ഡാമുകളിലെ ജലനിരപ്പുയരുന്നു

ഇടുക്കി: പ്രതീക്ഷിക്കാതെ മലയോര ജില്ലകളില്‍ മഴ കനത്തതോടെ ഡാമുകളിലെ ജലനിരപ്പ് ഉയരുന്നു. പ്രധാനപ്പെട്ട 16 ഡാമുകളില്‍ ജലനിരിപ്പ്ആശ്വാസകരമായ അവസ്ഥയില്‍ എത്തി.മുന്‍ വര്‍ഷത്തേക്കാള്‍ കുറവുള്ളത് 6 ശതമാനം വെള്ളം മാത്രമാണ്. ഡാമുകളിലെ ജലനിരപ്പ് ഇപ്പോള്‍ 47 ശതമാനമാണ്. ജൂണ്‍ ആദ്യവാരം ഇത് 12 ശതമാനം മാത്രമായിരുന്നു.

ഇന്നലെ രാവിലെ 7ന് ലഭിച്ച കണക്ക് പ്രകാരം 1944.059 ദശലക്ഷം യൂണിറ്റ് വൈദ്യുതിക്കുള്ള വെള്ളമാണ് ഡാമുകളിലുള്ളത്. കഴിഞ്ഞ വര്‍ഷം ഇതേ സമയം ഇത് 2238.132 ഉം, 2015 ല്‍ 2333.686 ആയിരുന്നു.

ഏറ്റവും വലിയ ജലവൈദ്യുത പദ്ധതിയായ ഇടുക്കിയിലെ ജലനിരപ്പ് 40.547 ശതമാനം ആണ്. 2343.68 അടി. മുന്‍വര്‍ഷം ഇത് 47.089 ആയിരുന്നു.

2.08 സെന്റീ മീറ്റര്‍ മഴ പെയ്തപ്പോള്‍ 25.3 ദശലക്ഷം യൂണിറ്റ് വൈദ്യുതി ഉല്പാദിപ്പിക്കാനുള്ള വെള്ളം ഡാമിലേയ്‌ക്ക് ഒഴുകിയെത്തി. ഡാമിലാകെ അവശേഷിക്കുന്നത് 870.954 ദശലക്ഷം യൂണിറ്റ് വൈദ്യുതിക്കുള്ള വെള്ളമാണ്. പമ്പ-കക്കി അണക്കെട്ടുകളിലെ ജലനിരപ്പ് ഒറ്റദിവസം കൊണ്ട് 1.5 ശതമാനം ഉയര്‍ന്ന് 46 ശതമാനത്തിലെത്തി. ലോവര്‍പെരിയാര്‍, പൊരിങ്കല്‍, നേര്യമംഗലം അണക്കെട്ടുകള്‍ ദിവസങ്ങളായി നിറഞ്ഞ് കിടക്കുകയാണ്. ആനയിറങ്കല്‍ ഡാമിലാണ് നിലവില്‍ ഏറ്റവും കുറവ് വെള്ളമുള്ളത്.

എന്നാല്‍ ഇത് ആഗസ്റ്റ് മാസം മാത്രം 6 ശതമാനം ഉയര്‍ന്ന് 21 ശതമാനത്തിലെത്തി. സംസ്ഥാനത്താകെ 65.3892 ദശലക്ഷം യൂണിറ്റ് വൈദ്യുതി ഉപയോഗിച്ചപ്പോള്‍ ഉല്പാദിപ്പിച്ചത് 17.8742 ദശലക്ഷം യൂണിറ്റ് ആണ്.

ആഗസ്റ്റില്‍ കൂടിയത് 21 ശതമാനം വെള്ളം

തൊടുപുഴ: സംസ്ഥാനത്ത് കാലവര്‍ഷത്തിലേറ്റവും അധികം മഴ ലഭിച്ചത് ആഗസ്റ്റില്‍. ഒറ്റമാസം കൊണ്ട് സംസ്ഥാനത്തെ ഡാമുകളിലാകെ കൂടിയത് 21 ശതമാനം വെള്ളമാണ്.

മഴക്കാലം ആരംഭിച്ച് രണ്ട് മാസം കൊണ്ട് വെറും 14 ശതമാനം വെള്ളം ഉയര്‍ന്നപ്പോഴാണിത്. ജൂണ്‍, ജൂലൈ മാസങ്ങളില്‍ മഴ കുറഞ്ഞപ്പോള്‍ ആഗസ്റ്റില്‍ പ്രതീക്ഷിക്കാതെ ശക്തമായ മഴയെത്തി. ഇടുക്കിയിലടക്കം മഴയ്‌ക്ക് ശമനം ഉണ്ടെങ്കിലും ഡാമിലേയ്‌ക്കുള്ള നീരൊഴുക്ക് ശക്തമാണ്.