ഞാന്‍ മഹാബലിയായി വരികയാണെങ്കില്‍ ഒരിക്കലും റോഡില്‍ക്കൂടി സഞ്ചരിക്കില്ല. ഫ്‌ളൈറ്റിലേ വരൂ. നെടുമ്പാശ്ശേരിയില്‍ ഇറങ്ങിക്കഴിഞ്ഞാല്‍, ഹെലികോപ്റ്ററില്‍ കൊണ്ടുപോകാന്‍ പറയും. ഇവിടുത്തെ റോഡിലൂടെ പോയാല്‍ നട്ടെല്ലുണ്ടാവില്ല. മഹാബലി യഥാര്‍ത്ഥത്തില്‍ വന്നാല്‍, അദ്ദേഹം കരഞ്ഞേ തിരിച്ചുപോകൂ. ഒരിക്കലും സന്തോഷമായി തിരിച്ചുപോകില്ല.
ഇവിടെ മഹാബലിയുണ്ടായിരുന്ന കാലത്ത് മാനുഷരെല്ലാം ഒന്നുപോലെയായിരുന്നല്ലോ? സ്ത്രീകളെ ബഹുമാനിക്കുന്ന കാലമായിരുന്നു അത്. ഇന്ന് സ്ത്രീകള്‍ ഭോഗവസ്തുവായി മാറി.
ഇതൊക്കെ കണ്ടാല്‍, മഹാബലി കരഞ്ഞുകൊണ്ടല്ലേ പോകൂ. ഞാനും മഹാബലിയായാല്‍ കരഞ്ഞുകൊണ്ടേ പോകൂ. എന്തായാലും ഓണത്തെക്കുറിച്ച് കുറേ നല്ല ഓര്‍മ്മകളുണ്ട്. അതെല്ലാം ചെറുപ്പകാലത്താണ്. ആ ഓര്‍മ്മകള്‍ ഓണം അടുത്തെത്തുമ്പോള്‍ എന്നുമുണ്ടാകും.
ചെറുപ്പകാലങ്ങള്‍ ഗ്രാമത്തിലായിരുന്നു. വൈക്കത്ത് ഉല്ലല എന്ന ഗ്രാമത്തില്‍. സാധാരണ ഗതിയില്‍ ഏഴ്, എട്ട് വയസ്സാകുമ്പോഴേ പിളേളര്‍ക്ക് ഓണത്തെക്കുറിച്ചുള്ള ബോധമുണ്ടാകൂ. ഈ സമയത്ത് എല്ലാവരും ഓണം ആഘോഷിക്കുന്നതും പൂക്കളം ഇടുന്നതുമൊക്കെ കണ്ടും കേട്ടും നടക്കുന്ന കാലമാണ്. പത്ത് പതിമൂന്ന് വയസ്സാകുമ്പോഴാണ് പൂ പറിക്കാന്‍ ഇറങ്ങിത്തുടങ്ങിയത്.
ഭാഗ്യം കൊണ്ടോ നിര്‍ഭാഗ്യം കൊണ്ടോ അന്ന് കുടികിടപ്പുകാരുണ്ടായിരുന്നു. അവര്‍ ഓലകൊണ്ട് നല്ലകൂട ഉണ്ടാക്കിത്തരും. പൂക്കളമിടാന്‍ പൂപറിക്കാന്‍ ഈ കൂടയുമയാണ് പോകാറ്. ഓണത്തിന് കളമിടുന്നതിലുപരി മറ്റു ചില ലക്ഷ്യങ്ങളും ആ പൂപറിക്കല്‍ യാത്രയ്‌ക്കുണ്ടായിരുന്നു. നമ്മുടെ പ്രായത്തിലുള്ള പെണ്‍കുട്ടികളും കൂടി ചേര്‍ന്നാണ് പൂ പറിക്കാന്‍ പോകുന്നത്. അയല്‍പക്കത്തെയും കൂടെപ്പഠിക്കുന്നവരുമൊക്കെ ഉണ്ടാകും കൂട്ടത്തില്‍.
പൂപറിക്കുന്നതിനിടയില്‍ ആരുമറിയാതെ പ്രേമിക്കാന്‍ അവസരം കിട്ടും്. ഒളിച്ചുംപാത്തും ഒക്കെ പ്രേമിക്കാന്‍ നല്ല രസമായിരുന്നു. അതൊക്കെ ഓര്‍ക്കുമ്പോള്‍ ഇപ്പോള്‍ ചിരിവരും.
