കണ്ണൂര്: ഭിന്നശേഷി പൗരന്മാര് നേരിടുന്ന അവഗണനയെക്കുറിച്ച് പൊതുജനങ്ങളെ ബോധവല്ക്കരിക്കുന്നതിന്റെ ഭാഗമായി 12ന് കണ്ണൂര് കലക്ട്രേറ്റ് മുന്നില് കാലത്ത് പത്തിന് ബോധവല്ക്കരണ പരിപാടി സംഘടിപ്പിക്കും.
സംസ്ഥാനത്ത് ഭിന്നശേഷിക്കാരുടെ സമഗ്രവികസനത്തിന് വേണ്ടി സര്ക്കാര് വിവിധ പദ്ധതികള് തയ്യാറാകമ്പോഴും 80 ശതമാനം ഭിന്നശേഷിക്കാര്ക്കും ഇതിന്റെ ഗുണഫലം നിഷേധിക്കപ്പെടുകയാണ്. ആനുകൂല്യങ്ങള് അനുവദിക്കേണ്ട ബന്ധപ്പെട്ട ഉദ്യോഗസ്ഥന്മാരുടെ അലംഭാവമാണ് ഇതിന് പ്രധാന കാരണം. ബുദ്ധിവികാസം കുറഞ്ഞവരാണ് അവഗണന നേരിടുന്നവരില് ഭൂരിഭാഗവും. 2016 ല് നിലവില് വന്ന റൈറ്റ് ഓഫ് പേഴ്സണ്സ് ആന്റ് ഡിസബിലിറ്റീസ് ആക്ടില് പല വകുപ്പുകളും ഭിന്നശേഷിക്കാരുടെ അവകാശങ്ങള് സംരക്ഷിക്കുമെന്ന് ഉറപ്പ് നല്കുന്നുണ്ടെങ്കിലും യാതൊന്നും കൃത്യമായി ലഭിക്കുന്നില്ലെന്നതാണ് വസ്തുത. ഭരണഘടനയില് എല്ലാ പൗരന്മാര്ക്കും പ്രാഥമിക വിദ്യാഭ്യാസം ഉറപ്പ് നല്കുന്നുണ്ടെങ്കിലും ബുദ്ധിവികാസം വൈകുന്ന വിദ്യാര്ത്ഥികള്ക്ക് വേണ്ടി സര്ക്കാര് മേഖലയില് തിരുവനന്തപുരത്തെ എസ്ഐഎംസി എന്ന ഒരൊറ്റ സ്ഥാപനമാണ് നിലവിലുള്ളത്. സര്ക്കാര് സ്കൂളുകളില് സംയോജിത വിദ്യാഭ്യാസത്തിനുള്ള അവകാശം, ആവശ്യമായ സ്പെഷ്യല് പരിശീലനകേന്ദ്രം, 18 വയസ്സുവരെ പുസ്തകം, പഠനോപകരണങ്ങള് എന്നിവ സൗജന്യമായി നല്കല്, അര്ഹതയുള്ളവര്ക്ക് സ്കോളര്ഷിപ്പ് എന്നിവയ്ക്കെല്ലാം ഭിന്നശേഷിക്കാരായ വിദ്യാര്ത്ഥികള്ക്ക് അര്ഹതയുണ്ടെങ്കിലും ഇതൊന്നും പൂര്ണമായി ലഭിക്കുന്നില്ല.
എല്ലാ പഞ്ചായത്തുകളിലും ഒരു ബഡ്സ് സ്കൂള് ഉണ്ടാവണമെന്നാണെങ്കിലും സംസ്ഥാനത്ത് ബഡ്സ് സ്കൂളുകള് തീരെയില്ലാത്ത നിരവധി പഞ്ചായത്തുകളുമുണ്ട്. 2550 വരെ കുട്ടികളുള്ള സ്പെഷ്യല് സ്കൂളുകള്ക്ക് എയഡഡ് പദവി നല്കുമെന്ന് പറയുന്നുണ്ടെങ്കിലും ഇത് വരെ അത് നടപ്പിലാക്കിയിട്ടില്ല. സ്വകാര്യ മേഖലയില് അയ്യായിരത്തോളം വിദ്യാര്ത്ഥികള് പഠിക്കുന്ന 294 സ്പെഷ്യല് സ്കൂളുകള് സംസ്ഥാനത്തുണ്ടെങ്കിലും ഒന്നിന് പോലും എയ്ഡഡ് പദവി നല്കി സര്ക്കാര് അംഗീകരിച്ചിട്ടില്ല.ഭിന്നശേഷിക്കാരുടെ സേവനവുമായി ബന്ധപ്പെട്ട് പ്രവര്ത്തിക്കുന്ന അധ്യാപക അനധ്യാപക ജീവനക്കാരുടെ കാര്യം അതിലേറെ ദയനീയമാണ്. ഏറ്റവും കൂടുതല് പരിഗണന ലഭിക്കേണ്ട ഇവര്ക്ക് തീര്ത്തും അവഗണനയാണ് ലഭിച്ച് കൊണ്ടിരിക്കുന്നത്. 25 വര്ഷത്തിലധികം സര്വ്വീസുള്ള സ്പെഷ്യല് സ്കൂള് അധ്യാപകര്ക്ക് ഇപ്പോഴും 4000 മുതല് 5000 രൂപ വരെയാണ് ശമ്പളം. സൗജന്യ വിദ്യാഭ്യാസ പരിശീലനങ്ങള്ക്ക് പുറമെ അച്ഛനമ്മമാര് നഷ്ടപ്പെടുന്നവരുടെ പുനരധിവാസം ഉറപ്പ് വരുത്താന് ജില്ലകള് തോറും ആവശ്യമായ കേന്ദ്രങ്ങള് ആരംഭിക്കേണ്ടതും അത്യാവശ്യമാണ്.
ഭാരവാഹികളായ എം.പി.കരുണാകരന്, പി.ശോഭന, പി.സി.ശ്രീകല, ഗീത വത്സരാജ്, പി.നിര്മലാനന്ദന് എന്നിവര് വാര്ത്താസമ്മേളനത്തില് സംബന്ധിച്ചു.
