കട്ടപ്പന: ഓണക്കാലത്ത് എക്സൈസ് സംഘം നടത്തിയ സ്പെഷ്യല് ഡ്രൈവില് കഞ്ചാവ് കേസുകള് ഉള്പ്പെടെ 181 പേരെ പിടികൂടി. ഓണം സ്പെഷ്യല് ഡ്രൈവ് എന്ന പേരില് ആഗസ്റ്റ് പത്ത് മുതല് സെപ്റ്റംബര് പത്തുവരെയാണ് പരിശോധനകള് നടന്നത്.
നാല്പ്പത്തിയഞ്ച് കഞ്ചാവ് കേസുകളിലായി 55 പ്രതികളെയാണ് പിടികൂടിയത്. ഇവരില് നിന്നും മൂന്നേമുക്കാല് കിലോ കഞ്ചാവും പിടിച്ചെടുത്തു. വിവിധ സ്ഥലങ്ങളില് കടപരിശോധനയ്ക്കിടെ പത്തൊമ്പത് കിലോ പാന് മസാലയും പിടികൂടി. അബ്കാരി കേസുകളിലായി 114 കേസുകളാണ് റിപ്പോര്ട്ട് ചെയ്തിട്ടുള്ളത്. 115 പേരെ പിടികൂടുകയും ചെയ്തു. 1400 ലിറ്റര് വാഷും കണ്ടെടുത്തു. ജില്ലയിലെ വിവിധ ചെക്ക്പോസ്റ്റുകളിലായി 18 കഞ്ചാവ് കേസുകളാണ് റിപ്പോര്ട്ട് ചെയ്തത്.
ഇതില് 22 പ്രതികളെ പിടികൂടുകയും ചെയ്തു. കമ്പംമെട്ട് ഏഴ് കേസുകളിലായി ഏഴു പ്രതികളെയും 315 ഗ്രാം കഞ്ചാവും, കുമളിയില് ഏഴ് കേസുകളിലായി 10 പ്രതികളെയും 860 ഗ്രാം കഞ്ചാവും, ബോഡിമെട്ടില് രണ്ട് കേസുകളിലായി മൂന്ന് പ്രതികളെയും അറുപത്തിയഞ്ച് ഗ്രാം കഞ്ചാവും, ചിന്നാറില് രണ്ടു കേസുകളിലായി രണ്ട് പ്രതികളെയും ഇരുപത്തി മൂന്ന്ഗ്രാം കഞ്ചാവും പിടിച്ചെടുത്തു.
ഇടുക്കി ഡെപ്യൂട്ടി എക്സൈസ് കമ്മിഷണര് കെ.എ. നെല്സന്റെ നേതൃത്വത്തിലാണ് പരിശോധനകള് നടന്നത്. ജില്ലയില് കഞ്ചാവിന്റെ ഉത്പാദനം നടക്കുന്നില്ലെന്നും എന്നാല് ഇടുക്കിക്കാരുടെ നേതൃത്വത്തില് അന്യസംസ്ഥാനങ്ങളില് കൃഷി നടത്തുന്നതായും ഡെപ്യൂട്ടി കമ്മീഷണര് പറഞ്ഞു.