പൂ പറിക്കാന്‍ എവിടെയാണ് പോകുന്നതെന്നറിയില്ല. കൂട്ടുകാരെല്ലാവരുമായി ഒരുപാട് യാത്ര ചെയ്യും. സര്‍പ്പക്കാവുകള്‍, വയലേലകള്‍….അങ്ങനെ ഒരുപാട് സ്ഥലത്ത്. വയലിലുണ്ടാകുന്ന പൂക്കള്‍ ഒരുപാടുണ്ട്. അതൊക്കെ ഇപ്പോഴത്തെ തലമുറയ്‌ക്ക് അറിയില്ല. നെല്ലിപ്പൂ, ഊരന്‍ അങ്ങനെ ഒരുപാട്. ഊരന്‍ എന്നത് നെല്ലിന് ഇടയിലുള്ള ഒരു കളയാണ്. നല്ല പച്ചത്തത്തയുടെ നിറമാണ് അത് ഉതിര്‍ത്തെടുത്താല്‍. വയലുടമകള്‍ കാണാതെ ഒളിച്ചാണ് ഈ പൂവുകള്‍ പറിക്കുന്നത്.
ശരിക്കും സമൃദ്ധമായിരുന്നു അന്നത്തെ ഓണം. അന്നത്തെ ഓണവും ഇന്നത്തെ ഓണവുമായി ഒരുതരത്തിലും താരതമ്യപ്പെടുത്താന്‍ പറ്റില്ല. പണ്ടുകാലത്ത് കൂട്ടുകുടുംബമായിരുന്നു. ഭാഗം വെച്ച് പലരും മാറിയെങ്കിലും ഓണത്തിന് എല്ലാവരും ഒത്തുകൂടും. എല്ലാവരും കൂടി തിമിര്‍ത്തുള്ളഓണമായിരുന്നു. ഇന്ന് ഫ്‌ളാറ്റിനകത്തും വില്ലകള്‍ക്കത്തുമാണ് ഓണം. ചില ഓണങ്ങളില്‍ ഇന്ത്യയ്‌ക്ക് പുറത്തായിരുന്നു. കേരളത്തില്‍ ഇന്നുള്ളതിനേക്കാള്‍ അതിമനോഹരമാണ് അവിടത്തെ ഓണം. മസ്‌കറ്റില്‍ ഒരു ഓണാഘോഷത്തിന് വിളിച്ചു. ഞാനും സംവിധായകനും കെ. മധുവുമാണ് പോയത്. സത്യത്തില്‍ കിടുങ്ങിപ്പോയി. ഇവിടുന്ന് പാത്രങ്ങള്‍ വരെ അവിടെ കൊണ്ടുപോയാണ് ഓണത്തിന് പാചകം ചെയ്യുന്നത്. തൂശിനിലയും അവര്‍ സംഘടിപ്പിച്ചെടുക്കും. ഇവിടെ പ്ലാസ്റ്റിക്ക് ഇലയല്ലേ ഉപയോഗിക്കുന്നത്.
എന്നെ സംബന്ധിച്ച് ഓണം ഒരു ആഘോഷമല്ല. ഭാര്യയില്ലാത്ത ഓണമാണ്. തന്നെയുമല്ല, മൂത്ത സഹോദരനുമൊക്കെ മരിച്ച സമയാണ്. എന്നാലും ഓണത്തിന്റെ ഭാഗമാകാറുണ്ട്. ഓണത്തിന് സദ്യയ്‌ക്ക് ഓര്‍ഡര്‍ കൊടുക്കുകയാണിപ്പോള്‍. അല്ലാതെ വഴയില്ല. പണ്ട് ഓണമടുക്കുമ്പോള്‍ സാധനങ്ങള്‍ വാങ്ങാനുള്ള തിരക്കാണ്. ഉത്രാടപ്പാച്ചില്‍ എന്നു പറയാം. ഓണത്തിന് ഏറെ മാറ്റങ്ങള്‍ വന്നു. പക്ഷേ, എന്നും ഒത്തൊരുമയോടെയാണ് ഇവിടത്തെ ഓണാഘോഷം.
