തിരുവനന്തപുരം: സ്കൂള് കലോത്സവ ചട്ടങ്ങള് പരിഷ്ക്കരിക്കുന്നതോടെ കേരളത്തിന്റെ തനതുകലയായ കേരളനടനത്തെ വികൃതമാക്കാന് നീക്കം. ആണ്കുട്ടികള്ക്കും പെണ്കുട്ടികള്ക്കും വെവ്വേറെ നടത്തിയിരുന്ന ചില മത്സരങ്ങള് ഇരുവിഭാഗങ്ങള്ക്കും ഒന്നായി നടത്താന് ഗുണമേന്മാകമ്മറ്റി റിപ്പോര്ട്ട് നല്കിയിരുന്നു. ഒന്നാക്കി മാറ്റിയ മത്സര ഇനങ്ങളില് കേരളനടനത്തെയും ഉള്പ്പെടുത്തി. റിപ്പോര്ട്ട് പൊതു വിദ്യാഭ്യാസവകുപ്പ് അംഗീകരിച്ചതോടെയാണ് കേരള നടനം പ്രതിസന്ധിയിലാകുന്നത്. വിദ്യാഭ്യാസവകുപ്പിന്റെ തീരുമാനത്തില് വിദ്യാര്ത്ഥികളും നൃത്ത അധ്യാപകരും ഒരു പോലെ ആശങ്കയിലാണ്.
നാട്യാചാര്യന് ഗുരുഗോപിനാഥ് ചിട്ടപ്പെടുത്തിയതാണ് കേരള നടനം. കഥകളി മുദ്രകളെ മാറ്റി പണ്ഡിതനും പാമരുനും ഒരുപോലെ നടനം അഭ്യസിക്കണം എന്ന രീതിയിലാണ് കേരള നടനം ചിട്ടപ്പെടുത്തിയത്. കഥകളിയുടെ വേഷഭൂഷാദികള് കേരളനടനത്തില് ഇല്ല. വളരെ പെട്ടെന്ന് മനസ്സിലാക്കാന് സാധിക്കാത്ത കഥകളി മുദ്രകള് നാട്യധര്മ്മിയിലാണ് ചിട്ടിപ്പെടുത്തിയിട്ടുള്ളത്. എന്നാല് കേരളനടന മുദ്രകള് പെട്ടെന്ന് മനസ്സിലാക്കാവുന്ന തരത്തില് ലോകധര്മ്മിയിലാണ് ചിട്ടപ്പെടുത്തിയിരിക്കുന്നത.് ഹസ്തലക്ഷണ എന്ന ഗ്രന്ഥത്തില് നിന്നാണ് കഥകളിക്കും കേരളനടനത്തിനുമുള്ള മുദ്രകള് എടുത്തിട്ടുള്ളത്.
ആണ്-പെണ്വിഭാഗങ്ങള്ക്കുള്ള മത്സരം ഒന്നാക്കുന്നതോടെ നടനം അവതരിപ്പിക്കണ്ട വേഷങ്ങളെ സംബന്ധിച്ച് ആശയക്കുഴപ്പം ഉണ്ടാക്കും. ദുര്യോധനന്, അര്ജ്ജുനന്, ശ്രികൃഷ്ണന് തുടങ്ങിയ കഥാപാത്രങ്ങളുമായി ബന്ധപ്പെട്ട സന്ദര്ഭങ്ങള് ആണ്കുട്ടികള് തെരഞ്ഞെടുക്കുമ്പോള് പാര്വ്വതീദേവി, സീത തുടങ്ങിയ കഥാപാത്രങ്ങളുമായി ബന്ധപ്പെട്ട വിഷയങ്ങളാണ് പെണ്കുട്ടികള് അവതരിപ്പിച്ച് വരുന്നത്. പെണ്കുട്ടികള് അവതരിപ്പിക്കുന്ന കഥാപാത്രങ്ങള് ലാസ്യത്തിന് പ്രാധാന്യം നല്കുമ്പോള് ആണ്കുട്ടികള് താണ്ഡവത്തിന് പ്രാധാന്യം നല്കുന്നു. കഥകളിയില് പെണ്കുട്ടികള് പുരുഷകഥാപാത്രങ്ങള് അവതരിപ്പിക്കുകയാണെങ്കില് കിരീടം തുടങ്ങിയ വേഷവിധാനങ്ങളിലൂടെ മാറ്റം വരുത്താം. എന്നാല് കേരളനടനത്തില് ഇതു സാധ്യമല്ല.
ഇത്തരത്തില് വെവ്വേറേ അല്ലാതെ മത്സരാര്ത്ഥികള് വേദിയില് എത്തുന്നത് വിധികര്ത്താക്കളെ ആശങ്കയിലാക്കും. ഫല പ്രഖ്യാപനത്തില് യുവജനോത്സവ വേദികളില് സാധാരണ നടക്കാറുള്ള കൈയാങ്കളികള് ആവര്ത്തിക്കുന്നതിന് ഇത് ഇടയാക്കും. സ്കൂള് കലോത്സവങ്ങളിലൂടെയാണ് കേരളനടനം പ്രശസ്തിയാര്ജ്ജിച്ചത്. വിമര്ശനങ്ങള് കൂടുതലാകുമ്പോള് കേരള നടനത്തെ കലോത്സവവേദികളില് നിന്ന് അകറ്റിനിര്ത്തി തനതു നൃത്തത്തെ ഇല്ലായ്മ ചെയ്യാനുമാകും.
