കൊല്ലം: ആര്എസ്എസ്-ബിജെപി പ്രവര്ത്തകര്ക്ക് നേരെ സിപിഎം നേതൃത്വത്തിലുള്ള കേരളത്തിലെ ഭരണകൂടം ഒത്താശ ചെയ്ത് നടത്തുന്ന അക്രമങ്ങള് അവസാനിപ്പിച്ച് വികസനകാര്യത്തിലാണ് ശ്രദ്ധ പതിപ്പിക്കേണ്ടതെന്ന് ബിജെപി ദേശീയ വക്താവ് ഗോപാല്കൃഷ്ണഅഗര്വാള്.
സംസ്ഥാനത്തിന് പ്രകൃതി കനിഞ്ഞ് നല്കിയ ജൈവസമ്പത്തുണ്ട്. നിരവധി കായലുകളുണ്ട്. ടൂറിസം രംഗത്ത് വളര്ച്ച കൈവരിക്കാനുള്ള എല്ലാ സാധ്യതയുമുള്ള നാടാണിത്. അതിലൂടെ തൊഴിലവസരങ്ങളും വര്ധിപ്പിക്കാനാകും. എന്നാല് രാഷ്ട്രീയ എതിരാളികളെ ഉന്മൂലനം ചെയ്യുന്നതില് മുഴുകിയ കമ്യൂണിസ്റ്റുകളില് നിന്നും സല്ഭരണം എങ്ങനെ പ്രതീക്ഷിക്കാനാകുമെന്ന് അദ്ദേഹം പത്രസമ്മേളനത്തില് ചോദിച്ചു.
കേന്ദ്രനേതൃത്വത്തിന്റെ നിസീമമായ സഹകരണത്തോടെയാണ് കുമ്മനം രാജശേഖരന് നയിക്കുന്ന ജനരക്ഷായാത്ര. യാത്രയ്ക്ക് ജനകീയപിന്തുണ വര്ധിച്ചുവരികയാണ്. സിപിഎമ്മിന്റെ അക്രമരാഷ്ട്രീയത്തിന് എതിരെ സംഘടിതശബ്ദമായാണ് ജനരക്ഷായാത്ര മാറിയിരിക്കുന്നത്. പാര്ട്ടി പ്രവര്ത്തകര്ക്കും ബലിദാനികളുടെ കുടുംബങ്ങള്ക്കും രാജ്യം മുഴുവന് ഒപ്പമുണ്ടെന്ന ആത്മവിശ്വാസം നല്കാന് യാത്ര സഹായിച്ചിട്ടുണ്ട്.
കണ്ണൂരില് ജനാധിപത്യധ്വംസനമാണ് നടക്കുന്നത്. രാജ്യത്ത് ഒരിടത്തും രാഷ്ട്രീയവൈരുധ്യത്തിന്റെ പേരില് ആളുകളെ കൊല്ലുന്നില്ല. എന്നാല് സംസ്ഥാനത്ത് സിപിഎം അത് ആവര്ത്തിച്ചുകൊണ്ടേ ഇരിക്കുന്നു. ഇത്തരത്തില് പോകാനാവില്ല. അതിനുള്ള വിളംബരമാണ് ജനരക്ഷായാത്രയെന്നും അദ്ദേഹം പറഞ്ഞു.
സോളാര് അഴിമതിയും അന്വേഷണവും ഇരുമുന്നണികളുടെയും വികൃതമുഖം വെളിപ്പെടുത്തുന്നതാണ്. യാത്രയില് ബിജെപി ഇത് തുറന്നുകാട്ടും. ജയ്ഷാക്ക് വേണ്ടി കേന്ദ്രം അഴിമതി കാണിച്ചുവെന്ന ആരോപണം അടിസ്ഥാനരഹിതമാണെന്ന് അദ്ദേഹം ചോദ്യത്തിന് മറുപടിയായി പറഞ്ഞു.
സംസ്ഥാനസര്ക്കാര് ജനവഞ്ചകരാണ്. കേന്ദ്രം എക്സൈസ് തീരുവ കുറച്ചിട്ടും ബിജെപി സംസ്ഥാനങ്ങള് വില കുറച്ചിട്ടും പെട്രോള്-ഡിസല് വില കുറയ്ക്കാന് തയ്യാറാകാത്ത എല്ഡിഎഫ് സര്ക്കാരിന്റെ നയം ജനവഞ്ചനയാണ്. എല്ലാ സംസ്ഥാനങ്ങളോടും ഇന്ധനവില കുറയ്ക്കണമെന്ന് പ്രധാനമന്ത്രിയും കേന്ദ്രധനമന്ത്രിയും ആവശ്യപ്പെട്ടിട്ടുണ്ട്.
ഇത് അനുസരിക്കാതെയാണ് കേരളസര്ക്കാരിന്റെ ജനദ്രോഹനിലപാട്. ജിഎസ്ടി കൗണ്സില് തീരുമാനങ്ങളെടുക്കുന്നത് സംസ്ഥാനങ്ങളുമായി ധാരണയിലെത്തിയ ശേഷമാണ്. പുറത്തുവന്നതിന് ശേഷം കേരളം അതിനെ വിമര്ശിക്കുന്നത് ഇരട്ടത്താപ്പാണെന്നും ഗോപാല്കൃഷ്ണഅഗര്വാള് പറഞ്ഞു.
