തലശ്ശേരി: ധര്മ്മടം പഞ്ചായത്തിലെ മേലൂരില് സിപിഎം ക്രിമിനല് സംഘം ആയുധങ്ങളുമായി കൊലവിളി നടത്തി. മേലൂര് ലാസ്റ്റ് ബസ് സ്റ്റോപ്പിന് സമീപം ബോംബുകളും വടിവാള് ഉള്പ്പെടെയുള്ള മാരകായുധങ്ങളുമായി എത്തിയ സംഘം ഇവിടെയുണ്ടായിരുന്ന സംഘപരിവാര് സംഘടനകളുടെ കൊടിതോരണങ്ങളും ആല്മരവും നശിപ്പിച്ചു. ഇവിടെ റോഡരികില് 30 മീറ്റര് നീളത്തില് സംഘപ്രവര്ത്തകര് നിര്മ്മിച്ച പച്ചക്കറിത്തോട്ടം പൂര്ണ്ണമായും നശിപ്പിച്ചു.
തലേദിവസം സിപിഎമ്മിന്റെ ലോക്കല് സമ്മേളനം ഇവിടെ നടന്നിരുന്നു. ഇതോടനുബന്ധിച്ച് നടന്ന് പൊതുയോഗത്തിലും പ്രകടനത്തിലും ഏറെ പ്രകോപനപരമായ മുദ്രാവാക്യങ്ങളും പ്രസംഗവുമാണ് നേതാക്കള് നടത്തിയത്. നോര്ത്ത് ലോക്കല് സമ്മേളനമാണ് നടന്നതെങ്കിലും മറ്റ് പലസ്ഥലങ്ങളില്നിന്നും പ്രവര്ത്തകര് എത്തിയിരുന്നു. മറ്റ് പ്രദേശങ്ങളിലുള്ള സ്ഥിരം സിപിഎം ക്രിമിനലുകള് മദ്യപിച്ച് സ്വബോധമില്ലാതെയായിരുന്നു ഇവിടെ കൊലവിളി നടത്തിയത്.
ബിജെപി പ്രവര്ത്തകര് ധര്മ്മടം പോലീസില് പരാതി നല്കിയെങ്കിലും യാതൊരു നടപടിയും ഉണ്ടായിട്ടില്ല. മേലൂര് ചെഗുവേര ക്ലബ്ബിന് സമീപമുള്ള മഹേഷ്, മനേഷ് എന്നിവരുടെ നേതൃത്വത്തിലുള്ള പത്തംഗ സംഘമാണ് അക്രമങ്ങള് കാട്ടിയത്. സമാധാനാന്തരീക്ഷം നിലില്ക്കുന്ന മേലൂര് മേഖലയില് കരുതിക്കൂട്ടി സംഘര്ഷം സൃഷ്ടിക്കാനുള്ള സിപിഎം നീക്കം എന്തുവിലകൊടുത്തും നേരിടുമെന്നും അക്രമികള്ക്കെതിരെ പോലീസ് ശക്തമായ നടപടി സ്വീകരിക്കണമെന്നും ബിജെപി ധര്മ്മടം പഞ്ചായത്ത് കമ്മറ്റി അധികൃതരോട് ആവശ്യപ്പെട്ടു. ഇ.വി.അഭിലാഷ് അധ്യക്ഷതവഹിച്ചു. മണ്ഡലം സെക്രട്ടറി ജിനചന്ദ്രന് പ്രസംഗിച്ചു.
