തൊടുപുഴ : പണി പൂര്ത്തിയായി ഒരു വര്ഷം കഴിഞ്ഞിട്ടും കര്ഷക ഓപ്പണ് മാര്ക്കറ്റ് ജനങ്ങള്ക്ക് പ്രയോജനം ലഭിക്കുന്നില്ല. മുട്ടം ഗ്രാമ പഞ്ചായത്ത് ഓഫീസ് കെട്ടിടത്തിനോട് ചേര്ന്ന് തൊടുപുഴ ബ്ലോക്ക് പഞ്ചായത്തിന്റെ കഴിഞ്ഞ ഭരണ സമിതിയാണ് ഓപ്പണ് മാര്ക്കറ്റ് നിര്മ്മിച്ചത്.
2014-2015 സാമ്പത്തിക വര്ഷത്തില് ഹില് ഏരിയ ഡവലപ്പ്മെന്റ് ഏജന്സി പദ്ധതിയില് ഉള്പ്പെടുത്തി പതിനഞ്ച് ലക്ഷം രൂപ ചിലവഴിച്ചാണ് കര്ഷക ഓപ്പണ് മാര്ക്കറ്റ് പണി കഴിപ്പിച്ചത്. കഴിഞ്ഞ മാര്ച്ച് മാസത്തിന് മുമ്പ് മാര്ക്കറ്റിന്റെ പണി പൂര്ത്തീകരിച്ചതാണെങ്കിലും ഉദ്ഘാടനം നടത്താത്തതിന്റെ പേരിലാണ് ഇത് ജനങ്ങള്ക്ക് പ്രയോജനമാകാതെ അടഞ്ഞ് കിടക്കുന്നത്. ടൈല്സ് പാകിയ നാല് ഷട്ടര് മുറിയും ശൗചാലയ സൗകര്യത്തോടെയുമാണ് ഇതിന്റെ പണികള് പൂര്ത്തീകരിച്ചിരിക്കുന്നത്. മുട്ടം ഗ്രാമപഞ്ചായത്ത് പ്രദേശത്തെ കര്ഷകര് ഉല്പാദിപ്പിക്കുന്ന കാര്ഷിക ഉല്പന്നങ്ങള് വിറ്റഴിക്കുന്നതിനും ഇടനിലക്കാരുടെ ചൂഷണമില്ലാതെ കുറഞ്ഞ വിലക്ക് മായം കലരാത്ത കാര്ഷിക ഉല്പന്നങ്ങള് ജനങ്ങള്ക്ക് നേരിട്ട് ലഭ്യമാവുന്നതിനും വേണ്ടിയാണ് മാര്ക്കറ്റ് മുട്ടത്ത് സ്ഥാപിച്ചത്.
മുട്ടം ഗ്രാമപഞ്ചായത്ത് വക സ്ഥലത്ത് തൊടുപുഴ ബ്ലോക്കാണ് ഓപ്പണ് മാര്ക്കറ്റ് സ്ഥാപിച്ചത് എന്നതിനാല് കെട്ടിടത്തിന്റെ ഉടമസ്ഥാവകാശം സംബന്ധിച്ച് മുട്ടം ഗ്രാമ പഞ്ചായത്തും തൊടുപുഴ ബ്ലോക്ക് പഞ്ചായത്തും തമ്മിലുള്ള അധികാര തര്ക്കമാണ് കെട്ടിടത്തിന്റെ ഉദ്ഘാടനം വൈകിപ്പിക്കുന്നത്.
