിക്കല്സര്ട്ടിഫിക്കറ്റിന്റെ അടിസ്ഥാനത്തില് താലൂക്കിലേക്ക് ചികിത്സാസഹായം നല്കണമെന്ന ശുപാര്ശ നല്കിയിരുന്നതായി റിപ്പോര്ട്ടില് പറയുന്നു. എന്നാല് ജില്ലാകളക്ടര് ഹാജരാക്കിയ റിപ്പോര്ട്ടില് ഐപിയില് ചികിത്സിച്ചവര്ക്കാണ് ധനസഹായം വിതരണം ചെയ്യുന്നതെന്നും ഒപി വിഭാഗത്തില് ചികിത്സ തേടിയവര്ക്ക് നിയമാനുസൃതം ധനസഹായം നല്കാനാവില്ലെന്നും പറയുന്നു. എന്നാല് നിസാരപരിക്ക് പറ്റിയവര്ക്ക് 50,000 രൂപ അനുവദിച്ചതായാണ് കളക്ടറുടെ റിപ്പോര്ട്ടിനൊപ്പം സമര്പ്പിച്ച 2016 ഏപ്രില് 20ലെ സര്ക്കാര് ഉത്തരവില് പറയുന്നത്.
ഉത്തരവില് ഒപി, ഐപി വിഭാഗങ്ങളെ കുറിച്ച് പരാമര്ശമില്ലെന്നും കമ്മീഷന് കണ്ടെത്തി. പരാതിക്കാരന് വെടിക്കെട്ട് അപകടത്തില് പരിക്കേറ്റ സര്ട്ടിഫിക്കറ്റ് നല്കിയിട്ടുണ്ടെന്ന് വില്ലേജ് ഓഫീസറുടെ റിപ്പോര്ട്ടില് പറയുന്നു. അതിനര്ത്ഥം ചികിത്സാധനസഹായം അനുവദിച്ചുകൊണ്ടുള്ള സര്ക്കാര് ഉത്തരവ് തെറ്റായി വ്യാഖാനിച്ചു എന്നാണ്. പരാതിക്കാരനായ കൃഷ്ണകുമാറിന്റെ അപേക്ഷ പുന:പരിശോധിച്ച് ഉചിതനടപടികള് സ്വീകരിക്കണമെന്ന് കമ്മീഷന് കൊല്ലം ജില്ലാകളക്ടര്ക്ക് ഉത്തരവ് നല്കി.
