ആലപ്പുഴ: കുട്ടനാട് പാക്കേജുമായി ബന്ധപ്പെട്ട നിര്മ്മാണ പ്രവര്ത്തനങ്ങള് നടത്തിയ കരാറുകാര്ക്ക് സര്ക്കാര് നല്കാനുള്ള കുടിശിക 210 കോടി. ആലപ്പുഴ, കോട്ടയം, പത്തനംതിട്ട ജില്ലകളിലായി പൂര്ത്തീകരിച്ച പ്രവൃത്തികളുടെ പണമാണ് നല്കാനുള്ളത്.
100 കോടിയുടെ ബില്ലുകള് തയ്യാറാക്കാനുമുണ്ട്, 250 കോടിയുടെ നിര്മ്മാണ പ്രവര്ത്തനങ്ങള് പൂര്ത്തിയാകാനുണ്ട്. ആകെ 560 കോടി രൂപ പാക്കേജുമായി ബന്ധപ്പെട്ട പണികള്ക്ക് വേണമെങ്കിലും സംസ്ഥാന സര്ക്കാര് പണമില്ലെന്ന നിലപാടാണ് സ്വീകരിച്ചിട്ടുള്ളത്. കാലാവധി കഴിഞ്ഞതിനാനാല് പാക്കേജുമായി ബന്ധപ്പെട്ട് കേന്ദ്രസര്ക്കാരില് നിന്ന് പണം ലഭിക്കാനും ബുദ്ധിമുട്ടാണ്.
ഈ സാഹചര്യത്തില് കരാറുകാര്ക്ക് കുടിശിഖ തുക നല്കാന് സംസ്ഥാന സര്ക്കാര് അടിയന്തര നടപടി സ്വീകരിക്കണമെന്ന് കേരള ഗവ. കോണ്ട്രാക്ടേഴ്സ് അസോസിയേഷന് സംസ്ഥാന പ്രസിഡന്റ് വര്ഗീസ് കണ്ണമ്പള്ളി പത്രസമ്മേളനത്തില് ആവശ്യപ്പെട്ടു. പുറംബണ്ട്, കലുങ്ക്, മോട്ടോര് തറകള്, ഓടകള് തുടങ്ങിയവ നിര്മ്മിച്ച ഇനത്തിലാണ് കരാറുകാര്ക്ക് പണം ലഭിക്കാനുള്ളത്. ചില പ്രവൃത്തികളില് അഴിമതി ആരോപണം ഉയര്ന്ന സാഹചര്യത്തില് വിജിലന്സ് അന്വേഷണം നടക്കുന്നുമുണ്ട്.
