കുന്നത്തൂര്: മൈനാഗപ്പള്ളിയില് ഞായറാഴ്ച മോട്ടോര് വാഹന വകുപ്പ് നടത്തിയ പ്രത്യേക വാഹന പരിശോധനയില് നിയമലംഘനം നടത്തിയ നിരവധി വാഹനങ്ങള് പിടിയിലായി. പ്രവര്ത്തനരഹിതമായ സ്പീഡ് ഗവര്ണര്, തകരാറിലായ ബ്രേക്ക് സംവിധാനം, മോശമായ ടയര് തുടങ്ങി നിരവധി സാങ്കേതിക തകരാറുകള് കണ്ടെത്തിയതിനെത്തുടര്ന്ന് സ്വകാര്യ ബസിന്റെ ഫിറ്റ്നെസ്സ് റദ്ദാക്കി.
കൂടാതെ നാല് കള്ള ടാക്സികളും ഒരു ഹെവി കോണ്ട്രാക്ട് ക്യാരേജ് ഉള്പ്പടെ നികുതി അടയ്ക്കാത്ത നാല് വാഹനങ്ങള് പിടികൂടി. ലൈസന്സില്ലാതെ വാഹനം ഓടിച്ച എട്ട് കുട്ടിഡ്രൈവര്മാരും, ഇന്ഷ്വറന്സ് ഇല്ലാത്ത നിരവധി വാഹനങ്ങളും പിടിയിലായി.
ഹെല്മറ്റ് ധരിക്കാത്ത ഇരുപത്തിയെട്ട് പേരും സീറ്റ് ബെല്റ്റ് ധരിക്കാത്ത നാല് പേരും പിഴ അടച്ചു. പരിശോധനയ്ക്കായി നിര്ത്താതെപോയ വാഹന ഉടമകള്ക്കെതിരെ ശക്തമായ നടപടി സ്വീകരിക്കുമെന്ന് ഉദ്യോഗസ്ഥര് പറഞ്ഞു. പ്രൈവറ്റ് വാഹനത്തിലെ പോലെ നമ്പര് പ്രദര്ശിപ്പിച്ച ടാക്സി പിടിച്ചെടുത്തു.
