എഐവൈഎഫ് പ്രവര്ത്തകര് ആലപ്പുഴയില് മന്ത്രി തോമസ് ചാണ്ടിയുടെ കോലവുമായി നടത്തിയ പ്രതിഷേധ മാര്ച്ച്
ആലപ്പുഴ: പാര്ട്ടി ജനറല് സെക്രട്ടറി സുധാകര് റെഡ്ഡിയെ അഴിമതിക്കാരനെന്ന് അധിക്ഷേപിച്ചിട്ടും മന്ത്രി തോമസ് ചാണ്ടിക്കെതിരെ സിപിഐ സംസ്ഥാന നേതൃത്വം പ്രതികരിക്കാത്തതില് പാര്ട്ടിയില് ഭിന്നത രൂക്ഷം.
പാര്ട്ടി വിലക്ക് മറികടന്ന് ആലപ്പുഴയില് എഐവൈഎഫ് പ്രവര്ത്തകര് തോമസ്ചാണ്ടിയുടെ കോലം കത്തിച്ചു. മന്ത്രിയുടെ ഓഫീസിലേക്ക് മാര്ച്ച് നടത്തിയ പ്രവര്ത്തകരെ പോലീസ് തടഞ്ഞു. ജനജാഗ്രതാ യാത്ര കഴിയുന്നതുവരെ ചാണ്ടി വിഷയത്തില് പരസ്യ പ്രതികരണം വേണ്ടെന്ന സിപിഐ സംസ്ഥാന നേതൃത്വത്തിന്റെ നിലപാട് എഐവൈഎഫ് ലംഘിച്ചതോടെ പാര്ട്ടിയിലെ ഭിന്നത മറനീക്കി.
പ്രതിപക്ഷ കക്ഷികളോ, എതിര്പക്ഷത്തുള്ള മറ്റു പാര്ട്ടികളോ പോലും നടത്താത്ത ആക്ഷേപമാണ് ഘടകകക്ഷി മന്ത്രിയുടെ ഭാഗത്ത് നിന്നും ഉണ്ടായിട്ടുള്ളത്. തോമസ് ചാണ്ടിയോ, എന്സിപിയോ ഇത് തിരുത്താനും തയ്യാറായിട്ടില്ല. എന്നിട്ടും സിപിഐ ഔദ്യോഗിക നേതൃത്വം ശക്തമായ പ്രതികരണം നടത്താന് തയ്യാറാകാത്തതില് പാര്ട്ടിയില് പ്രതിഷേധം വ്യപകമാണ്.
സംസ്ഥാന സെക്രട്ടറി കാനം രാജേന്ദ്രനെ വേദിയില് ഇരുത്തി കുട്ടനാട്ടില് സിപിഐയേയും, റവന്യുവകുപ്പിനേയും ഭരണകൂടത്തെ തന്നെയും ചാണ്ടി വെല്ലുവിളിച്ചിട്ടും ശക്തമായ പ്രതികരണം ഉണ്ടാകാതിരുന്നതിനാലാണ് പാര്ട്ടി ജനറല് സെക്രട്ടറിയെ പോലും പരസ്യമായി അവഹേളിക്കാനുള്ള ധൈര്യം ലഭിച്ചതെന്നും സിപിഐക്കാര് പറയുന്നു.
മുഖ്യമന്ത്രി വിളിച്ചു വരുത്തി ശാസിച്ചു എന്ന് പ്രചാരണം നടക്കുമ്പോഴാണ് ഇടതുമുന്നണിയിലെ രണ്ടാം കക്ഷിയുടെ ഏറ്റവും മുതിര്ന്ന നേതാവിനെ പോലും അഴിമതിക്കാരനെന്ന് വിശേഷിപ്പിച്ച് അപമാനിച്ചത്. സിപിഐയുടെ പാര്ട്ടി സമ്മേളനങ്ങളിലും ചാണ്ടിയുമായി ബന്ധപ്പെട്ട വിഷയങ്ങള് ഔദ്യോഗിക പക്ഷത്തിനെതിരെ ആയുധമായി ഉപയോഗിക്കുകയാണ് മറുപക്ഷം.
നേരത്തെ ചാണ്ടിയുടെ റിസോര്ട്ടിലേക്ക് റോഡ് നിര്മ്മിക്കാന് കെ.ഇ. ഇസ്മയില് എംപി ഫണ്ട് അനുവദിച്ചത് ഔദ്യോഗിക പക്ഷം ആയുധമാക്കിയെങ്കില്, ചാണ്ടിക്കു മുന്നില് പാര്ട്ടിയുടെ അഭിമാനം പോലും നഷ്ടപ്പെടുത്തി എന്ന വിമര്ശനം ഉന്നയിച്ചാണ് മറുപക്ഷം തിരിച്ചടിക്കുന്നത്. വരും ദിവസങ്ങളില് ചാണ്ടിയുടെ കയ്യേറ്റവും പ്രസംഗവും സിപിഐയുടെ ഉള്പാര്ട്ടി വിഷയമായി മാറുമെന്ന സന്ദേശമാണ് കോലംകത്തിക്കല് അടക്കമുള്ള പരസ്യ പ്രതികരണങ്ങള് വ്യക്തമാക്കുന്നത്.
