തൊടുപുഴ: വൈദ്യുതി ബില്ലടയ്ക്കാത്തതിനെത്തുടര്ന്ന് തൊടുപുഴ മിനി സിവില് സ്റ്റേഷനിലെ വൈദ്യുതി ബന്ധം വിച്ഛേദിച്ചു. ഇന്നലെ രാവിലെ 11 മണിയോടെയാണ് തൊടുപുഴ കെഎസ്ഇബി സെഷനിലെ ഉദ്യോഗസ്ഥരെത്തി വൈദ്യുതി ബന്ധം വിച്ഛേദിച്ചത്.
വൈദ്യുബില്ലടയ്ക്കാത്തതിനെത്തുടര്ന്നാണ് നടപടി. ഒരു ലക്ഷത്തി മുപ്പതിനായിരം രൂപയാണ് അടയ്ക്കാനുണ്ടായിരുന്നത്. സിവില് സ്റ്റേഷനില് പ്രവര്ത്തിക്കുന്ന കുടുംബക്കോടതി ഒഴികെ എല്ലാ സര്ക്കാര് ഓഫീസുകളിലെയും പ്രവര്ത്തനം തടസപ്പെട്ടു. സബ് ട്രഷറി, താലൂക്ക് ഓഫീസ്,സപ്ലൈ ഓഫീസ്, സ്റ്റേഷനറി ഓഫീസ്,പൊതുമരാമത്ത് ഇലക്ട്രിക്കല് വിഭാഗം, ലേബര് ഓഫീസ്, സ്റ്റാറ്റിറ്റിക്സ് ഓഫീസ്, എന്നിങ്ങനെ പ്രധാനപ്പെട്ട എല്ലാ ഓഫീസുകളിലെയും പ്രവര്ത്തനം താളം തെറ്റി. പല ഓഫീസുകളിലും മൊബൈല് വെട്ടത്തിലാണ് പേരിനെങ്കിലും ഇടപാടുകള് നടത്തിയത്. താലൂക്ക് ഓഫീസില് ഒരു മീറ്ററാണ് വച്ചിരിക്കുന്നത്. മറ്റ് സര്ക്കാര് സ്ഥാപനങ്ങളിലേക്ക് ഈ മീറ്ററില് നിന്നാണ് വൈദ്യുതി നല്കുന്നത്. വിവിധ ഓഫീസുകളില് നിന്നും തുക ശേഖരിച്ച് താലൂക്ക് ഓഫീസിലെ സെഷനില് നിന്നാണ് വൈദ്യുതി ബില്ല് അടച്ചിരുന്നത്.
ഇത്തവണ ബില്ല് ശേഖരിക്കാന് കഴിയാതെ വന്നതാണ് വൈദ്യുതി ബന്ധം വിച്ഛേദിക്കാന് ഇടയാക്കിയത്. വൈദ്യുതി ബില്ലും പിഴത്തുകയും ഉടന് നല്കാമെന്ന് കാണിച്ച് കെഎസ്ഇബി അധികൃതര്ക്ക് താലൂക്ക് ഓഫീസില് നിന്നും കത്ത് നല്കിയതോടെ വൈകിട്ട് അഞ്ച് മണിക്ക് വൈദ്യുതി ബന്ധം പുനസ്ഥാപിക്കുകയായിരുന്നു. വൈദ്യുതി വിച്ഛേദിച്ചതോടെ വിവിധ ഓഫീസുകളില് ഇടപാടുകള്ക്കായി എത്തിയ ജനങ്ങള് വലഞ്ഞു.
