മാന്നാര്: മാലിന്യത്താല് മൂടപ്പെട്ട പമ്പനദിയുടെ നവീകരണം ആവശ്യപ്പെട്ടു നാട്ടുകാര്. പമ്പാനദിയിലെ പാണ്ടനാട് ഇല്ലിമല മുളപ്പുറം കടവില് നിന്നും തെക്കോട്ട് ഒഴുകി മാന്നാര് കുരട്ടിക്കാട് കോട്ടയ്ക്കല് കടവ് വഴി പന്നായിക്കടവിലെത്തുന്ന നാലു കിലോമീറ്റര് ദൈര്ഘ്യമുള്ള കൈവഴിത്തോടാണു വര്ഷങ്ങളായി നശിച്ചു കിടക്കുന്നത്.
ഒരു കാലത്ത് ഈ വഴിക്കുകൂടി വലിയ ബോട്ടുകളും വള്ളങ്ങളും ഉപയോഗിച്ച് പന്നായിക്കടവിലെ ബോട്ടുജെട്ടിയില് കാര്ഷിക ഉല്പന്നങ്ങടക്കമുള്ള ചരക്കുകള് കൊണ്ടുപോകുകയും ഇറക്കുകയും ചെയ്തിരുന്നു.ഇന്ന് ചെറുവള്ളങ്ങള്ക്കു പോലും പോകാനാവാത്ത വിധം ജലസസ്യങ്ങളും പായലും മാംസാവശിഷ്ടങ്ങള് ആശുപത്രി മാലിന്യങ്ങളടക്കം നിറഞ്ഞുകിടക്കുകയാണ്.
അന്പതോളം കുളിക്കടവുകളുള്ളതിന്റെ അവസ്ഥയും ഇതു തന്നെ യായതിനാല് ജനം പമ്പയുടെ കൈവഴിയിലെ കുളിയും നനയും വരെ ഉപേക്ഷിച്ചു.അനധിക്യത കയ്യേറ്റമാണ് മറ്റൊരു പ്രശ്നം.മണ്ണടിച്ചു നികത്തി കരിങ്കലും കോണ്ക്രീറ്റും കൊണ്ട് തിട്ട കെട്ടിയുള്ള കയ്യേറ്റങ്ങളും വ്യാപകമാണ്.
ആറ്റു തീരത്തു അധിക്യതരെത്തുന്നില്ലായെന്നതു മുതലാക്കിയാണ് കയ്യേറ്റക്കാര് ഇവിടെ സ്വന്തമാകുന്നത്.
പരാതിയുയര്ന്നാല് മാത്രമെ റവന്യൂ,ജലവിഭവ വകുപ്പും പോലീസും ഇവിടങ്ങളിലെത്തുകയുള്ളു.നദികളുടെയും പുഴകളുടെയും സംരക്ഷണത്തിനു സര്ക്കാര് പ്രാധാന്യം കൊ ടുക്കുന്ന സാഹചര്യത്തില് പമ്പയുടെ കൈവഴിയെ മറക്കരുതെന്നാണ് പൊതുജനാവശ്യം.
