മഡ്ഗാവ്: ഫട്ടോര്ദ സ്റ്റേഡിയത്തില് ഇന്ന് രാത്രി 8ന് നടക്കുന്ന രണ്ടാം പ്രീ ക്വാര്ട്ടറില് ഏഷ്യന് കരുത്തരായ ഇറാഖിന്റെ എതിരാളികള് നിലവിലെ റണ്ണറപ്പുകളായ മാലി.
ഗ്രൂപ്പ് എഫില് നിന്ന് ഇംഗ്ലണ്ടിന് പിന്നില് രണ്ടാം സ്ഥാനക്കാരായാണ് ഇറാഖ് ചരിത്രത്തിലാദ്യമായി ലോകകപ്പിന്റെ പ്രീ ക്വാര്ട്ടറിലെത്തിയത്. മൂന്ന് കളികളില് നിന്നും ഒരോ വിജയവും സമനിലയും തോല്വിയുമായിട്ടാണ് ഏഷ്യന് പ്രതിനിധികളായി ഇറാഖിന്റെ നോക്കൗട്ടിലേക്കുള്ള വരവ്. ആദ്യ പോരില് മെക്സിക്കോയെ 1-1 ന് സമനിലയില് തളച്ചു. രണ്ടാം കളിയില് ചിലിയെ 3-0ന് തറപറ്റിച്ചു. മൂന്നാം പോരാട്ടത്തില് ഇംഗ്ലണ്ടിനോട് 4-0ന്റെ കനത്ത തോല്വി ഇറാഖ് നേരിട്ടു.
നാല് ഗോള് എതിരാളികള്ക്ക് സമ്മാനിച്ച ഇറാഖ് അഞ്ച് ഗോള് വഴങ്ങി. രണ്ട് കളികളില് നിന്നും മൂന്ന് ഗോള് ഇറാഖിന് സമ്മാനിച്ച സ്ട്രൈക്കര് മുഹമ്മദ് ദാവൂദ് യാസീനാണ് ശ്രദ്ധേയതാരം. ഇംഗ്ലണ്ടിനെതിരായ കളിയില് ഇറങ്ങാതിരുന്ന ദാവൂദ് ഇന്ന് ആദ്യ ഇലവനില് ഉണ്ടാവും. ഇത് ഇറാഖിന്റെ ആത്മവിശ്വാസം ഉയര്ത്തുമെന്ന് ഉറപ്പ്. എന്നാല് പ്രതിരോധത്തിലെ പാളിച്ചയാണ് അവര്ക്ക് ബുദ്ധിമുട്ടുണ്ടാക്കുന്നത്. എതിര് മുന്നേറ്റത്തെ പലപ്പോഴും ഫലപ്രദമായ രീതിയില് പ്രതിരോധിക്കാന് അവര്ക്കാവുന്നില്ല. ക്യാപ്റ്റന് മുഹമ്മദ് റിദ, മൊമെല് കരീം, ബാസിം ഷക്കീര്, ഹബീബ് മുഹമ്മദ് എന്നിവരടങ്ങുന്ന മധ്യനിര മികച്ച പ്രകടനമാണ് നടത്തുന്നത്.
നിലവിലെ റണ്ണറപ്പുകളായ മാലി ഏറെ പ്രതീക്ഷയോടെയാണ് ഇന്ന് ഇറാഖിനെ നേരിടാനിറങ്ങുന്നത്. ഗ്രൂപ്പ് ബിയില് നിന്ന് പരാഗ്വെക്ക് പിന്നില് രണ്ടാം സ്ഥാനക്കാരായാണ് ആഫ്രിക്കന് കരുത്തരായ മാലി പ്രീ ക്വാര്ട്ടറിലേക്ക് യോഗ്യത നേടിയത്. ഗ്രൂപ്പ് ഘട്ടത്തില് മൂന്ന് മത്സരങ്ങളില് രണ്ടെണ്ണം ജയിച്ച അവര് ഒരെണ്ണത്തില് തോറ്റ് ആറ് പോയിന്റ് നേടി.
ആദ്യ മത്സരത്തില് പരാഗ്വെയോട് 3-2ന് തോറ്റ അവര് പിന്നീട് തുര്ക്കിയെ 3-0നും ന്യൂസിലാന്ഡിനെ 3-1നും തകര്ത്തു. എട്ടു ഗോളുകള് എതിരാളികള്ക്ക് സമ്മാനിച്ച മാലി കൗമാരം നാല് എണ്ണം വഴങ്ങി. മൂന്ന് ഗോളുകള് മാലിക്ക് സമ്മാനിച്ച ലസ്സാന നിയെയാണ് ടോപ് സ്കോറര്. ഡെമൗസ ട്രോറെ രണ്ട് ഗോളുകളും നേടി. കരുത്തുറ്റ മധ്യ-മുന്നേറ്റനിരയാണ് മാലിയുടെ ശക്തി. പ്രതിരോധവും മികച്ച പ്രകടനം നടത്തുന്നു. എങ്കിലും അപ്രതീക്ഷിതമായ ആക്രമണത്തില് പ്രതിരോധം പലപ്പോഴും ചിതറുന്നു. ഈ പ്രശ്നം പരിഹരിച്ചാല് മാലിയുടെ കുതിപ്പിന് കരുത്തേകും.തുല്യശക്തികളുടെ പോരാട്ടമാകുമെന്നാണ് ഈ കളി വിലയിരുത്തപ്പെടുന്നത്.
