കോട്ടയം: ആര്ക്കിയോളജിക്കല് സര്വ്വേഓഫ് ഇന്ത്യക്ക് കീഴിലുള്ള കേരളത്തിലെ ചരിത്ര പ്രാധാന്യമുള്ളവിനോദ സഞ്ചാര കേന്ദ്രങ്ങളില് അടിസ്ഥാന സൗകര്യങ്ങള് ഉറപ്പുവരുത്താന് ആവശ്യമായ നടപടികള് കൈക്കൊള്ളുമെന്ന് കേന്ദ്ര സാംസ്ക്കാരികസഹമന്ത്രി ഡോ. മഹേഷ് ശര്മ്മ അറിയിച്ചു.
ആര്ക്കിയോളജിക്കല് സര്വ്വേ ഓഫ് ഇന്ത്യയുടെ ഉദ്യോഗസ്ഥരുമായി നടന്ന ചര്ച്ചയില് സംസ്ഥാനത്തെ ഏഴ് ചരിത്രസ്മാരകങ്ങളില് വിനോദസഞ്ചാരം പ്രോത്സാഹിപ്പിക്കുന്നതിന്റെ ഭാഗമായി ശൗചാലയങ്ങള് ഉള്പ്പെടെയുള്ള സൗകര്യങ്ങളൊരുക്കുമെന്ന് മന്ത്രി അറിയിച്ചു.
ആര്ക്കിയോളജിക്കല് സര്വ്വേ ഓഫ് ഇന്ത്യയുടെ ഭാഗിക സംരക്ഷണയിലുള്ള േദവസ്വംബോര്ഡിന്റെ ക്ഷേത്ര സ്മാരകങ്ങളുടെയും ചുമര്ചിത്രങ്ങളുടെയും പൂര്ണ സംരക്ഷണവും പരിപാലനവും ഉറപ്പാക്കാന് അവ പുനര്വിജ്ഞാപനം ചെയ്യണമെന്ന ആവശ്യം പരിഗണിക്കുമെന്നും കേന്ദ്രമന്ത്രി അറിയിച്ചു. ലോകപൈതൃക സാധ്യതാ പട്ടികയിലുള്ള മട്ടാഞ്ചേരി കൊട്ടാരത്തിന്റേതുള്പ്പെടെയുള്ള സ്മാരകങ്ങള്ക്ക് ദേവസ്വംബോര്ഡുമായുള്ള തര്ക്കമൊഴിവാക്കാനാണ് പുനര്വിജ്ഞാപനം ചെയ്യണമെന്ന് ആര്ക്കിയോളജിക്കല് സര്വ്വേ ആവശ്യപ്പെട്ടിട്ടുള്ളത്.
വയനാട്ടിലെ പനമരത്തുള്ള ജനാര്ദ്ദന ക്ഷേത്രത്തിന്റെ സംരക്ഷണം ഏറ്റെടുക്കാന് വിജ്ഞാപനം നടത്തണമെന്ന് ആവശ്യപ്പെട്ട് ആര്ക്കിയോളജിക്കല് സര്വ്വേ ഓഫ് ഇന്ത്യ 2008ല് നല്കിയ നിര്ദേശം പരിഗണിക്കുമെന്നും ഇക്കാര്യം സംസ്ഥാന ഗവണ്മെന്റുമായി ചര്ച്ച ചെയ്യുമെന്നും ഡോ. മഹേഷ് ശര്മ്മ അറിയിച്ചു.
ചരിത്ര സ്മാരകങ്ങളായ കണ്ണൂര് സെന്റ് ആഞ്ചലോ ഫോര്ട്ട്, പാലക്കാട് കോട്ട, കന്യാകുമാരി ജില്ലയിലുള്ള വട്ടക്കോട്ട എന്നിവിടങ്ങളില് പ്രവേശന ഫീസ് ഏര്പ്പെടുത്തുന്ന കാര്യവും പരിഗണിക്കുമെന്നും കേന്ദ്രമന്ത്രി ചര്ച്ചയില് ഉറപ്പുനല്കി. കൂടാതെ പാലക്കാട് കോട്ടയ്ക്കകത്ത് സ്ഥിതിചെയ്യുന്ന സംസ്ഥാന ഗവണ്മെന്റിന്റെ അധീനതയിലുള്ള വിവിധ സ്ഥാപനങ്ങളുടെ സംരക്ഷണത്തിന്റെ കാര്യങ്ങളില് സംസ്ഥാന ഗവണ്മെന്റിന് കത്തയയ്ക്കുമെന്നും അദ്ദേഹം അറിയിച്ചു.
മട്ടാഞ്ചേരി കൊട്ടാരത്തില് പ്രവേശന ഫീസിനത്തിലുള്ള വരുമാനം വര്ദ്ധിപ്പിക്കുന്നതിന്റെ ഭാഗമായി വിദേശവിനോദ സഞ്ചാരികളില് നിന്ന് നിലവില് ഈടാക്കുന്ന അഞ്ചുരൂപയില് വര്ദ്ധനവ് വരുത്തണമെന്ന ആര്ക്കിയോളജിക്കല് സര്വ്വേഓഫ് ഇന്ത്യയുടെ നിര്ദ്ദേശം പരിഗണിക്കാമെന്നും മന്ത്രി ഉറപ്പ് നല്കി.
