മൂന്നാര്: ബിവറേജസ് ഔട്ട്ലെറ്റ് തുറക്കുന്നതിനെതിരെ നാട്ടുകാരും ജനപ്രതിനിധികളും നടത്തിയ പ്രതിഷേധ സമരത്തില് സംഘര്ഷം. പോലീസുകാരടക്കം അഞ്ച് പേര്ക്ക് ലാത്തി ചാര്ജ്ജിനിടെ പരുക്കേറ്റു. ഇന്നലെ രാവിലെ 11ഓടെയാണ് സംഭവം.
പോലീസിന്റെ ലാത്തിചാര്ജ്ജില് യൂത്ത് കോണ്ഗ്രസ് നേതാവ് സി. നെല്സ(38)നും പരിക്കേറ്റു. അഭിലാഷ് (32), സുനില്രാജ് (38), ജിജീഷ് സെബാസ്റ്റ്യന് (33) തുടങ്ങിയ പോലീസുകാര്ക്കും പരിക്ക്. പരിക്കേറ്റവരെ സ്വകാര്യ ആശുപത്രിയില് പ്രവേശിപ്പിച്ചു. സംഘര്ഷവുമായി ബന്ധപ്പെട്ട് രണ്ട് പേരെ പോലീസ് കസ്റ്റഡിയിലെടുത്തു. ഇക്കാനഗര് സ്വദേശികളായ ജോസഫ് ആന്റണി(38), മുത്തു(33) എന്നിവരെയാണ് കസ്റ്റഡിയിലെടുത്തത്.
മൂന്നാര് ഇക്കാനഗറില് ജനവാസ മേഖലയില് ബിവറേജസ് ഔട്ട്ലെറ്റ് തുറന്നു പ്രവര്ത്തിക്കാനുള്ള നീക്കത്തിനിടെയാണ് സംഘര്ഷം. പോലീസ് സംരക്ഷണത്തില് ബിവറേജ് ഔട്ലെറ്റ് തുറന്നു പ്രവര്ത്തിക്കുന്നതിനിടെയാണ് പ്രശ്നം. പോലീസും നാട്ടുകാരും തമ്മില് ഉണ്ടായ സംഘര്ഷത്തെ തുടര്ന്ന് ലാത്തി ചാര്ജ് നടത്തി. ലാത്തി ചാര്ജില് പ്രതിഷേധിച്ച് വൈദികന്റെയും നാട്ടുകാരുടെയും നേതൃത്വത്തില് പ്രതിഷേധ സമരവും നടന്നു. വിജയപുരം സോഷ്യല് സര്വ്വീസ് സൊസൈറ്റിയുടെ മൂന്നാര് റീജണ് ഡയറക്ടര് ഫാ.ഷിന്റോയുടെ നേതൃത്വത്തിലാണ് സമരം ആരംഭിച്ചിരിക്കുന്നത്. ഇക്കാനഗറില് താമസിക്കുന്ന സ്ത്രീകളടക്കമുള്ള നൂറോളം പേര് സമരത്തില് പങ്കെടുത്തു. ബിവറേജസില് സ്റ്റോക്കെത്തിച്ച് ലോഡിറക്കുന്നത് വ്യാഴാഴ്ച രാത്രിയോടെ നാട്ടുകാരുടെ നേതൃത്വത്തില് ഒരു സംഘം ആളുകള് തടഞ്ഞതിനെ തുടര്ന്ന് ജീവനക്കാര് മടങ്ങുകയും ചെയ്തിരുന്നു. ഇന്നലെ രാവിലെ ബിവറേജ് ഒട്ട്ലെറ്റ് തുറന്നു പ്രവര്ത്തനം ആരംഭിച്ചതോടെയാണ് നാട്ടുകാരുടെ നേതൃത്വത്തില് സ്ത്രീകളടക്കം പ്രതിഷേധവുമായി രംഗത്തെത്തിയത്. വൈദ്യുതി വകുപ്പിന്റെ അധീനതയിലുള്ള കെട്ടിടത്തിലാണ് ബിവറേജസ് പ്രവര്ത്തനം ആരംഭിച്ചിരിക്കുന്നത്.
